धनगढी उपमहानगरसे नीति तथा कार्यक्रम प्रस्तुत

– यिहे बसर पटेलाके थारू संग्रहालय सञ्चालन तथा रानाथारू संग्रहालयके निर्माण हुइना
– गर्भवती, सुत्केरी, जेष्ठ नागरिकके लाग पालिका भित्तर निःशुल्क एम्बुलेन्स सेवा

पहुरा समाचारदाता
धनगढी, ८ असार । धनगढी उपमहानगरपालिका मंगरके रोज आर्थिक वर्ष २०७९/०८० के नीति तथा कार्यक्रम प्रस्तुत करले बा । नगरसभाके आठौं अधिवेशनमे कार्यपालिका सदस्यहुकन सामु नगरप्रमुख गोपाल हमाल नगरके कार्यक्रम तर्जुमा ओ प्राथकिताके आधारमे नीति तथा कार्यक्रम प्रस्तुत करल हुइटैं ।

सभामे नगरप्रमुख हमालसे प्रस्तुत करल नीति तथा कार्यक्रममे नगरके एकीकृत, सन्तुलित, दीयो ओ योजनावद्ध विकासके लाग मध्यकालीन खर्च संरचना, लैंगिक उत्तरदायित्व बजेट ओ दीगो विकासके लक्ष्य स्थानीयकरणसहितके पहिल पञ्च वर्षीय आवधिक योजना (२०७९/०८०–२०८३/०८४) तर्जुमा कैके नानल उल्लेख करल बा ।

नगरप्रमुख हमाल अपन कार्यक्रमहे ‘हाम्रो धनगढी हामी बनाउँछौं’ (हमार धनगढी हम्रे बनाब) महाभियानके रूपमे लेहल बटैलैं । ओस्टेके, आधारभूत स्वस्थ्य ओ शिक्षामे विभेदरहित पहुँच, नगर विज्ञ समूह, नगर विद्युतीय सुशासन गुरुयोजना, स्वच्छ, स्वस्थ ओ रहित नगरके रूपमे विकास अरटि अगामी आर्थिक वर्षहे ‘सरसफाई वर्ष’के रूपमे मनैना बटैलैं ।

आर्थिक विकास क्षेत्रओर

धनगढी उपमहानगरपालिका उन्नत विउविजन ओ आधुनिक कृषि प्रविधिके उच्चतम प्रयोगसे कृषि प्रणाली तथा पशुपंक्षी व्यवसाय प्रवद्र्धन कैके उत्पादन ओ उत्पादकत्वमे अभिबृद्धि करना, सहकारीहे व्यवस्थित करटि औद्योगिक विकास मार्फत नगरके सामाजिक–आर्थिक रूपान्तरण कैके आत्म निर्भर, दीगो, स्वतन्त्र, उन्नतशील ओ फराकिलो अर्थतन्त्र निर्माण करना ओ पर्यटन प्रवद्र्धनके माध्यमसे आर्थिक समृद्धि हासिल करना नीतिहे नगरके मूल आर्थिक विकास नीतिके रूपमे लेले बा ।

कृषि तथा खाद्य विकासके लाग कृषि क्षेत्रके उल्लेख्य योगदानके लाग ‘एकीकृत कृषि रणनीति’ तयार पारके लागू करल नगरप्रमुख हमाल जानकरी करैलैं । आर्थिक नीति अन्तर्गत मुक्तकमैया, एकल महिला तथा दलित, अल्पसंख्यक सीमान्तकृत लगायतके जीवनस्तर सुधारके लाग मागके आधारमे आयआर्जनके कार्यक्रम छनौट कैके कार्यक्रम सञ्चालन करना अनुदान तथा समन्वयके व्यवस्था करल बा । ओस्टेके, रैनाथे विउ ओ बाली संरक्षणके लाग रैथाने जातके पहिचान कैके सूचीकृत करना कार्यहे प्रोत्साहन करना कार्यनीति नन्ले बा ।

नीति तथा कार्यक्रममे कृषि उत्पादन वृद्धिके लाग कृषकहे उन्नत प्रविधिसम्बन्धी तालिम प्रदान करना, बेमौसमी तरकारी खेती कार्यक्रममे जोड, कृषि बीमा कार्यक्रमहे प्रवद्र्धन करना, जैविक खेतीहे प्रात्साहन करना केच्ना (गढ्यौला) मल, जैविक मल उत्पादन र प्रयोग करना प्रोत्साहन करनाके साथे कृषि उत्पादनमे प्रांगारिक मलके प्रयोग कैके उत्पादन करना कार्यहे बढावा डेहल बा । ओस्टेके, युवाहुकनहे कृषि व्यवसायओर आकर्षित करटि स्वरोजगारी सिर्जना करना युवा लक्षित कृषि कार्यक्रम सञ्चालन करना हुइल बा ।

