संघसे गाउँपालिकाहे ७ बुँदे ज्ञापनपत्र
पहुरा समाचारदाता
हसुलिया, २ जेठ । कैलारी उद्योग वाणिज्य संघसे गाउँपालिकाहे ७ बुँदे ज्ञापनपत्र बुझैले बा ।
बुधके रोज संघके आयोजनामे सम्पन्न नवनिर्वाचित पदाधिकारीहुकनहे बधाई तथा शुभकामना कार्यक्रममे संघके अध्यक्ष नेपालु चौधरी गाउँपालिका अध्यक्ष राजसमझ चौधरीहे ज्ञापनपत्र बुझाइल रहिट ।
कार्यक्रममे बोल्टी अध्यक्ष चौधरी नयाँ आर्थिक वर्षके सुरुवातसंगे गाउँपालिकामे ओजरार कार्यक्रमहे उच्च प्राथामिकताके साथ आघे बढैना बटैले बटै । ‘गाउँपालिकामे ओजरार अभियान सञ्चालनके लाग विद्युत प्राधिकरणसंग आन्तरिक समझदारी हुसेकल बा’, उहाँ कहलै, ‘अव विगतमे जैसिन गाउँपालिकामे हुइना चोरीके घटनाहे निरुत्साहित कैबी ।’ ओस्टेक अध्यक्ष चौधरी हाली हसुलिया बजारमे विद्युतु महशुल तिर्ना व्यवस्था मिलैना समेत बटैले बटै ।
चौधरीके अनुसार निकट भविष्यमे गाउँपालिका ओ उद्योग वाणिज्य संघके पहलमे व्यापारिक प्रवद्र्धनके लाग महोत्सव सञ्चालन कैजाई । ‘गाउँपालिकाके धार्मिक तथा सांस्कृतिक पर्यटन प्रवद्र्धनके लाग होम स्टे समेत सञ्चालन कैबी,’ चौधरी कहलै, ‘गाउँपालिकाके समग्र विकास हमार मुख्य प्राथामिकता रही ।’
कार्यक्रममे कैलारी गाउँपालिकाके उपाध्यक्ष भगवती कुमारी चौधरी, टमान राजनीतिक दलके प्रतिनिधि, प्रहरी, समाजसेवी लगाएतके उपस्थिति रहल रहे ।
कार्यक्रममे उद्योग वाणिज्य संघ कैलारीके दुसरा साधारण सभासे नव निर्वाचित पदाधिकारीहुकनहे बधाई तथा शुभकामना डेहल रहे ।
