नैतिकवान मधेश तथा नैतिक शिक्षा सम्बन्धि अन्तर संवाद
पहुरा समाचारदाता
धनगढी, १६ असार । नैतिकवान मधेश तथा नैतिक शिक्षासम्बन्धी अन्तरसंवाद कार्यक्रम धनगढीमे बिफेक रोज निम्जल बा । कार्यक्रम मधेश आयोगके आयोजनामे हुइल रहे ।
कार्यक्रमके उद्घाटन आयोगके सदस्य आभाकुमारी सिंह करले रहे । उहाँ आयोगसे देशभर रहल मधेशी समुदायके आवाजहे बुलन्द पारेक लाग अप्नेहुक्रे लागल बटैलि । मधेशी मुलके नागरिकहुकनके आर्थिक, सामाजिक ओ संस्कारके अवस्थामे बुझ्ना कामके लाग धनगढीमे कार्यक्रम ढरल आयोगके सदस्य सिंह बटैलि ।
आयोग टरेक तहके नागरिकसे लेके केन्द्रसम जोरना पुलके काम करटिरहल उहाँक कहाइ रहे । मधेशके नागरिकहुकनके अधिकारके विषयमे सबजे जानेपरना उहाँ उल्लेख करलि ।
ओस्टेके, कार्यक्रममे धनगढी उपमहानगरपालिका वडा नम्बर २ के वडाध्यक्ष धर्म ओझा वडा कौनो फेन नागरिकप्रति फरक दृष्टिकोण नैहल बटैलैं । ‘वडाके सक्कु नागरिकहुकनप्रति सम्मान बा’, उहाँ कलैं, ‘मधेशी नागरिहुकन समन्वय कैके आगे बह्रल बटि ।’
अन्तरक्रिया कार्यक्रमके सहभागि मधेश समुदायके नागरिकहुकनप्रति हेर्ना दृष्टिकोण नैफिरल गुनासो करलैं । धनगढी वडा नम्बर ३ के स्थानीय सरोजकुमार यादव नागरिकमे आयोगके हुइल अनुभूति हुइ नैसेकल बटैलैं । उहाँ मधेशी नागरिकहुकनहे छुट्याइल रकम समेत पाइ नैसेकल गुनासो करलैं ।