धनगढीहे आगामी २ वर्षभित्रे फूलामे आत्मनिर्भर बनाइक लाग पुष्पखेतीके साथे फलफूल, मुगदाल, तरकारी व्यवसायिक उत्पादन कार्यक्रम सञ्चालन करजैना बा । अस्टेके, रासायनिक मल विक्रीके व्यवस्थापनके लाग कृषि सहकारीहे नियुक्त कैके रासायनिक मलके समुचित वितरणके व्यवस्था मिलैना हुइल बा ।

ओस्टेके, सामुदायिक चौपाया चौपायाके व्यवस्थापन साझेदारी निकायके सहकार्यमे ग्रामीण क्षेत्रमे विपन्नताके आधारमे दलित, महिला, जनजाति, एकल महिला, अपांगता रहल तथा विपन्न वर्गहे आयआर्जनके लाग पशुसेवामे आयमूलक कार्यक्रम संचालन करना कार्यक्रममे नन्ले बा । पशुपंक्षी बीमा कार्यक्रमहे प्रभावकारी रूपमे कार्यान्वयन करटि पशुपंक्षीजन्य पदार्थ उत्पादन तथा उत्पादकत्व वृद्धि करेक लाग पशु नश्लसुधार कार्यक्रम धनगढी उपमहानगरपालिका नन्ले बा ।

धनगढी उपमहानगरपालिकामे पर्यटन विकासके लाग होमस्टे प्रोत्साहन करना नीति नानल बा । धनगढी–१६ स्थित भादा होमस्टेहे थप प्रवद्र्धन कैके आन्तरिक तथा वाह्य पर्यटकहुकनके आकर्षक गन्त्व्यके रूपमे विकास करना, जुगेडा गाउँहे रानाथारू होमस्टेके रूपमे विकास करना नीति लेहल बा । होमस्टे सञ्चालनके लाग स्थानीय वासिन्दाहे परम्परागत खानपिन, रहनशैली, संस्कृति, पर्यटन सूचना ओ मौलिकता प्रवद्र्धन जैसिन पर्यटकीय कार्यक्रमबारे अभिमुखीकरण तालिक सञ्चालन करना कार्यक्रम आइल बा ।

ओस्टेके, यिहे आर्थिक वर्षमे रानाथारू संग्रहालयके निर्माणसँगे वडा ७ पटेलास्थित थारू संग्रहालयहे सञ्चालन करना कार्यक्रम आइल बा । वडा नम्बर ३ के सामुदायिक वनक्षेत्रसे लेके शिवपुरीधाम, जाखोर ताल हुइटि बेहडाबाबासम टमान मठमन्दिर जोरटि सांस्कृतिक तथा पर्यटकीय साइकल ट्रयाक निर्माणहे निरन्तरता डेटि बहेडाबाबा, शिवपुरीधाम, बेलापुरी धाम, जाखोर ताल, नेतुवा ताल, चौफेरी ताललगायतहे पर्यटकीय क्षेत्रके रूपमे विकास करटि लैजिना कार्यक्रम बा ।

उद्योग, वाणिज्य तथा रोजगारके प्रवद्र्धनके लाग धनगढी सिटी हल, फूलवारी कोल्ड स्टोर, जडीबुटी प्रशोधन केन्द्र, कनरी पार्क, चिल्ड्रेन पार्कजैसिन रणनीतिक संरचनाहे सार्वजनिक, निजी साझेदारी अवधारणा अनुसार संचालन करना, उद्यमीहे स्थानीयस्तरमे दर्ता कैके संचालन करना कानून निर्माण कैके कार्यान्वयन करना नीति लेहल बा । ओस्टेके, वैदेशिक रोजगारसे फिर्ता आइल श्रमिकहुकनके सीप पहिचान कैके स्वरोजगारमूलक कार्यमे संलग्न करना पहल करना बा ।

