पुनरोत्थान परियोजनाके गाउँपालिका स्तरीय सल्लाहकार समितिके बैठक

पहुरा समाचारदाता
हसुलिया, ५ असार । कोभिड–१९ से प्रभावित समुदायके लाग पुनोरुत्थान परियोजना (रिकोभर) अन्तरगत गाउँपालिका स्तरीय परियोजना सल्लाहकार समितिके समिक्षा, बैठक तथा अनुगमन कार्यक्रम करल बा ।

लुथरन वल्र्ड रिलिफके सहयोग तथा ब्याकवार्ड सोसाईटी (वेस)के सहकार्यमे सञ्चालित परियोजना कैलाली गाउँपालिकाका ४ वडामे सञ्चालन करल रहे । कार्यक्रमके बारेमे जानकारी डेटी परियोजनाके संयोजक लक्ष्मण चौधरी स्वास्थ्य सवलीकरण ओ कोरोनासे प्रभावित समुदायके लाग जीविकोपार्ज कार्यक्रम सञ्चालन कैना परियोजनाके उद्देश्य रहल बटैलै ।

स्वास्थ्य संस्था सवलीकरण कार्यक्रम अन्तरगत त्रिनगर हेल्थ डेस्कमे प्रिफयाक भवन सहित आवश्यक उपकरण प्रदान करल, कैलारी–४ मे आप्रवासीहुकनके लाग हेल्प डेस्क स्थापना करल बटैलै । ओस्टेक करके कैलारी गाउँपालिका अन्तरगतके बर्थिङ सेन्टर तथा स्वास्थ्य चौकीमे कार्डिक मोनिटर, प्रिलाईट, वेवि वईटिङ मेसिन, टु–इन वन वइटिङ स्केल, डिजिटल थर्मामिटर, डेलिभरी सेट, इलेक्ट्रिक जग, फुट स्टेप, ड्रम लार्ज, डेलिभरी सेट, हिटर, आइएलआर रेफ्रि जेरेटर प्रदान करल परियोजना इन्चार्ज चौधरी बटैलै ।

१० महिना (अक्टोबर २०२१ से जुन २०२२ ) सम सञ्चालन हुइल परियोजनाके उद्देश्य कोभिड १९ जैसिन महमारी तथा भविष्यमे आई सेक्ना महामारीसे बच्न स्वास्थ्य संस्थाहे मजबुत बनैना ओ प्रभावित समुदायके जीविकोपार्जनमे सहयोग पुगैना रहल बटैलै । परियोजना अन्तरगत कैलारीके २ सय ७४ जाने कृषकहे सात प्रकारके कृषि वीउ विजन, भिटामिन, किटनाशक औषधि तथा फुल लगैना औषधी हजारी ओ स्प्रे टयांकी वितरण करल उहाँ बटैलै ।

ओस्टेक करके २ सय जाने अति विपन्न परिवारके स्वास्थ्य बीमा करल, ३६ जाने सुनौलो हजार दिनके डाईहुकनके पोषण वितरण करल बा । संयोजक चौधरीके अनुसार रिकोभर परियोजना सञ्चालन पाछे ५० जाने आप्रवासीहुकनहे ९ सय ३० ठो छेगरी, ८ ठो बंगुर १ जनहनहे प्लम्बर तालिम, ३ जनहनहे इलेक्ट्रिक मोटर, ३४ लिटर डिजेल सहयोग, किराना पसल सञ्चालन, ४ जनहनहे फाष्टफुड व्यवसाय सञ्चालन कैना सहयोग तथा १ जनहनहे चिङगनी सहयोग करल जनाइल बा । कैलारी गाउँपालिका– १, २, ४ ओ ७ नम्बर वडाके ३ सय घरधुरीमे पुनरोउत्थान कार्यक्रम सञ्चालन करल उहाँ बटैलै ।

कार्यक्रममे कैलारी–७ के वडा अध्यक्ष दिपेन्द्र बम परियोजना मजा हुइलेसेफे छोट समय केल सञ्चालन हुइल कहटी थप योजना नन्ना आग्रह करलै । नागरिकके जीवनस्तर उकस्न कार्यक्रम नन्लेसे अपन वडा सहजीकरण कैना तयार रहल उहाँ बटैलै ।

ओस्टेक करके वडा नम्बर–४ के वडा अध्यक्ष ठागुराम चौधरी सुत्केरी महिलाहे प्रथमिकता डेना करके थप कार्यक्रम सञ्चालन कैना आयोजकसंग आग्रह करलै । ‘रिकोभर परियोजना यहाँके आवश्यकता अनुसार सञ्चालन हुइल बा,’ उहाँ कहलै, ‘और संस्था जैसिन सामान डेके पैसा सेक्नासेफे नागरिक ओ स्वास्थ्य संस्थाके आवश्यकता अनुसार यी कार्यक्रम सञ्चालन हुके सहयोग ढेर प्रभावकारी डेखल बा ।’

कैलाली गाउँपालिकाके अध्यक्ष राजसमझ चौधरी कोरोना संक्रमणमे परके समस्यामे परल नागरिकहे सहयोग करल कहटी परियोजनाहे धन्यवाद डेलै । ‘वडाके स्वास्थ्य संस्थामेफे आवश्यकता अनुसार स्वास्थ्य सामाग्री प्रदान करले बा, उहीसे सामाग्रीके सहि प्रयोग हुइल बा,’ उहाँ कहलै, ‘जीविकोपार्जन ओरसे लक्षित परिवारहे यी परियोजनासे मजा सहयोग करले बा । , फेर यैसिन कार्यक्रम नानके सहयोग कैना आग्रह करटु ।’

बैठक पाछे गाउँपालिकाके उपाध्यक्ष भगवतीकुमारी चौधरी, वडा अध्यक्ष सहितके टोली परियोजनासे सहयोग करल स्वास्थ्य संस्था तथा जीविको पार्जन अन्तरगत तरकारी खेती ओ व्यवसायके अनुगमन करल रहिट । कार्यक्रममे कैलारी गाउँपालिकाके सामाजिक विकास अधिकृत यगम कलेल सहजीकरण करले रहिट । परियोजना धनगढी उप महानगरपालिकाके शहरी स्वास्थ्य संस्थामे आवश्यकता अनुसार स्वास्थ्य सामाग्री प्रदान करल रहे कलेसे, कोरोनासे प्रभावित नागरिकके जीविकोपार्जनमे सहयोग करल रहे ।