बालबालिकनहे फाइजर खोप लगैना

पहुरा समाचारदाता
धनगढी, ५ असार । कैलालीमे १ लाख ४३ हजार ९३४ जाने बालबालिकाहुकनहे कोभिड १९ विरुद्धके फाइजर पेडियाट्रिक खोप लगैना बा ।

स्वास्थ्य कार्यालय कैलालीके आयोजना तथा इपिक नेपाल परियोजनाके समन्वयमे अँँटवारके रोज धनगढीमे हुइल जिल्ला स्तरीय पेडियाट्रीक फाइजर खोप सम्बन्धी अभिमुखीकरण कार्यक्रममे स्वास्थ्य कार्यालयके प्रमुख लालबहादुर धामी फाइजर पेडियाट्रिक खोप कार्यक्रमबारे जानकारी डेहल रहिट ।

पहिल चरणमे अन्र्तगत (यिहे असार ९ से १५ गतेसम) देशके २७ जिल्लामे सञ्चालन हुइना खोप कार्यक्रममे सुदूरपश्चिम प्रदेशके कैलाली, कञ्चनपुर ओ डडेल्धुराके ५ से ११ वर्ष उमेरके बालबालिकाहे कोभिड १९ विरुद्धके फाइजर पेडियाट्रिक खोप लगैना तयारीमे जुटल स्वास्थ्य कार्यालयके प्रमुख धामी बटैलै ।

लक्षित समूहके बालबालिकाहे फाइजर पेडियाट्रिक नामक खोप दुई मात्रामे डेना बटैटी उहाँ पहिल खोप असार ९ से १५ गतेसम ओ दुसरा मात्रा २१ दिनपाछे डेना उहाँ जानकारी डेलै । ५ वर्ष से ११ वर्षसमके बालबालिकाहे डेहे मिल्न खोप उपलब्ध हुइल ओरसे विद्यालयमे खोप केन्द्र धारके खोप डेनाफे उहाँ जनैलै । फाइजर पेडियाट्रिक खोप विद्यालयमे लगैना ओ विद्यालय बाहेर रहल बालिकाहुकनके स्वास्थ्य संस्था वा गाउँमे लगैनाफे उहाँ बटैलै ।

कैलाली जिल्लाके १३ ठो स्थानीयतह अन्र्तगत स्वास्थ्य शाखासे संकलन करल तथ्याङक अनुसार ५ से ११ वर्ष उमेरके १ लाख ४३ हजार ९३४ जाने बालबालिका रहल स्वास्थ्य कार्यालयके प्रमुख धामी बटैलै । कलेसे सुदूरपश्चिम प्रदेशमे ५ से ११ वर्ष उमेर समुहके ३ लाख ७८ हजार २२९ जाने बालबालिकाहे कोभिड १९ विरुद्धके फाइजर पेडियाट्रिक खोप लगैना बा ।

५ से ११ वर्ष उमेर समुहके धनगढी उपमहानगरपालिकामे ३० हजार ७७८ जाने, कैलारी गाउँपालिकामे ४ हजार ७३७, भजनी नगरपालिकामे ७ हजार १२८, टीकापुर नगरपालिकामे १३ हजार ७२६ जाने बालबालिका रहल बटै ।

ओस्टेक जोशीपुर गाउँपालिकामे ४ हजार ६९९, जानकी गाउँपालिकामे ५ हजार ११०, लम्कीचुहा नगरपालिकामे २२ हजार ४९, बर्दगोरिया गाउँपालिकामे ५ हजार ६५४ ओ घोडाघोडी नगरपालिकामे १४ हजार ४ सय ६४ जाने ५ से ११ वर्ष उमेर समुहके बालबालिका रहल बटै ।

ओस्टेक करके गौरीगंगा नगरपालिकामे १० हजार ५ सय, गोदावरी नगरपालिकामे १६ हजार ५६९, चुरे गाउँपालिकामे ३ हजार ९८० ओ मोहन्याल गाउँपालिकामे ४ हजार ४४० जाने ५ से ११ वर्ष उमेर समुहके बालबालिका रहल बटै ।

