सारथी अस्पतालसे पत्रकारके निःशुल्क स्वास्थ्य चेकजाँच कैना
पहुरा समाचारदाता
धनगढी, २ असार । नेपाल प्रेस युनियन कैलालीके समन्वयमे धनगढीके सारथी अस्पतालसे पत्रकारहे निःशुल्क चेकजाँच कैना हुइल बा । अस्पतालसे कैलालीके पत्रकारहे ओपिडी चेकजाँच पूर्ण रुपमे निःशुल्क ओ अन्य सेवामे २० प्रतिशत छुटमे सेवा डेना हुइल बा ।
नेपाल प्रेस युनियन कैलाली ओ सारथी अस्पताल प्रालि बिच हुइल सम्झौता अनुसार कैलालीमे कार्यरत पत्रकार एक घर परिवारके चार जनहनहे समेत ओपिडी चेकजाँच पूर्ण रुपमे निःशुल्क ओ अन्य सेवामे २० प्रतिशत छुट डेना प्रेस युनियन कैलालीके अध्यक्ष श्रवण देउवा जानकारी डेलै ।
सारथी अस्पतालके प्रवन्ध निर्देशक बेदप्रकाश जोशी ओ नेपाल प्रेस युनियन कैलालीके अध्यक्ष श्रवण देउवा सम्झौता पत्रमे हस्ताक्षर करले बाटै ।
सम्झौता अनुसार ओपिडी चेकजाँच निशुल्क कैना तथा ल्याव, बेड भर्ना, फार्मेसी, यूएसजी, इको, एक्सरे, आइसियू ओ इसिजीमे २० प्रतिशत छुट डेना अस्पतालके प्रबन्ध निर्देशक बेदप्रकाश जोशी जानकारी डेलै ।
सम्झौता कार्यक्रममे नेपाल आदिवासी जनजाति पत्रकार महासंघके केन्द्रीय सदस्य तथा सुदूरपश्चिम ईन्चार्ज भीम चौधरी, नेपाल फोटो पत्रकार महासंघके सुदूरपश्चिम प्रदेश अध्यक्ष विवेक नागरी, नेपाल प्रेस युनियन कैलालीके सदस्य कृतबहादुर बिष्टके उपस्थिती रहल रहे ।
