सुदूरपश्चिम विश्वविद्यालय चिकित्सा संकाय सुरु कैनाः प्रम देउवा

पहुरा समाचारदाता
धनगढी, ३ असार । प्रधानमन्त्री शेरबहादुर देउवा सुदूरपश्चिम विश्वविद्यालय इहे बरससे चिकित्सा संकायके अध्यापन सुरु कैना बटैले बाटै । विश्वविद्यालयके दीक्षान्त समारोहमे बोल्टी कुलपतिसमेत रहल प्रम देउवा ओइसीन बटाइल हुइट ।

‘इहे बरससे विश्वविद्यालयसे चिकित्सा संकायके सुरुवात कैना ओ डडेल्धुरामे मेडिकल कलेज स्थापना कैना सम्भाव्यता अध्ययन तथा गुरुयोजना निर्माणके कार्य आघे बह्रैटी रहल बा,’ प्रधानमन्त्री देउवा कहलै, ‘नेपाल सरकारसे सुदूरपश्चिम विश्वविद्यालयहे मेडिकल कलेज सञ्चालन कैना आवश्यक बजेट फेन विनियोजन करले बावै ।’

विश्वविद्यालयसे सुदूरपश्चिमके निम्न ओ मध्य आय रहल विद्यार्थीनहे गुणस्तरिय शिक्षा प्रदान करल बटैटी देउवा गुणस्तरीय जनशक्ति उत्पादनमे फेन महत्वपूर्ण भूमिका निर्वाह करल बटैलै ।

‘विश्वविद्यालय समयअनुसार शैक्षिक ओ व्यवस्थापकीय सुधार हुइना आवश्यक बा,’ उहाँ कहलै, ‘अइना कुछ बरसमे मुलुकके उत्कृष्ट संस्था बन्नामे आशावादी रहल बाटुँ ।’

विश्वविद्यालयके १३ औँ स्थापना दिवस तथा विश्वविद्यालयके डुसरा दीक्षान्त समारोमे दिक्षित हुउइया १ हजार १८ विद्यार्थीमध्ये ३ सय १८ सहभागी रहल रहिट । स्नातकोत्तर तहमे कुलपति पदक ४ जाने, स्नातक तहमे उप कुलपति पदक ८ जाने सहित स्नातक ओ स्नातकोत्तर तह कैके ५८ जाने गोल्ड मेडल पैले बाटै । समारोहमे शिक्षामन्त्री देबेन्द्र पौडेल, मुख्यमन्त्री त्रिलोचन भट्ट लगायतके सहभागी रहल रहिट ।