विश्व स्वास्थ्य संगठनके खोप कार्यक्रम फोकल पर्सन डा. नेमेश खटिवाडा खोप लगाईबेर मुरी बठैना, सुई लगाइल ठाउँमे बठैना, लाल हुइना, सुवैना, आलस्य हुइना, जुरी अइना, वाकवाकी लग्ना, वान्ता हुइना लगायतके सामान्य लक्षण विल्गाई सेकठ मने जौन सक्कु खोपमे लक्षण विल्गाइठ यम्ने डराई नइपर्ना बटैलै ।

मने शरीर खुङजैना, विमिरा अइना, डाबर हुइना, ढेर आलस्य हुइना, सुई लगाइल ठाउँमे ढेर खुङजैना वा फोका जैसिन विल्गैलेसे तुरुन्त सम्बन्धित खोप केन्द्र वा चिकित्सक थेन सम्पर्क करे पर्ना उहाँ बटैलै । ओस्टेक करके उच्च जुरी आइल, सिरियस विमार रहल, रक्तसंचार सम्बन्धी गम्भीर समस्या रहल बालबालिकाहे यी खोप नइलगैना उहाँ सुझाव डेलै ।

प्रमुख जिल्ला अधिकारी किरण थापाके अध्यक्षतामे हुइल कार्यक्रममे उहाँ कोभिड १९ विरुद्धके फाइजर पेडियाट्रिक खोपहे प्रभावाकरी बनैना स्थास्थ्यकर्मी, स्थानीय तहके शिक्षा शाखाके प्रमुखहुकन आग्रह करलै । उहाँ कहलै, ढेर जैसिन व्यक्ति अभिन कोभिड १९ विरुद्धके खोप नइलगैले हुइट । कोइ कोई एक÷दुई डोज लगाइल मने बुस्टर डोज नइलगैले हुइट । कोभिड १९ विरुद्धके अभियानमे सबजे साथ डेना चाही ।’

पेडियाट्रीक फाइजर खोप सम्बन्धी कार्यक्रममे कैलालीके १३ पालिकाके स्वास्थ्य शाखा प्रमुख, शिक्षा शाखा प्रमुखहुकनके सहभागिता रहल रहे ।

ओस्टेक करके करके अँट्वारके रोज धनगढीमे राष्ट्रिय स्वास्थ्य शिक्षा तथा सञ्चार केन्द्र काठमाडौंके आयोजना तथा तारकेश्वर मिडिया क्रियशन प्रालिके आयोजनामे हुइल कोभिड १९ विरुद्धके भ्याक्सिन प्रवद्र्धन तथा कोभिड १९ रोकथाम नियन्त्रण सम्बन्धी पत्रकार बीच अन्तरक्रिया कार्यक्रममे खोप कार्यक्रम बारे जानकारी डेहल रहे । सुदूरपश्चिम प्रदेशके तीन जिल्लामे पाँचसे ११ बरस उमेरके बालबालिकाहे कोरोना विरुद्धके फाइजर बायोएनटेक खोप डेना जनागिल रहे ।

पहिल चरणमे सुदूरपश्चिम प्रदेशके कैलाली, कञ्चनपुर ओ डडेल्धुरा तीन जिल्ला सहित देशभरके २७ जिल्लाके १९ लाख बालबालिकाहे इहे असार ९ गतेसे १५ असारसम पहिल मात्रा खोप डेजैना सुदूरपश्चिम प्रदेश सामाजिक विकास मन्त्रालयके वरिष्ठ जनस्वास्थ्य शिक्षा शाखा अधिकृत हेमराज खड्का जानकारी डेलै ।

उहाँ पहिल चरणमे पहिल डोज खोप लेहलहे सावन २ गतेसे ८ गतेसम डुसरा डोज डेना जनैलै । ओस्टके, डुसरा चरणमे ५० जिल्लामे भदौ ५ से ११ गतेसम पहिल डोज सञ्चालन हुइना बा कलेसे भदौ २७ गतेसे कुँवार १ सम डुसरा डोज डेजैना जनाइल बा ।

