धनगढी उपमहानगरपालिकासे १ अर्ब ८३ करोडके बजेट प्रस्तुत
पहुरा समाचारदाता
धनगढी, १० असार । कैलालीके धनगढी उपमहानगरपालिका आर्थिक वर्ष २०७९/०८० के लाग १ अर्ब ८३ करोड ८९ लाख २४ हजार बराबरके बजेट पेश करले बा । उपमहानगरपालिकाके उपप्रमुख कन्दकला राना शुकके रोज ८ औं नगर सभामे उ बजेट प्रस्तुत करे रहि ।
आर्थिक वर्ष २०७९/०८० के चालूओर १ अर्ब ३ करोड १९ लाख ७० हजार रुपैयाँ ओ पुँजिगतओर ८० करोड ७० लाख ६२ हजार ३ सय ६८ रुपैयाँ प्रस्तुत कैगिल बा ।
प्रस्तुत बजेटमे आन्तरिक आय २६ करोड, ७९ लाख २४ हजार, अन्तर सरकारी वित्तीय हस्तान्तरण संघीय सरकार ९६ करोड ४८ लाख ओ प्रदेश सरकारसे ३५ करोड ३४ लाख ५ हजार, राजस्व बाँडफाँटसे प्राप्त ४७ करोड २९ लाख ३३ हजार ओ सरके आइल मौज्दात १० करोड रहना प्रक्षेपण करल बा ।
आर्थिक वर्ष २०७९/०८० के बजेटमे उपमहानगरके बजेटमे सबसे ढेर बजेट सामाजिक विकासओर विनियोजन करले बा । उपमहानगरपालिका सामाजिक विकासओर ७४ करोड ७८ लाख ३३ हजार विनियोजन करले बा । उ कुल बजेटके ४० दशमलब ६४ प्रतिशत हो ।
उपमहानगरपालिका आर्थिक विकासओर कुल बजेटमध्ये १४ करोड ४२ लाख ११ हजार (सात दशमलब ८४ प्रतिशत), पूर्वाधार विकासओर ४५ करोड १० लाख ५२ हजार (२४ दशमलब ५३ प्रतिशत), सुशासन तथा अन्तरसम्बन्धित क्षेत्रओर सात करोड ७३ लाख २१ हजार (चार दशमलब दुई प्रतिशत) ओ कार्यालय संचालनओर ४१ करोड ८५ लाख सात हजार (२२ दशमलब ७६ प्रतिशत) विनियोजन करले बा ।
उपमहानगरपालिका सामाजिक सुरक्षासे ५० करोड, सडक बोर्ड नेपालसे १ करोड, अन्य कार्यक्रम अनुदानसे १ करोड ओ नगरपालिकाभित्तर कार्यक्रम सञ्चालन हुइना टमान संघसंस्थासे १७ करोड ११ लाख ६२ हजार रकम कैके ६९ करोड ११ लाख ६२ रकम आगामी आर्थिक वर्षमे आयव्ययओर थप हुइना अनुमान करले बा ।
उपमहानगरपालिकासे प्रस्तुत करल बजेटमे खर्चके भारहे घटैना रणनीति अपनैना कहल बा । ‘करारमे कार्यरत कर्मचारीहे पुनरावलोकन करटि प्रशासनिक खर्चके भार घटैना व्यवस्था मिलाइल बा’ उ बजेट वक्तव्यमे कहल बा ।
उपमहानगरपालिका विकास खर्चहे चालुओरमे परिवर्तन करे नैपैना, खरिद प्रक्रियाहे पारदर्शी बनैटि समयमे खरिद कार्य सम्पन्न हुइना ओ अपन आन्तरिक स्रोतसे चालु खर्च धन्ना मेरिक आत्मनिर्भर उन्मुख बजेट कार्यान्वयन करना उल्लेख बा ।
उपमहानगरपालिका साधन स्रोतके सीमिततासे उल्लिखित नीति ओ नगरबासीसे माग कैके पठाइल कार्यक्रम पूर्णरूपमे आगामी आर्थिक वर्षके बजेटसे सम्बोधन करे नैसेक्ना उल्लेख करल बा । बजेट वक्तव्यमे कहल बा, ‘सम्बोधन हुइ नैसेकना अइसिन कार्यक्रमहे पाछे प्रकाशित हुइना रातो कितावमे ‘योजना बैंक’ के रुपमे प्रकाशित कैके क्रमशः लागू करटि जैना प्रतिवद्धता व्यक्त करटि ।’
उपमहानगरपालिका आगामी आर्थिक वर्षके लाग २६ करोड ८८ लाख ४६ हजार कर संकलन करना अनुमान करले बा । उपमहानगरपालिका चालु आर्थिक वर्ष २०७८/७९ मे १ अर्ब ८१ करोड २८ लाख २२ हजार १ सय रुपैयाँ बराबरके बजेट प्रस्तुत करले रहे ।
कार्यक्रम धनगढी उपमहानगरपालिकाके नगरप्रमुख गोपाल हमालके अध्यक्षतमे हुइल रहे । कार्यक्रममे नगरकार्यपालिका सदस्यहुकनलगायत सरोकारवालाहुकनके सहभागिता रहल रहे ।