सामाजिक विकास तथा समाज कल्याणओर

सक्कु नगरवासीके आधारभूत स्वास्थ्य ओ शिक्षामे सरल, सहज एवं गुणस्तरीय पहुँच स्थापित करेक लाग सार्वजनिक, निजी, राष्ट्रिय तथा अन्तर्राष्ट्रिय संघ÷संस्थासँग समन्वय, सहकार्य ओ साझेदारी करटि धनगढीहे ‘स्वस्थ नगरः शिक्षित नगर’के रूपमे विकास करना, लैंगिक सिंहमे परल अतिविपन्न, असहाय महिला, गर्भवती महिला, सुत्केरी, एकल महिला, बालबालिका, किशोरकिशोरी, जेष्ठ नागरिक, अपांगता रहल व्यक्ति तथा सामाजिक रूपसे वञ्चितीकरण, बहिस्करणमे परलहे सहायता, संरक्षण, उद्धार कैके मूल प्रवाहिकरण करना नीति नगरके मुख्य सामाजिक विकास नीतिके रूपमे रहल बा ।

शिक्षा, युवा तथा खेलकुद विकासके लाग आगामी वर्षसे राष्ट्रिय स्तरके म्याराथन प्रतियोगिता सञ्चालन करना हुइल बा । ओस्टेके, सामुदायिक विद्यालयके गुणस्तरमे सुधार कैके निजी शैक्षिक संस्था विद्यार्थीहुकनसे उठैटि आइल शुल्कमे वस्तुगत मापदण्ड तोक्ना, कुल संस्कारसे जोगाइक लाग विद्यालय, स्वास्थ्य संस्था परिसर लग्गे मादक पदार्थ, चुरोट तथा सूर्तीजन्य पदार्थके विक्री वितरणमे रोक लगैटि विद्यालय पोशाकमे रहल विद्यार्थीहुकनहे ओइसिन पदार्थ विक्री वितरणमे रोग कलैना नीति धनगढी उपमहानगरपालिका नन्ले बा । ओस्टेके, आधारभूत तहके सक्कु विद्यालयहे सिकाईहे डिजिटाइज्ड करेक लाग प्रति विद्यालय एक प्रोजेक्टर उपलब्ध कराजैना नीति बा ।

आमाको माया छात्रावासमे बसोबास करुइया छात्राछात्र, पशुपति शिक्षा मन्दिरमे अध्ययनरत विद्यार्थी, सडक बालबालिकाके शिक्षामे काम करना संस्थाहे सहयोगके लाग अनुदान उपलब्ध करैना, आधारभूत तहमे अध्ययनरत मुक्त कम्लहरी, अपांगता रहल विद्यार्थी, दलित, अन्य लक्षित समूहके विद्यार्थीहुकनके अध्ययनमे गैरआवासिय छात्रवृत्ति उपलब्ध करैना व्यवस्था मिलैना नीति तथा कार्यक्रम बा ।

धनगढी नगरमे जनस्वास्थ्य सुधारके लाग सक्कु वडामे मासिक रूपमे ‘विशेषज्ञ वडा स्वास्थ्य क्लिनिक’ संचालन कैके ‘डाक्टर टु होम’ कार्यक्रममार्फत विशेषज्ञ सेवाहे नागरिकके घरदैलोमे पुगैना नीति नानल बा । आधारभूत स्वास्थ्य सेवाहे थप प्रभावकारी तथा गुणस्तरीय बनाइक लाग आवश्यक परना भौतिक पूर्वाधार, औषधि, उपकरणलगायत अन्य स्रोतधानके व्यवस्था करना नीति बा । ओस्टेके, नगरक्षेत्रहे शतप्रतिशत संस्थागत सुत्केरी सुनिश्चितताके लाग ‘नो मोर होम डेलिभरी’ कार्यक्रम, शारीरिक मासिक र संवेगात्मक स्वास्थ्य प्रवद्र्धनके लाग प्रत्येक वडाके सार्वजनिक स्थलमे ‘नगरयोग ध्यान कार्यक्रम’ सञ्चालन करना कार्यक्रम आइल बा ।

‘एक वडा एक एम्बुलेन्स’ कार्यक्रम अन्तर्गत एम्बुलेन्स सेवाहे थप प्रभावकारी बनैनाके साथे गर्भवती, सुत्केरी, जेष्ठ नागरिकके लागल पालिका भित्तर निःशुल्क एम्बुलेन्स सेवा प्रदना करना नीति धनगढी उपमहानगरपालिका लेले बा । ओस्टेके, लागू पदार्थ दुव्र्यसन न्यूनीकरणके लाग समुदायस्तरमे जनचेतनामूलक कार्यक्रम सञ्चालन करना नार्काेन नेपाल लगायत दुव्र्यसनके क्षेत्रमे कार्य करना सरकारी तथा गैरसरकारी संघ संस्थासँग सहकार्य करना, बृहत पोषण प्याकेज कार्यक्रममार्फत धनगढीहे सुपोषित पालिका बनैना, जेष्ठ नागरिक, महिला, बालबालिका, किशोरकिशोरी, अपांगता रहल व्यक्तिहुकनके लाग लोककल्याण नीति लेहल बा ।

