५९ करोड २५ लाख २१ हजार प्रस्तावित बजेट प्रस्तुत
पहुरा समाचारदाता
धनगढी, १० असार । कैलारी गाउँपालिकाके एघारौं गाउँसभा अधिवेशनसे आर्थिक वर्ष २०७९/०८० के लाग नीति तथा कार्यक्रम सार्वजनिक करल बा । ओस्टेक करके अइना आर्थिक बर्षके प्रस्तावित बजेटफे प्रस्तुत करल बा ।
गाउँपालिका अध्यक्ष राजसमझ चौधरी आर्थिक बर्ष २०७९/०८० के नीति तथा कार्यक्रम प्रस्तुत करटी विगतमे हुइल/करल असल अभ्यासहे संस्थागत करटी लैजैना ओ कमी कमजोरीहे न्यूनिकरण कैनाके साथे समावेशी सिद्धान्तके आधारमे पूर्ण पारदर्शी रुपमे बजेट तथा कार्यक्रम कार्यान्वयन कैना बटैले बटै ।
भूमिहिन सुकुम्बासी, भूमिहिन दलित, मुक्तकमैया तथा अव्यवस्थित बसोवासीके राष्ट्रिय भूमि आयोग तथा अन्य सरोकारवालासंगके समन्वयमे व्यवस्थापन कैना आर्थिक वर्ष २०७९/०८० के नीति तथा कार्यक्रममे समावेश करल बा ।
गाउँपालिकाके साझा सवालके सम्बोधन तथा दिगो विकासके लाग गाउँपालिकामे क्रियाशिल राजनीति दल, नागरिक समाज, बुद्धिजिवी भल्मन्सा लगायतके सरोकारवालासंगके समन्वय तथा सहकार्य कैना बा ।
गाउँपालिकाके नागरिकके विकासप्रतिके तिब्र भावना ओ समग्र कैलारी गाउँपालिकाके आधार स्वरोजगार एवं पूर्वाधार ओ नागरिकहे गुणस्तरीय सेवा प्रवाहके आवश्यक बजेट तथा कार्यक्रम तर्जुमा कैना गाउँपालिका अध्यक्ष राजसमझ चौधरी बटैलै । समृद्ध कैलारी गाउँपालिकाके विकासके आधार, स्वरोजगार एवं पूर्वाधार ओ विकासप्रतिके आकाँक्षाहे संस्थागत कैना बजेट तथा कार्यक्रमके तर्जुमा कैना अध्यक्ष बटैलै ।
नीति तथा कार्यक्रममे पूर्वाधार विकासमे सडक, विद्युत तथा वैकल्पिक उर्जा, भवनमे जोड डेना जनैले बा । आर्थिक विकासमे कृषि, पशुपंक्षि, सहकारिता तथा उद्यम, आर्यआर्जन तथा सीप विकास, यूवा परिचालन तथा स्वरोगार, पर्यटन विकासमे जोड डेहल बा ।
सामाजिक विकासमे लैङिक समानता तथा सामाजिक समावेशीकरण, शिक्षा, स्वास्थ्य, सामाजिक परिचालन, यूवा तथा खेलकुदमे जोड डेहल बा । वनवातावरण तथा व्यवस्थापनमे वन विकास, पर्यटन विकास, उर्जा वातावरण तथा जलवायू परिवर्तन, विपद जोखिम न्यूनिकरण तथा वातावरण संरक्षणमे जोड नीति तथा कार्यक्रममे समावेश करल बा ।
संस्थागत विकास, सेवा प्रवाह र सुशासनमा सुशासन तथा पारदर्शिता, क्षमता विकास संस्थागत विकास, गैरसरकारी सस्था सहजीकरण तथा नियमन, बजेट तथा राजश्व परिचालनमे जोड डेहल अध्यक्ष बटैलै । कैलारी गाउँपालिकासे अगामी आर्थिक वर्षमे अन्य स्थानीय तहसंग समन्वय करके दमकल सञ्चालन कैना, वन तथा वन्यजन्तु पंशुपक्षी संरक्षणके कार्यक्रम सञ्चालन कैना लगायत नीति तथा कार्यक्रममे उल्लेख बा ।
