सरकारके प्राथमिकता स्वास्थ्य ओ शिक्षाः मन्त्री बोहरा

पहुरा समाचारदाता
धनगढी, ९ असार । सुदूरपश्चिम प्रदेशके सामाजिक विकासमन्त्री गोविन्दराज बोहरा प्रदेश सरकार स्वास्थ्य ओ शिक्षाहे मुख्य प्राथमिकतामे धारके लगानी बह्रैटी लैजैना बटैले बटै ।

बिफेक रोज मुख्यमन्त्री तथा मन्त्रिपरिषद्के कार्यालय ओ सामाजिक विकास मन्त्रालयसे आयोजित कोभिड–१९ नियन्त्रण तथा उपचार व्यवस्थापन, स्वास्थ्य क्षेत्रमा सम्पादित कार्यबारे आयोजित सार्वजनिक सुनुवाईमे उहाँ यकर लाग कुछ ठोस प्रयास आघे बढसेकल बटैलै ।

उहाँ स्रोत–साधन तथा जनशक्ति कमी, कठिन भूगोल तथा आर्थिक सामाजिक अवस्था कमजोर हुइलेसेफे जनताहे सहज ओ सुलभ रूपमे आधारभूत स्वास्थ्य सेवा उपलब्ध करैना सरकार कटिबद्ध रहल बटैलै ।

उहाँ कहलै, ‘हमार लक्ष्य टे सेतीहे पाँच सय शय्याके बनैना हो । छ महिनाभिटर सेती प्रादेशिक अस्पतालहे कम्तीमे साढे तीन सय शैय्यामे स्तरोन्नति कैजाई ।’

जौन अवस्थामेफे आम नागरिक सहज ओ सुलभ रूपमे गुणस्तरीय स्वास्थ्य सेवा पाई परठ कनामे सरकार गम्भीर रहल मन्त्री बोहरा बटैलै ।

हरेक वर्ष मठमन्दिरमे करोडौं रकम खर्च करटी आइल प्रदेश सरकारसे अइना आर्थिक वर्षके बजेटमेफे सामाजिक विकास मन्त्रालयअन्तर्गत मठमन्दिरके नाउँमे भारी रकम विनियोजन करलबारे सहभागीहmुत्रे जिज्ञासा रख्लै । मन्त्री बोहरा जबाफ डेलै, ‘मठमन्दिरके नाउँमे सामाजिक विकास मन्त्रालयसे रकम धारे लगाइल कना सरासर गलत हो । यी आर्थिक मामिला मन्त्रालयके बदमासी हो । मै सदनमे रोस्ट्रममे ठरहयाके यीबारे स्पष्ट पारम ।’

उहाँ प्रदेशमे आगीसे जरल पीडितके उपचारके लाग ‘बर्निङ केयर सेन्टर’ हाली सञ्चालनमे नन्ना बटैलै ।

कार्यक्रममे मुख्यमन्त्री तथा मन्त्रिपरिषद् कार्यालयके सचिव टुवराज पोख्रेल कोरोना महामारीसे कठिनाइ ओ चुनौतीके साथे अवसरफे सिर्जना करल चर्चा करलै । उहाँ कहलै, ‘कोरोना महामारीके कारण अस्पतालके स्तरोन्नति हुइल बा । उपकरण, जनशक्ति, भौतिक संरचनालगायत क्षेत्रमे बहुट प्रगति हुइल बा ।’

सामाजिक विकास मन्त्रालयके सचिव दिपक लामिछाने बाजुरामे हाली आइसियु सेवा सञ्चालन हुइना, सक्कु जिल्ला अस्पतालमे कम्तीमे थप दुई विशेषज्ञ चिकित्सकके व्यवस्था कैना ओ कोरोनाविरुद्धके खोप शतप्रतिशतमे लैजैना करके काम हुइटी रहल बटैलै ।

कार्यक्रममे दिपायलस्थित स्वास्थ्य निर्देशनालयके निर्देशक डा. जगदीश जोशी कोभिड–१९ रोकथाम ओ नियन्त्रण, उपचार, व्यवस्थापन तथा खोपबारेके अवस्थामे आधारित प्रस्तुति करल रहिट । सुदूरपश्चिम प्रदेशमे ८० प्रतिशत व्यक्ति कोभिड–१९ के खोप लगाइल बटैलै ।

निर्देशक डा. जोशी सुदूरपश्चिम प्रदेशमे अब्बेसम ५ लाख ४७ हजार ४७९ जानेक कोरोना परिक्षण कैसेकल बटैलै । ओस्टेक यी प्रदेशमे कोरोनासे ६ सय ३३ जानेक ज्यान जासेकल बटैलै ।

कोरोनाके पहिल चरण त्रासमै बिटल, डोसरा चरणमे अक्सिजनके कारण ढेर मनै ज्यान गुमाल ओ टिसरा चरणमे सामान्य रहल मने खोजिम पूर्ण रुपमे न्यूनीकरण नैहुइल उहाँ बटैलैं ।