थाकससे नवनिर्वाचित थारु जनप्रतिनिधिहुकन बधाई कार्यक्रम

पहुरा समाचारदाता
हसुलिया, ४ असार । थारु कल्याणकारिणी सभासे कैलाली जिल्लाके नवनिर्वाचित थारु जनप्रतिनिधिहुकन बधाई ओ शुभकामना कार्यक्रम करले बा ।

थारु कल्याणकारिणी सभाके केन्द्रीय सदस्य रामचरण चौधरीके वडका पहुनामे हुइल कार्यक्रममे विशिष्ट पहुना सभाके केन्द्रीय सदस्य प्रभातकुमार चौधरी रहल रहिट । जिल्लासे निर्वाचित थारु जनप्रतिनिधिहुकन खादासहित ओरहाके बधाई ज्ञापन करल रहिट । जिल्ला स्तरीय कार्यक्रमके आयोजना हुइल मने जनप्रतिनिधि अब्बे बजेट नन्ना तयारीमे जुटल ओरसे कैलारी गाउँपालिका, धनगढी उपमहानगरपालिका ओ लम्कीचुहा नगरपालिकाके जनप्रतिनिधि केल सहभागी हुइल रहिट ।

सभासे आयोजित नवनिर्वाचित थारु जनप्रतिनिधिहुकन बधाई ओ शुभकामना कार्यक्रममे सहभागी कैलारी गाउँपालिका निर्वाचित गाउँपालिका अध्यक्ष राजसमझ चौधरी, उपाध्यक्ष भगवतीकुमारी चौधरी, चार वडाके वडा अध्यक्ष, लम्कीचुहा नगरपालिकाके उपप्रमुख जुना चौधरी, चार ठो वडाके वडा अध्यक्ष, धनगढी उपमहानगरपालिका–७ के वडा अध्यक्ष मोती रानाथारु लगायत वडा सदस्यहुकन खादासहित ओरहाके बधाई ज्ञपान कैगिल रहे ।

कार्यक्रममे थारु जनप्रतिनिधिहुकन एक ठो सयन्त्र बने पर्ना, टीकापुर मुद्दाके लाग आवाज उठाई पर्ना, थारु समुदायमे भल्मन्सा प्रथाहे कानूनी मान्यता डेहुवइना बाटमे छलफल हुइल थारु कल्याणकारिणी सभा कैलालीके कार्यवाहक सभापति माधव चौधरी बटैलै । कार्यक्रममे थारु बुद्धिजिवी तथा अधिवक्ता जोहारीलाल चौधरी, कृष्ण प्रसाद चौधरी लगायतहुकनके सहभागिता रहल रहे ।