ओस्टेक दुसरा शत्रमे गाउँपालिका अध्यक्ष राजसमझ चौधरीके अध्यक्षतामे हुइल एघारौं गाउँसभा अधिवेशनसे आर्थिक वर्ष २०७९/०८० के लाग गाउँपालिका उपाध्यक्ष भगवतीकुमारी चौधरी ५९ करोड २५ लाख २१ हजार प्रस्तावित बजेट प्रस्तुत करले बटी ।
उ गाउँपालिका सशर्तके कार्यक्रमओर २५ करोड ८५ लाख, कार्यालय सञ्चालन/प्रशासनिक (चालू) ओर १० करोड ५० लाख रुपैयाँ बजेट विनियोजन करले बा । ओस्टेक करके, समपूरक कोषओर छ करोड ५० लाख, क्रमागत तथा अधुरा योजनाओर ८० लाख रुप्या बजेट विनियोजन करले बा ।
झोलुङ्गे पुल लागत साझेदारीओर २० लाख, मर्मत सम्भार कोषके लाग ४७ लाख २१ हजार, दमकल खरिद तथा व्यवस्थापनमे ३५ लाख, भूमि व्यवस्थापन (भूमि आयोग)के लाग २० लाख, डिजिटल प्रोफाइलके लाग २२ लाख रुप्या बजेट विनियोजन करले बा ।
ओस्टेक करके, विस्तृत परियोजन प्रतिवेदनके लाग २५ लाख, वातावरणीय प्रभाव मूल्याङकनके लाग १५ लाख, अध्यक्ष कप रनिङ प्रतियोगिताके लाग २५ लाख, क्षमता विकास तथा रोजगार कार्यक्रमके लाग १० लाख रुप्या बजेट विनियोजन करले बा ।
स्वास्थ्य बीमाके लाग आर्थिक सहयोगओर पाँच लाख, विद्युतीय सुशासन तथा सूचना प्रविधि कार्यक्रमओर १५ लाख, विशेष अनुदान कार्यक्रम, अध्यक्ष स्वरोजगार कार्यक्रम, उपाध्यक्ष समावेशी कार्यक्रमके लाग १५/१५ लाख रुप्या बजेट विनियोजन करल बा ।
विधेयक समिति ओ न्यायिक समितिओर तीन/तीन लाख करके गाउँपालिका विनियोजनओर कुल ४८ करोड ३५ लाख २१ हजार रुप्या बजेट विनियोजन करल बा ।
ओस्टेक करके, विषयगत समिति अन्तर्गत पूर्वाधार विकास समितिके लाग तीन करोड, आर्थिक विकास समितिके लाग दुई करोड ५० लाख, वन, वातावरण तथा विपद् व्यवस्थापन समितिके लाग दुई करोड रुप्या बजेट विनियोजन करल बा । ओस्टेक करके, सामाजिक विकासओर तीन करोड ९० लाख, सुशासन तथा संस्थागत विकासओर ३० लाख, लक्षित वर्ग कार्यक्रमओर एक करोड रुप्या बजेट विनियोजन करल बा ।
गाउँपालिकासे प्राप्त कैना आम्दानीमे संघीय सरकारसे प्राप्त हुइना ५४ करोड ३३ लाख १० हजार, प्रदेश सरकारसे प्राप्त हुइना एक करोड ७७ लाख ६१ हजार रुप्या रहल बा । ओस्टेक करके, आन्तरिक आम्दानीमे तीन करोड १४ लाख ५० हजार रुप्या रहल गाउँपालिकाके उपाध्यक्ष चौधरी बटैली । उ प्रस्तुत बजेट छलफलमे नानके यिहे असार १६ गते सार्वजनिकीकरण कैना उहाँ जनैली ।
