बस्ती जोगाइक लाग तटबन्ध

पहुरा समाचारदाता
धनगढी, ४ असार । कैलाली जिल्लाके कैलारी गाउँपालिका वडा नम्बर ३ शिवरत्नापुर गाउँ जोगाइक लाग मोहना लडियामे तटबन्धके काम हुइटी रहल बा ।

गाउँपालिकाके आर्थिक सहयोगमे १५ लाखके भौतिक तटबन्धके काम सम्पन्न हुइलपाछे शिवरत्नापुरबासीहुक्रे अब्बे फेरसे भौतिक तटबन्धहे जोगाइक लाग जैविक तटबन्धके काम हुइटी रहल तटबन्ध निर्माण उपभोक्ता समितिके सचिव स्यानु चौधरी बटैलै । उहाँ कहलै, भौतिक तटबन्धके काम जेठ १५ गते सम्पन्न हुइल बा । भौतिक तटबन्धहे जोगाइक लाग जैविक तटबन्धके काम हुइटी बा ।’

मोहना लडियक धार गाउँ टकाइले बा, भौतिक तटबन्धसे केल पानीके बहाव सेक्ना सम्भव नइरहल ओरसे भौतिक तटबन्धके सुरुवाट करल उहाँ बटैलै । बस्ती जैगाइक लाग ८ सय मिटर तटबन्ध बनाइल सचिव चौधरी बटैलै ।

गैल बरस कुवाँर–कार्तिकमे आइल बेमौसमी बाढसे काटके धारल सारा गाउँक धान पुहैनाके साथे खेती योग्य जमिन बलुटियामे परिणत करल शिवरत्नापुरके स्थानीय तथा भौतिक तटबन्ध निर्माण उपभोक्ता समितिके अध्यक्ष सन्तराम चौधरी बटैलै ।

उहाँ कहलै, ‘गाउँपालिकासे पाइल १५ लाख बजेटमे भौतिक तटबन्ध बनैली । बैशाख ६÷७ गतेसे सुरुवाट करल तटबन्धके काम जेठ १५ गते सम्पन्न हुइल बा ।’ शिवरत्नापुर गाउँमे गैल बरसके बेमौसमी बाढसे करिब ९५ घरधुरीके धान पुहाके लैगिल खेती योग्य जमिनमे बालु भर डेहल उहाँ बटैलै । बर्षेणी बर्खाके बेला कटान करटी मोहना सयौं विघा खेती योग्य काटके लैगिल उहाँ बटैलै ।

कुवाँर–कार्तिक महिनामे आइल बेमौसमी बाढपाछे गाउँपालिकामे स्थापना हुइल खाद्य बैंकके १५ लाख रुप्या बजेटमे भौतिक तटबन्धके काम हुइल ओ विपद जोखिम न्यूनिकरण अन्र्तगत ५ लाखमे जैविक तटबन्धके काम हुइटी रहल गाउँपालिकाके योजना शाखा प्रमुख सन्तोषकुमार चौधरी बटैलै ।