लागू पदार्थसे समाजमे नकारात्मक प्रभाव
पहुरा समाचारदाता
धनगढी, ८ असार । सुदूरपश्चिम प्रदेशके सामाजिक विकास राज्यमन्त्री टेकबहादुर रैका समाजममे विद्यमान रहल विकृति, विसंगति न्यूनीकरणके लाग लागूऔषध प्रयोग रोकथाम तथा नियन्त्रण करेपरना बटैले बटैं ।
प्रादेशिक स्वास्थ्य प्रवर्द्धन केन्द्र कञ्चनपुरके आयोजनामे बुधके रोज धनगढीमे हुइल सूर्ती तथा मदिराजन्य पदार्थ रोकथाम तथा नियन्त्रणसम्बन्धी स्वास्थ्य प्रवर्द्धन कार्यक्रममे राज्यमन्त्री रैका सूर्ती तथा मदिरालगायत लागू पदार्थ समाजमे नकारात्मक प्रभाव परटिरहल बटैलैं । उहाँ लागू पदार्थ नियन्त्रणके लाग सुरुसे परिवारके सदस्यहे फेन लागू औषधके नकारात्मक प्रभावबारे जनचेतना तथा परामार्श डेना आवश्यक रहल बटैलैं ।
“समाजमे लागू पदार्थ नियन्त्रणके लाग प्रहरी, प्रशासन, नागरिक समाज, सरकारके जनप्रतिनिधिहुक्रे अपन अपन ठाउँसे सचेतनामूलक कार्यक्रम करना जरुरी बा,” राज्यमन्त्री रैका कलैं, “मदिरा नियन्त्रणके लाग बनल कानूनके पूर्ण कार्यान्वयनके लाग सबजे अपन दायित्व पूर्णरूपमे पालना करेपरल ।” उहाँ प्रदेश सरकार तथा अपनओरसे विद्यालय, मन्दिरलगायतके सार्वजनिक स्थानमे रहल मदिरा तथा सूर्तीजन्य पदार्थ विक्री वितरणके नियन्त्रणमे सहयोग ओ समन्वय करना प्रतिवद्धता व्यक्त करले रहैं ।
कार्यक्रममे सहायक प्रमुख जिल्ला अधिकारी यज्ञराज जोशी लागू औषध प्रयोगसे स्वास्थ्यके साथसाथे आर्थिक, सामाजिक, सांस्कृतिमे फेन नकारात्मक असर परना कना समाजमे चेतना जनाइ परनामे जोड डेलैं । उहाँ सूर्ती तथा मदिराके प्रयोगसे शरीरमे नैमजा असर किल करना कना सबजे जाने परना बाट रहल बटैलैं ।
उहाँ विद्यालयलगायतके सार्वजनिक स्थानमे मदिरा तथा सूर्तीजन्य विक्री वितरणके लाग कोइ पसल सञ्चालन रलेसे ओकर नियन्त्रणके लाग प्रशासन तुरुन्ते ‘एक्सन’ लेना प्रतिवद्धता व्यक्त करैं ।
ओस्टेके, कार्यक्रममे सेती प्रादेशिक अस्पतालके सामाजिक विकास इकाइ प्रमुख गौरीदत्त जोशी लागू पदार्थ नियन्त्रणके लाग जनचेतनामूलक कार्यक्रम गरेपरनामे जोड डेले रहैं । उहाँ लागू पदार्थ प्रयोगहे कम करेक लाग कम्तिमे फेन लागू पदार्थ प्रयोग करना व्यक्तिहुकनके लाग परामर्श कक्ष आवश्यक रहल बटैलैं ।
कार्यक्रममे विश्व स्वास्थ्य संगठन (डब्ल्युएचओ) प्रतिनिधि डा. प्रमोद भट्ट सूर्ती तथा मदिराजन्य पदार्थमे करेक लाग दर बह्राइ परना बटैलैं । उहाँ कलैं, “अन्य देशके तुलनामे नेपालमे सूर्ती तथा मदिराजन्य पदार्थके कर कम बा । टबेमारे फेन उहाँ लागू पदार्थ प्रयोगकर्ता बह्रल बटैं । उहाँ स्थानीय मदिराहे फेन नियन्त्रण करनामे जोर डेले रहैं ।
ओस्टेके, कार्यक्रममे प्रहरी उपरिक्षक अर्जुन राना भाट सूर्ती तथा मदिराजन्य पदार्थ सेवनसे समाजमे विकराल समस्या सिर्जना करल बटैलैं । स्थानीय मदिरा उत्पादनमे अखाद्यवस्तुके किल प्रयोग हुइना हुइलओरसे डारुजाँर पिलेसे शरीरके स्वास्थ्यमे हानी किल करना जिकिर करलैं । उहाँ मदिरा टमान समाजके संस्कृति ओ रोजगारीसँग फेन जोरल ओरसे नियन्त्रण करनामे कठिनाइ परल बटैलैं । उहाँ अइसिन लागू पदार्थ नियन्त्रणके लाग प्रहरी प्रशासनसे टमान जनचेतनामूलक कार्यक्रम सञ्चालन करटिरहल फेन जानकारी करैलैं ।
कार्यक्रममे डा. जगदिश जोशी, दयाकृष्ण पन्त, पत्रकार भीम चौधरी, गगन अयडी, वसन्ती सापकोटा, सञ्जु शाहीलगायत मन्तव्य व्यक्त करले रहैं ।
कार्यक्रम प्रादेशिक स्वास्थ्य प्रवर्द्धन केन्द्रके प्रमुख हेमराज खडकाके अध्यक्षतामे हुइल रहे । कार्यक्रमके सञ्चालन केन्द्रके सुरेन्द्र शाही करले रहैं ।
