भूमि आयोगके टोली ओ गाउँपालिकाविच छलफल
पहुरा समाचारदाता
हसुलिया, ७ असार । राष्ट्रिय भूमि आयोगके टोली ओ कैलारी गाउँपालिकाके सक्कु टिम विच छलफल हुइल बा ।
भुमिहीन दलित, भूमिहिन सुकुम्बासी, अव्यवस्थित वसोवासी, वाढपीडित, मुक्तकमैयाहुकनके जग्गा सम्बन्धी समस्या समाधानके लाग अयोगके टोली ओ गाउँपालिकाके अध्यक्ष, उपाध्यक्ष, प्रमुख प्रशासकीय अधिकृत, भुमि शाखा प्रमुख, सर्वेक्षक, अमिनहुकनविच छलफल हुइल गाउँपालिका प्रवक्ता तथा वडा नम्बर ७ के वडा अध्यक्ष दिपेन्द्र बहादुर बम बटैलै ।
गाउँपालिका अध्यक्ष राजसमझ चौधरी, उपाध्यक्ष भगवतीकुमारी चौधरीलगायत गाउँपालिकाके सक्कु टिम ओ राष्ट्रिय भूमि आयोगके जिल्ला अध्यक्ष यज्ञराज उपाध्याय, नापी शाखा प्रमुख सुदर्शन सिंह धामी, राष्ट्रिय भूमि आयोग जिल्ला विज्ञ सदस्य केशव जोशी लगायतविच सुकुम्बासी समस्या समधान ओ ऐनाली प्रतिजग्गाके लालपूर्जा वितरणबारे छलफल हुइल बा ।
छलफल कार्यक्रममे पकेट क्षेत्र (हौसलपुर, विपतपुर) मे हाली लालपुर्जा डेना और क्षेत्रमे यिहे बरषभिटरे लालपूर्जा वितरण कैना आयोगके अध्यक्ष यज्ञराज उपाध्याय बटैले बटै । आयोगके अध्यक्ष उपाध्याय कहलै, –‘कैलारीमे भुमिहीन दलित, भूमिहिन सुकुम्बासी, अव्यवस्थित वसोवासी, वाढपीडित, मुक्तकमैयाहुकनहे यिहे बरषभिटरे लालपुर्जा वितरण कैजाई । ओकर लाग गाउँपालिकासे बजेट विनियोजन कैडेहे परल ।’
गाउँपालिका अध्यक्ष राजसमझ चौधरी भुमिहीन दलित, सुकुम्बासी, अव्यवस्थित वसोवासी, वाढपीडित, मुक्तकमैयाहुकनके समस्या समाधान कैना गाउँपालिका प्रतिवद्ध रहल बटैलै । आयोगके काम सहजुल बनाइक लाग कार्यपालिकासे समन्वय करके बजेट विनियोजन कैना उहाँ बटैलै ।
भुइयाँफाटाके ४६ कित्ता, विपतपुरके १३ कित्ता, ओमनगर बस्तीबारेफे छलफल हुइल ओ कर्मचारीहुकनके हाली काम कैना निर्देशन डेहल प्रवक्ता बम बटैलै । बर्षाक बेला हुइलक ओरसे वडा नम्बर ७ मे असारमसान्तभिटर नापजोखके काम सेके पर्ना कर्मचारीहुकन निर्देश करल उहाँ जनैलै ।
कैलारी गाउँपालिकामे लालपूर्जा वितरण वडा नम्बर ७ से सुरु कैना बाट हुइल प्रवक्ता बम बटैलै । उहाँ कहलै, –‘सुकुम्बासी भुमिहिन किसानहे लालपुर्जा वितरणके लाग कैलारी गाउँपालिका–७ हौसलपुरसे डेढ हप्ता आघे भुमिसुधार कर्मचारी, अमिन, प्राविधिक टोली खटके सेन्टर पोइन्ट रख्ना काम सुरु हुसेकल बा । अब्बेसम विपतपुर, रामपुरमे सेन्टर पोइन्ट रख्ना काम ओराइल बा । आज भुँइयाफाँटामे हुइटी बा ।’ यहाँके काम नइओराइटसम उ टोली गाउँपालिकाके टमानमे वडा काम कैना प्रवक्त बम बटैलै ।
