६ महिनाके अवधिमे १३२ मानवाधिकार उलंघनके घटना
पहुरा समाचारदाता
धनगढी, १० असार । अनौपचारिक क्षेत्र सेवा केन्द्र (इन्सेक) सुदूरपश्चिम प्रदेश कार्यालय धनगढीमे बिगत ६ महिना भित्तर कैलालीमे १ सय ३२ ठो मानव अधिकार उलंघनके घटना दर्ता हुइल बा । जेम्ने १ सय २५ महिला ओ ९ जाने पुरुषकैके १ सय ३४ जाने पीडित रहल बटैं ।
इन्सेकसे वार्षिक रूपमे नेपाल मानव अधिकार वर्ष पुस्तक प्रकाशन पूर्व समीक्षा कार्यक्रममे शुकके रोज धनगढीमे सन् २०२२ जनवरीसे जुनसमके अभिलेखमे उल्लेख हुइल इन्सेकके सुदूरपश्चिम प्रदेश संयोजक खडकराज जोशी जानकारी करैलैं ।
यी ६ महिनाके अवधिमे ९७ जाने पीडित हुइल बटैं । जोनमध्ये ८८ जाने घरेलु हिंसा, ८ जाने बलात्कार, १ जनो बहुविवाहसे पीडितके इन्सेकमे घटना दर्ता हुइल बा । ओस्टेके, २४ जाने बालबालिका पीडित हुइल बटैं । जोनमध्ये १७ जाने बलात्कार, २ जाने बेचबिखन, ४ जाने यौन दुव्र्यवहार, १ जाने बलात्कार प्रयाससे पीडित हुइल इन्सेकमे अभिलेख हुइल बा ।
ओस्टेके, परिजारसे २ जाने महिलाके हत्या ओ १ जाने महिला घाहिल हुइल इन्सेकके अभिलेखमे बा । यिहे अवधिमे अन्य पक्षसे २ पुरुषके हत्या, २ जहनहे कुटपिटसे घाहिल ओ ३ जनहउप्पर दुव्र्यवहार, १ जाने गोसिनीयाके हत्यापाछे आत्महत्या करल ओ १ जाने करागारमे मृत्यु हुइल इन्सेकमे अभिलेक हुइल बा ।
कार्यक्रममे इन्सेकके सहजकर्ता मैनामोती चौधरी बलात्कार जैसिन जघन्य अपराध करलहे फेन धरौटीमे रिहा हुइना घटनासे पीडितहुक्रे न्यायके अनुभूति करेनैसेकल बटैलि । उहाँ कलैं, “पीडकके धरौटीमे रिहा हुइल ओरसे पीडितहुक्रे न्यायके अनुभूति करे सेक्ले नैहुइट् ।” उहाँ अस्टे टमान घटनाके छलफल कैके निकास निकारेपरनामे जार डेले रहि ।
ओस्टेके, कार्यक्रममे जिल्ला न्यायाधिवक्ता राजेन्द्रसिंह भण्डारी बलात्कार जैसिन घटनामे महिला ‘होस्टाइल’ हुइल ओरसे पीडितहुक्र न्यायके महशुस करे नैसेकल बटैलैं । उहाँ कलैं, “कौनो फेन मुद्दा अदालतमे पुगलपाछे सत्यतथ्य प्रमाण खोजठ । ओहे प्रमाणके आधारमे न्यायसम्पादन हुइना हो । मने पीडित ‘होस्टाइल’ होके न्यायसम्पादन प्रभावित हुइल बा ।”
अधिकारकर्मी सावित्रा घिमिरे समाजमे रहल बहुविवाहके घटनाके मुद्दा अभिलेख नैहुइल बटैलैं । उहाँ बहुविवाहके घटना काहे अभिलेखमे नैआइल कनाबारे छलफल करेपरना बटैलि ।
