हठियक आक्रमणसे महिलाके मृत्यु

टीकापुर, ५ असार । कैलालीके टीकापुरमे हठियक आक्रमणसे एक महिलाके मृत्यु हुइल बा ।

मृत्यु हुइलमे टीकापुर नगरपालिका–१ ब्लक नं १५ के ५० वर्षीया टंक सोडारी रहल इलाका प्रहरी कार्यालय टीकापुर जनैले बा । कर्णाली लडिया किनार सनकट्टीघाटमे शनिच्चर साँझ बनुवासे निकरल दुई ठो हाठी उहे लडियामे हुइटी रहल तटबन्धमे मजदुरी करके घर लौटटी रहल सोडारीहे आक्रमण करल प्रहरी नायव उपरीक्षक हेमबहादुर शाही बटैलै ।

लडिया किनारमे तटबन्धके लाग और तीन महिला ढुङगा संकलन करटी रहल रहिट । एक्कासी दुई ठो हाठी लग्गे डेखलपाछे दुई महिला भग्लेसेफे सोडारीहे हाठी लछारपछार करके, गोर टुरके मुवाइल प्रत्यक्षदर्शी बटाइल प्रहरी जनैले बा ।

पछिल्का समय कैलाली, बर्दिया जिल्लामे जङगली जानवरके आक्रमण बह्रटी गैल बा । यिहीहे जङगल आसपासमे हुइल क्षेत्रमे बर्सेनी दर्जनौँ मनैनके ज्यान जैना करल बा ।