निजी स्रोत शिक्षकसे गापा शिक्षक नामाकरणके माग
पहुरा समाचारदाता
हसुलिया, ६ असार । सामुदायिक विद्यालयमे कार्यरत निजीस्रोत शिक्षकहुक्रे अपनेहुकनहे गाउँपालिका शिक्षक नामाकरणके माग करले बटै ।
सोम्मारके रोज कैलारी गाउँपालिका अध्यक्ष राजसमझ चौधरीहे ज्ञापनपत्र बुझैटी गाउँपालिका अन्तर्गत रहल सामुदायिक विद्यालयमे कार्यरत निजीस्रोत शिक्षकहुकनके मागहे हलहाली सम्बोधन कैना आग्रह करल हो ।
निजिस्रोत शिक्षक संघर्ष समितिके कैलारीके अध्यक्ष फुलराम चौधरी ओ नेपाल शिक्षक संघ कैलारीके अध्यक्ष मदन प्रसाद पौडेल गाउँपालिका अध्यक्ष राजसमझ चौधरीहे ६ बुँदे ज्ञापनपत्र बुझैटी सामुदायिक विद्यालयमे कार्यरत निजीस्रोत शिक्षकहुक्रे अपनेहुकनहे गाउँपालिका शिक्षकमे नामाकरणके माग करल रहिट ।
ज्ञापनपत्रमे हालसम निजीस्रोत शिक्षकके रुपमे नियूक्त हुइल शिक्षकहुकनहे गाउँपालिका शिक्षकके रुपमे नामाकरण करके तलब, भत्ता, चाडपर्व खर्च ओ पोशक सहित अन्य सक्कु सुविधा स्थायी शिक्षक सरह डेना करके समर्थनपत्र व्यवस्था करे पर्ना माग करल बा ।
स्थानीय थारु भाषा शिक्षकके रुपमे कार्यरत रहल शिक्षकहे गाउँपालिकाके २०७८ कार्यविधि अनुसार निरन्तरता डेके थप सेवा सुविधा (तलब, भत्ता, चाडपर्व खर्च ओ पोशक)के व्यवस्था करे पर्ना ज्ञापनपत्रमे उल्लेख करल बा ।
गाउँपालिका शिक्षकके रुपमे कार्यरत शिक्षकहुकनहे उमेरके हदबन्दी नइलग्ना व्यवस्था करे पर्ना, एकमुष्ट अनुदानमे परल विद्यालयमे तलब स्केलमे नेपाल सरकारके नियम अनुसार एकरुपता कायम करके कार्यालय सहयोगी, बाल विकास सहजकर्ताहुकनके तलब भत्ता संघीय सरकारसे डेना व्यवस्था मिलाई पर्ना माग करल करल बा ।
ओस्टेक करके राहत दरबन्दी रिक्त हुइल खण्डमे सामुदायिक विद्यालयमे कार्यरत निजीस्रोत शिक्षकहुकनहे पहिल प्रथामिकता धारके विशेष ग्राहयता डेहे पर्ना, शैक्षिक अध्यापन अनुमति पत्र नइरहल खण्डमे कार्य अनुभवहे आधार मानके संस्थागत स्थायी करे पर्नाफे निजिस्रोत शिक्षक संघर्ष समिति माग करले बा ।
ज्ञापनपत्र बुझटी गाउँपालिका अध्यक्ष राजसमझ चौधरी स्थानीय स्तरसे समाधन हुइना माग सकभर सम्बोधन कैना बटैले बटै ।