धनगढी उपमहानगरपालिका क्षेत्र भिटर संचालन हुइटी रहल कोभिड स्वाब संकलन केन्द्रहे हेल्थ हवके रुपमे विकास करके निःशुल्क रुपमे क्षयरोगके लाग खखार परिक्षण, औलो परिक्षण, सुगर जाँच, मुगौला बचाऔं अन्र्तगत पिसावमे प्रोटिन जाँच, रक्तजाँच, सिकलसेल परिक्षण जैसिन सेवा विस्तार कैना कहल बा । साथे वेली स्वास्थ्य केन्द्रमे रहल अक्सिजन प्लान्टहे संचालनमे नन्नाफे नितिमे उल्लेख करल बा ।

कला, भाषा, साहित्य, संस्कृति प्रवद्र्धनके करेक लाग नगरके इतिहास, कला, साहित्य, भाषा, संस्कृति, मौलिक परम्पराके क्षेत्रमे खोज तथा अन्वेषण करना कार्यमे प्रत्येक्ष योगदान पुगाइल संघसंस्था, संचारकर्मी, प्रवुद्ध वर्गहे नगरपालिका उचित सम्मान करना नीति अवलम्बन करले बा । नगर विकास एवं गौरवके लाग योगदान पुगाइ व्यक्ति÷संघसंस्थाहे ‘नगर रत्न’से विभूषित करना नीति नन्ले बा ।

थारू तथा रानाथारू समुदायके प्रचलनमे रहल भलमन्सा, बरघर, गुरुवा, भुइया, देउथान लगायत संस्कृतिके उचित संरक्षण एवं प्रवद्र्धन करनाके साथे आर्थिक वर्ष २०७५/०७६ से सुरु हुइल किशोर बम विकास पत्रकारिता पुरस्कारहे निरन्तरता डेना नीति लेले बा । ओस्टेके, नगर सरसफाइ तथा सौन्दर्यता अभिबृद्धिके लाग उद्योग, वाणिज्य संघ, होटल व्यवसायी, टमान वस्तुगत व्यवसायी संघसँगके सहकार्यमे ‘एक पसल एक डस्टविन’ ढरना व्यवस्थाहे अनिर्वाय करल बा ।

शहरी विकास, भूउपयोग तथा पूर्वाधार विकासओर

‘हमार धनगढी हम्रे बनाब’ कना अभियानके साथ सक्कु धनगढीवासीहे समेटके यी पालिकाहे भौतिक पूर्वाधारके हिसाबले दीगो, सुरक्षित, सहिष्णु, व्यवस्थित ओ समुन्नत नगरीके रूपमे विकास करना नीति लेहल बा । यकर लाग क्रमागत योजनाहे प्रगम प्राथमिकतामे ढैके कार्यान्वयनमे लैजिना नीति बा । यी नीतिमे नगर क्षेत्रभित्तरके सडक लगायत पूर्वाधारके नियमित रूपमे मर्मत सम्भार तथा स्तरोन्नतिके लाग मर्मत सम्भार इकाइके गठन कैके पूर्वाधार एम्बुलेन्स सञ्चालन करना बा ।

ओस्टेके, राष्ट्रपति शैक्षिक सुधार कार्यक्रम अन्तर्गत अधुरा रहल विदायके भवन निर्माण कार्य करेक लाग आवश्यक रकमके व्यवस्थापन, नगर गौरवके आयोजनाके रूपमे रहल फाप्ला क्रिकेट स्टेडियम निर्माण करना आवश्यक सहयोग तथा नेपाल सरकार ओ प्रदेश सरकारसँग समन्वय करना नीति बनल बा । नगर स्वच्छता ओ जनस्वास्थ्यहे ध्यान डेके विद्युतीय सवारी साधनके प्रयोगहे प्रोत्साहन करना नीति बा ।

वस्ती विकासके लाग भूमिहिन दलित, सुकुम्वासी ओ अव्यवस्थित बसोबासके लगत संकलन हुइल जग्गाके नापनक्सा तथा प्रमाणीकरण गराके जग्गाधनी प्रमाण पुर्जा डेना कार्यहे निरन्तरता डेना, नगरपालिकाहे सूचना तथा सञ्चार प्रविधि विकासके नगरवासीहे पहुँच अभिबृद्धिके लाग नेटवर्क कनेक्टिभिटिहे थप व्यवस्थित करना कार्यनीति बनल बा ।

