मुक्तकमलरीसे नगरप्रमुखहे ध्यानाकर्षणपत्र
पहुरा समाचारदाता
धनगढी, १ असार । मुक्तकमलरी विकास मञ्च जिल्ला शाखा कैलालीसे टीकापुर नगरपालिकाहे ६ बुँदे ध्यानाकर्षणपत्र बुझैले बा ।
मञ्चके जिल्ला अध्यक्ष विन्द्राकुमारी चौधरी मुक्तकमलरीहुकनके माग ६ बुँदे मागसहित टीकापुर नगरपालिकाके नगरप्रमुख रामलाल चौधरीहे ध्यानाकर्षणपत्र बुझागिल बा ।
उ ध्यानाकर्षणपत्रमे प्राविधिक शिक्षा, लोकसेवा अध्ययनके लाग दुई जनहनहे अनिवार्य व्यवस्था करे पर्ना, व्यावसायिक सीपमूलक तालिमके साथे व्यावसाय संचालनके लाग चार जनहनहे ऋणपुँजीके व्यवस्था करे पर्ना माग करल बा ।
ओस्टेक महिला हिंसा, बालविवाह, बाल श्रमिकहुकनके अनिवार्य बजेट विनियोजन करे पर्ना, जनचेतना मुलक कार्यक्रमके लाग बजेट विनियोजन करे पर्ना, दक्ष तथा योग्य एक जाने मुक्तकमलरीके रोजगारीके व्यवस्था करे पर्ना माग करल बा ।
मुक्तकमलरी विकास मञ्चके लाग जग्गा खरिद तथा भवन निर्माणके लाग सहयोग करेपर्नासमेट माग राखल मञ्चके जिल्ला अध्यक्ष चौधरी बटैली ।
