पाँच सय २० दक्ष जनशक्ति उत्पादन

पहुरा समाचारदाता
धनगढी, १६ असार । ट्रेस नेपालसे कैलालीमे सञ्चालित सीप ओ इनामदायी रोजगार परियोजनाके कार्यशाला परियोजना समाप्ती ओ सर्वोत्तम अभ्यासबारे धनगढीमे कार्यक्रम हुइल बा ।

परियोजना समापन हुइल जानकारी करैटी दुई वर्ष आछे धनगढीमे सुरु हुइल उ परियोजनाके मजा अभ्यासबारे सरोकारवालाहुकनहे जानकारी डेहल हो । ट्रेस नेपालके परियोजना संयोजक टेकबहादुर बलायर परियोजना सरोकारवाला निकायके साझेदारीमे हुइल ओरसे संस्थासे डेहल तालिमसे ढेर जाने स्वरोजगार बन्न सफल हुइल बटैलै ।

सन २०२० मार्च १ से सुरु हुइल उ परियोजनाके कार्य अवधि सन २०२१ अगस्ट ३१ सम रहल रहे । कोभिड महामारीके कारण उ परियोजनाके अवधिक सन २०२२ जुलाई ३१ सम बनाइल परियोजना संयोजक बलायर बटैलै ।

झण्डै दुई करोड ३० लाख ढेर बजेटसे सञ्चालित उ परियोजनासे कैलाली जिल्लाभर पा“च सय २० दक्ष जनशक्ति उत्पादन करले बा । उ परियोजनासे चार सय नयाँ व्यक्ति, ६० जनहनहे उप्पर सीप ओ ६० जनहनहे फेर सीप तालिम प्रदान करल रहे ।

परियोजना समाप्त कार्यक्रममे कैलाली उद्योग वाणिज्य संघके कार्यालय प्रमुख गोमा अधिकारी परियोजनासे डेहल व्यक्तिहुकनहे आत्मनिर्भर बनैना मद्दत पुगल बटैली । उहाँ कहली –‘विगतमे ढेर संघ/संस्था, सरकारी निकायसे तालिम हुके उ तालिमके लाग केल तालिम बन्ना करल रहे । यी परियोजना ओसिन परम्परा तुरले बा ।’

नेपाल निर्माण व्यवसाय महासंघ कैलालीके अध्यक्ष यज्ञराज उपाध्याय सरोकारवालाहुकनसंग साझेदारीमे परियोजना सञ्चालन हुइल ओरसे प्रभावकारी बनल बटैलै । उहाँ यैसिक सञ्चालन हुइल यी पहिल परियोजना रहल बटैलै,‘मजा प्रशिक्षार्थी वेरोजगार नइहुइही’ उहाँ कहलै ।