वन, वातावरण तथा विपद् व्यवस्थापनओर

स्वच्छ, स्वस्थ ओ हरित नगरके रूपमे स्थापित करके लाग सामुदायिक, निजी वन विकास एवं संरक्षण नीति नानल बा । नगरके वातावरण स्वच्छताके लाग वृक्षारोपण, प्लाष्टिक न्यूनीकरणके लाग वैकल्पिक व्यवस्थाके लाग अध्ययन, विकास निर्माणके कार्यहे विपद् व्यवस्थापनके सम्बोधन, नगरभित्तर आपनकालीन कार्यसञ्चालन केन्द्र ओ वारुण यन्त्रहे सुदृढीकरण, सक्कु वडामे अनिवार्य रूपमे विपद् व्यवस्थापन कोषके स्थापना, जलवायु परिवर्तन ओ विपद्से हुइना प्रभाव न्यूनीकरणके लाग सचेनता कार्यक्रम संचालन करना नीति नानल बा । ओस्टेके, सूर्तीजन्य पदार्थ, गुटखा ओ प्लाष्टिकजन्य खोल रहद मालवस्तु उत्पादन करना कम्पनीहे अनिवार्यरूपमे सामाजिक उत्तरदायित्व वहन करना लगैना नीति बा ।

संस्थागत सुशासन तथा जनशक्ति विकासओर

धनगढी उपमहानगरपालिकासे प्रवाह करना सार्वजनिक सेवाहे पारदर्शी, जवाफदेही, दीगो ओ परिणाममुखी बनैटि नगरवासीहे सूचना, सेवा ओ अवसरमे पहुँच अभिबृद्धि करना अधिकतम रूपमे विद्युतीय सूचना प्रणालीके नीति अवलम्बन करनाके साथे जनप्रतिनिधि ओ कर्मचारीहुकनके प्रभावकारी कार्यसम्पादनके लाग विषयगत ओ क्षेत्रगत क्षमताके विश्लेषणमार्फत संस्थागत सुशासन कायम करना नीति लेहल बा । नगरपालिकाके संगठन संरचनाहे आवश्यकता बमोजिम पनरोवलोकन कैके सक्कु तहके कर्मचारीके कार्यविवरण बनाके लागू करना, संस्थागत स्वमूल्यांकनके आधारमे मजा अभ्यासहे निरन्तरता डेना नीति नानल बा ।

धनगढी उपमहानगरपालिकाके न्याय निरुपण प्रणालीहे स्वतन्त्र, पारदर्शी, पहुँच योग्य, सक्षम एवं विश्वसनीय बनाके, न्यायिक कामकाजहे प्रविधिसँग आवद्ध कैके व्यवस्थित कैना, किशोरकिशोरीहे कानुनी प्रक्रियासम्बन्धी अभिमुखीकरण करना कार्यक्रम नन्ले बा । ओस्टेके, थारू, आदिवासी, एकल महिला, हिंसामे परल महिला, अपांगता रहल व्यत्ति, दलित, सीमान्तकृत समुदाय तथा वञ्चितीकरणमे परल वर्गहे न्यायमे पहुँच अभिवृद्धि करना टमान कार्यक्रम सञ्चालनमे नानल बा ।

राजस्व परिचालनके लाग राजस्व प्रक्रियाहे घर नम्बरिङ प्रणालीसँग आवद्धता करना प्रक्रिया सुरु करना, कर तथा गैरकर राजस्व अनुगमन कार्यहे कडाइके साथ अनुगमन करना नीति नानल बा । आगामी आर्थिक वर्षमे पेश्की/बेरुजुहे न्यूनीकरण करटि नगरपालिकाके चालू खर्चहे मितव्ययी बनैटि नगरके आन्तरिक सेतसे चालु खर्च पुग्ना नीतिके साथे पुँजीगत बजेटके भार अभिृवृद्धि करना नीति धनगढी उपमहानगरपालिका नन्ले बा ।

धनगढी उपमहानगरपालिकाके नीति तथा कार्यक्रम छलफल कार्यक्रममे उपप्रमुख कन्दकला राना, सक्कु वडाके जनप्रतिनिधिहुक्रे, प्रमुख प्रशासकीय प्रमुख रामलाल श्रेष्ठ, कर्मचारी, सरोकारवालाहुकनके सहभागिता रहल रहे । कार्यक्रममे नगरप्रमुख हमाल प्रस्तुत नीति तथा कार्यक्रम कार्यान्वयनमे सहयोग करेक लाग सरोकारवाला सबहे साझेदारी ओ सहकार्यके अपिल फेन रहले रहैं ।