पहिल चरणमे ५ से ११ बरस उमेर समूहके बालबालिकाहे पहिल चरणमे प्रदेश नं १ के झापा, मोरङ, सुनसरी, मधेश प्रदेशका सप्तरी, धनुषा, पर्सा, सिरहा ओ महोत्तरी, बागमती प्रदेशके काठमाडौं, ललितपुर, भक्तपुर, चितवन, काभ्रे ओ सिन्धुली जिल्लामे खोप अभियान चलाजैना बा । ओस्टके, लुम्बिनी प्रदेशके पश्चिम नवलपरासी, रुपन्देही, बाँके, दाङ, कपिलवस्तु ओ बर्दिया, कर्णाली प्रदेशके सुर्खेत तथा सुदूरपश्चिम प्रदेशके कैलाली, कञ्चनपुर ओ डडेलल्धुरामे खोप कार्यक्रम सञ्चालन कैना जनाइल बा ।

परिवार कल्याण महाशाखाके अनुसार पाँचसे १२ बरस टरेक ३९ लाख बालबालिकाहे फाइजर खोप लगैना जनैले बा । इ खोप बालबालिकाहे ०.२ एमएलके दरसे दुई डोज लगाजैना बा । फाइजर खोपके पूर्ण रूपमे कायम कैना अल्ट्रा कोल्डचेन (माइनस ४४ से माइनस ८० डिग्री सेल्सियस) तापक्रममे भण्डारण करे पर्ना रहठ् । फाइजरहे माइनस १५ से माइनस २५ डिग्री सेल्सियसमे ३१ दिनसम किल भण्डारण करे सेकजाइठ् ।

खोपके लाग देशभरके विद्यालयमे खोप केन्द्र तोकके खोप कार्यक्रम सञ्चालन हुइना जनाइल बा । इहे बीच कोभ्याक्स सुविधामार्फत अमेरिकी सरकारके सहयोगमे पहिल चरणमे २२ लाख ३ हजार २ सय मात्रामे फाइजर खोप अँट्वारके नेपाल आसेकल बा । फाइजर बायोएनटेक खोपके प्रभावकारिता ९१ प्रतिशत रहल अध्ययनसे डेखैले बा । ओस्टके इ खोपहे विश्व स्वास्थ्य संगठनसे आपतकालिन प्रयोगके लाग सुचिकृत फेन करले बा ।

एकदमे सुरक्षित रहल इ खोपहे नेपालमे प्रयोग करक लाग औषधी व्यवस्था विकागसे अनुमति फेन प्रदान करले बा । मने इ खोप ५ बरससे कम ओ १२ बरससे उप्परके व्यक्ति नै लगाइ मिल्ना जनाइल बा । ओस्टके पहिल मात्रा लगाइलपाछे कौनो फेन गम्भीर मेरके एलर्जी तथा प्रतिक्रिया, इम्यूनग्लोवलीन, मोनाक्लोनल ओ कोन्भालीसेन्ट प्लाज्मा उपचारमे रहल व्यक्ति इ खोप लेहे नैमिल्ना जनाइल बा । मने इ मेरके उपचार लेहल ९० दिनमे इ खोप लगाइ सेक्ना जनाइल बा । ओस्टके कोभिड १९ संक्रमित रहल अवस्थामे इ खोप नैलगाइ मिल्ना मने चोखोइल ३० दिनपाछे खोप लगाइ सेक्ना स्वास्थ्यकर्मीहुक्रे बटैले बटै ।

नेपालमे कोभिड १९ विरुद्धके पूर्ण मात्रा खोप लगाइल संख्या १ करोड ९७ लाख ४८ हजार ३४२, पूर्ण मात्रा खोप लगैना बाँकी संख्या ३५ लाख ९९ हजार २३०, बुस्टर मात्रा खोप लगाइल संख्या ३७ लाख ६५ हजार ५९४ ओ बुस्टर मात्रा खोप लगैना बाँकी संख्या १ करोड ५९ लाख ८२ हजार ७४८ जाने रहल बटै ।