प्रस्तावित बजेट संशोधनके माग

पहुरा समाचारदाता
हसुलिया, १६ असार । कैलारी गाउँपालिकाके गाउँ सभा सदस्यहुक्रे जनसङ्ख्या ओ भूगोलके आधारमे दामाशाहीके हिसाबसे वडामे बजेट माग करले बटै ।

बिफेक रोज बैठल गाउँ सभा बैठकमे शून्य ओ विशेष समय लेके बोल्टी ओइने यैसिन माग करल हुइट । अइना आर्थिक वर्ष २०७९÷८० के लाग गाउँपालिकासे वडाके लाग विनियोजन करल बजेट संशोधन करटी ओइने जनसङ्ख्या ओ भूगोलके आधारमे दामाशाही हिसाबसे बजेट माग करलै ।

गाउँपालिकाके प्रवक्तासमेत रहल वडा नम्बर ७ के वडा अध्यक्ष दीपेन्द्र बम जनताके आवश्यकतानुसारके विकास पूर्वाधार विकास करे सेक्ना करके वडाहे बजेट विनियोजन कैना आवश्यक रहल बटैलै । ‘भूगोल, जनसंख्याके आधारमे दामाशाहीके हिसाबसे बजेट डेहे परठ,’ उहाँ कहलै । ‘नइटे जनताके चाहनानुसार हम्रे विकास करे नइसेक्बी । हमार अवस्थाफे पूर्ववर्ती सरकार जस्टे हुई ।’ उहाँ कुछ शीर्षकमे छुटयाइल बजेट संशोधन करटी ओसिन शीर्षकके बजेट आवश्यकता अनुसार धारे पर्ना बटैलै ।

बाढसे कटैनी लडियामे रहल बसन्ता ओ भुईयाँफाँटाके काठे पुल पुहाइल ओरसे काठेपुलके तत्काल व्यवस्थापन कैना अध्यक्ष बम गाउँपालिका अध्यक्षहे आग्रह करलै । गाउँ सभा सदस्यहुक्रे वडाहे गाउँपालिकासे टुक्रे नइहुके डल्लो बजेट डेहे पर्ना जिकिर करले बटै । छिटकल योजनाके लाग टुक्रे बजेटसेफे डल्लो बजेट वडाके विकास हुइना ओइनके कहाई रहे । वडा नम्बर १ का वडा अध्यक्ष ध्वजहरिपाल बोहरा डल्लो बजेटबिना वडामे जनताके चाहनानुसार विकास करे नइसेक्ना बटैलै । उहाँ वडाहे डल्लो बजेट हुइलेसे वडासे अपने हिसाबसे योजनाके काम छ महिनामे करे सेक्ना उल्लेख करलै ।

वडा नम्बर ९ के वडा अध्यक्ष खेमराज चौधरी विकासके योजनामे पालिका ओ वडा कार्यालयके समन्वय आवश्यक रहल बटैलै । ओस्टेक, वडा नम्बर ५ के वडा अध्यक्ष विष्णुप्रसाद चौधरीसे वडाहे डल्लो बजेट डेहे पर्ना माग करलै । उहाँ गाउँपालिकासे नानल बजेट सकारात्मक सम्बोधन करे सेक्ना खालके रहलेसेफे ग्राभेलके लाग छुट्टयाइल ३० लाख बजेट न्यून रहल बटैलै । नौ वडाहे बराबर बाटलेसे जम्मा तीन÷तीन लाख बजेट भागमे पर्ना उल्लेख करटी उहाँ समपूरक कोषसे २५ ओ लक्षित वर्गके कार्यक्रमसे २५ करके थप ५० लाख बजेट ग्राभेलके लाग विनियोजन कैना आग्रह करलै । शिक्षामे लगानी ढेर रहलेसेफे प्रतिफल मजा नइरहल उल्लेख करटी वडा अध्यक्ष चौधरी शिक्षाके प्रतिफूल कैसिक बढैना ओर गाउँपालिकासे ध्यान डेना आवश्यक रहल बटैलै । ‘यकर लाग विद्यालयके कर्मचारीके लेखाजोखा रख्न आवश्यक बा’, उहाँ कहलै ।

