घोडाघोडी नगरपालिकासे १ अर्ब १ करोड २३ लाखके बजेट सार्वजनिक
पहुरा समाचारदाता
सुखड, १० असार । कैलालीके घोडाघोडी नगरपालिकासे १५ औँ नगर सभा तथा आगामी आर्थिक वर्ष २०७९/०८० के नीति तथा कार्यक्रम सहित १ अर्ब १ करोड २३ लाख २९ हजारके बजेट सार्वजनिक करले बा ।
आर्थिक बरस २०७९/०८० के लाग १ अर्ब १ करोड २३ लाख २९ हजार बराबरके बजेट नगर सभामे उप प्रमुख गुलिया कुमारी चौधरी प्रस्तुत करल रही । १५ औँ नगर सभामे प्रस्तुत बजेटमे संघीय सरकारसे राजश्व बाँडफाँडमे १७ करोड २५ लाख ६४ हजार, राजश्व बाँडफाँडमे प्रदेश सरकारसे ५९ लाख ४९ हजार, वित्तीय समानीकरण अनुदान संघीय सरकारसे २० करोड ७० लाख, वित्तीय समानीकरण अनुदान प्रदेश सरकारसे १ करोड ५४ लाख ३६ हजारके सीमा अनुमान करल बा ।
ओस्टके संघीय सरकारसे प्राप्त समपुर अनुदान ३ करोड ९० लाख, प्रदेश सरकारसे समपुर अनुदान १ करोड १८ लाख, संघीय सरकारसे विशेष अनुदान ५ करोड ८५ लाख, प्रदेश सरकारसे विशेष अनुदान ९५ लाख, संघीय सरकारसे प्राप्त सशर्त अनुदान ३५ करोड ७६ लाख ओ आन्तरिक श्रोतसे प्राप्त नगद राजश्व १३ करोड ५० लाख प्राप्त हुइना अनुमान करल बा ।
घोडाघोडी नगरपालिकाके नगर प्रमुख खडक बहादुर रावतके घरगोसियाइमे हुइल कार्यक्रममे सुदूर पश्चिम प्रदेशके आर्थिक मामिला राज्यमन्त्री अमर बहादुर साउँद बर्का पहुना रहल रहिट । नगर सभामे घोडाघोडी नगरपालिकाके प्रमुख प्रशासकीय अधिकृत दीपक कुमार आचार्य कार्यक्रमके सञ्चालन करल रहिट ।
