आंचारसहिता पहिले तुलनामे अब्बे पूर्ण रुपमे कार्यान्वयनः निर्वाचन आयूक्त
पहुरा समाचारदाता
धनगढी, ८ असार । स्थानीयतह सदस्य निर्वाचन २०७९ के प्रदेश स्तरीय निर्वाचन समीक्षा कैगिल बा ।
निर्वाचन आयोगके आयोजना तथा निर्वाचन कार्यालय सुदूरपश्चिम प्रदेशके समन्वयमे प्रदेश स्तरीय निर्वाचन समीक्षा कैगिल हो । कार्यक्रममे निर्वाचन आयोगके निर्वाचन आयूक्त रामप्रसाद भण्डारी आंचारसहिता पहिले तुलनामे अब्बे पूर्ण रुपमे कार्यान्वयन हुइल बटैले बटै । उहाँ कहलै, ‘मै २०४३ सालके निर्वाचनमे अपनही भुत्तलभोगी हुँ । उ बेलाके चुनावमे काठमाण्डौमे पुतली सडकसे चोकसे रत्ना पार्क चोकसम ओ भोटाहिटी बसन्ताचोकसम उप्पर आकाश हेरे नइसेक्ना मेरिक टुल व्यानरसे ढाकल रहे ।’
पहिलेक तुलनामे अब्बे हेरेबेर सक्कुचिज परिवर्तन हुइटी गैल बा,’ आयूक्त भण्डारी कहलै, ‘हम्रहिन चाहल कलेक स्वच्छ, निश्पक्ष, भयरहित, कम खर्चिलो चुनाव हो । आयोगफे निर्वाचन कानून बनैटी निर्वाचनके बेला उम्मेदवारसे खर्च कैना सिमा तोकले बा । जनताके मन जिटलेसे का चिजमे खर्च लग्ना ?’
आयोगसे आचारसहिता पालन कार्यान्वयन करैनामे सचेत रहल उहाँ बटैलै ।
आयूक्त भण्डारी कहलै, ‘निर्वाचनके मिति घोषणापाछे दैनिक १०/२० चो आयोगहे फोन आए, चुनाव हुई की नइहुई सबजे अलमलमे रहित, मने आयोग अपन ओरसे पूर्णमे जुटल रहे । सक्कु ओरसे सहयोग, चुनल प्रतिनिधि ओ चुन्ना जनप्रतिनिधिविच सम्झौतापाछे अवधिक निर्वाचन भव्यताके साथ सम्पन्न हुइल ।
कार्यक्रममे निर्वाचन आयोगके सहसचिव यज्ञप्रसाद भट्टराई । स्थानीयतह सदस्य निर्वाचन २०७९ के देशभर अवस्थाबारे जानकारी डेहल रहिट । सुदूरपश्चिम प्रदेशके बाजुराके बुढीगंगा नगरपालिका बाहेक देशभर निर्वाचन सम्पन्न हुइल उहाँ जनैलै । देशभरसे ७९ दल दर्ता हुके निर्वाचनमे ६५ दल सहभागी हुइल उहाँ जनैलै ।
कार्यक्रममे सुदूरपश्चिम प्रदेशके मुख्य निर्वाचन अधिकृत जयनन्द पनेरु, प्रमुख जिल्ला अधिकारी किरण थापा, टमान पालिकाके प्रमुख, निर्वाचन अधिकृतहुक्रे, सरोकारवाला निकायके प्रतिनिधि, राजनितिक दलके प्रतिनिधिहुकनके सहभागिता रहल रहे । कार्यक्रममे संचालन तथा सहजीकरण आयोगके कुल प्रसाद बाग्ले करले रहिट ।
कार्यक्रममे मतदाता नामावली, मतदाता परिचयपत्र, मतदान केन्द्र, मतदान प्रक्रिया, मतगणना तथा परिणाम घोषणा मत, निर्वाचन कार्यतालिका, उम्मेदवार मनोनयन, राजनीतिक दल तथा उम्मेदवारको निर्वाचन प्रचारप्रसार ओ खर्च, जनशक्ति व्यवस्थापन, वित्तीय व्यवस्थापन, व्यवस्थापन, निर्वाचन सामाग्री निर्वाचन सुरक्षा व्यवस्थापन, मतपत्र व्यवस्थापन ओ सूचना प्रविधिके प्रयोग, मतदाता शिक्षा, निर्वाचन सम्बन्धी तालिम, निर्वाचन अनुगमन तथा पर्यवेक्षण ओ निर्वाचनमे लैङिक तथा समावेशीकरण, निर्वाचन कानुन, राजनीतिक दल दर्ता, निर्वाचन विवाद निरुपण ओ निर्वाचन आचारसंहिताके पालना ओ सामाजिक सञ्जालके प्रयोग तथा निर्वाचनमे मिथ्या सूचना, दुष्प्रचार तथा द्वेषपूर्ण अभिव्यक्ति बारे पाँच समुहमे छलफल हुइल रहे ।
छलफलपाछे इन्सेक प्रदेश संयोजक खडकराज जोशी, गैसस महासंघ प्रदेश सचिव लोकमान धामी, राष्ट्रिय अपाङगता महासंघ प्रदेश अध्यक्ष मानबहादुर साउद अपन राखल रहिट ।