ओस्टेक, वडा नम्बर ६ के वडा अध्यक्ष प्रेमबहादुर चौधरी गाउँपालिकाहे आर्थिक रुपसे बल्गर बनैना आवश्यक रहल बटैलै । उहाँ गाउँपालिकाभिटर रहल तालतलैयाके ठेक्का अनियमित तरिकासे हुइटी रहल उल्लेख करटी गाउँपालिकाके मातहतमे सक्कु तालके ठेक्का हुइना आवश्यक रहल जोड डेलै । गाउँपालिकासे चालू आर्थिक वर्षसे मालपोत करमे ५० प्रतिशत छुट डेना नयाँ जनप्रतिनिधि आइलपाछे पहिल निर्णयके रुपमे निर्णय करसेकल बा ।

मालपोत करमे छुट डेहल ओरसे सन्तुलन कायम करेक लाग करके दायरा बह्राई पर्ना चौधरी बटैलै । ‘करके दायरा बढाके आम्दानी बढाई नइसेक्लेसे भर चुनौती हुई’, उहाँ कहलै, ‘काहेकी गाउँपालिकाके वार्षिक राजस्व प्रक्षेपण तीन करोड ४८ लाख हो । ५० प्रतिशत मिनाहा करलपाछे आब उठ्न कहल एक करोड ७४ लाख केल हुई जाइठ ।’ उहाँ तालतलैया ओ व्यापारीसे राजस्व मजासे उठे नइसेकल बटैलै । ‘एक्के पसलसे ढेर चिजके व्यापार हुइटी रहल बा । मने, कर उठल नइहो, वडा अध्यक्ष चौधरी कहलै ।

ओस्टेक करके, वडा नम्बर ४ के वडा अध्यक्ष ठागुराम चौधरी के गाउँ ओ धर्मापुर जोरना घुरहा लडियक पुल जीर्ण हुसेकल कहटी मर्मतके लाग पहल कैना गाउँपालिकाके ध्यानाकर्षण करैलै । उहाँ सुधारल चुल्हासेफे विद्युतीय चुल्हा डेना योजना नन्ना ओ छाडा चौपायाके समस्या समाधानके लाग अग्रसर हुइना गाउँपालिकाहे आग्रह करलै ।

गाउँ सभा सदस्य जगमा चौधरी सभा सदस्यहुकनके सवारी साधन मर्मत ओ पेट्रोल खर्च गाउँपालिकासे डेहे पर्ना माग करली । गाउँ सभामे शून्य ओ विशेष समय लेके सदस्यहुक्रे तुल्सीप्रसाद चौधरी, सैतुराम चौधरी, मोहनलाल चौधरी, आशिक चौधरी, कृष्णीदेवी दमाई आ–अपन वडाके माग ओ समस्याबारे गाउँ सभामे बोलल रहिट ।

गाउँपालिका एवम् गाउँ सभाके अध्यक्ष राजसमझ चौधरीके अध्यक्षतामे गाउँ सभा बैठक बैठल रहे । उ बैठकमे जवाफ डेटी अध्यक्ष चौधरी सक्कु व्यापारीहे करके दायरामे नन्ना बटैलै । ‘कम कर लगाके हम्रे ओइनके कर तिर्ना बानी बैठाई परी’, उहाँ कहलै । ओस्टेक करके, वन ऐन २०७६ से प्राकृतिक तालतलैयाहे वनके मातहतमे तानेल ओरसे प्राकृतिक तालतलैयाहे गाउँपालिकाके मातहतमे लेना समस्या हुइटी रहल उहाँ बटैलै । ‘स्थानीय तह सञ्चालन ऐन २०७४ से तालतलैया स्थानीय तहके मातहतमे रहना कहल बा । मने, वनके पछिल्का ऐनसे फेर अपने ओर तालतलैयाहे तानल बा’, अध्यक्ष चौधरी कहलै, ‘यदि, तालतलैया वन अन्तर्गत गैल कलेसे हमार ते आम्दानीफे घटजाई ।’

ओस्टेक, गाउँ सभा सदस्य एवम् वडा अध्यक्षहुक्रे उठाइल डल्लो बजेटके बारेमे गाउँ कार्यपालिकाके बैठकमे छलफल कैना उहाँ बटैलै । गाउँ सभा बैठकमे गाउँपालिकाके उपाध्यक्ष भगवतीकुमारी चौधरी, प्रमुख प्रशासकीय अधिकृत वीरबहादुर ऐर, गाउँ सभा सदस्य, कर्मचारीहुकनके उपस्थिति रहल रहे ।