सुदूरपश्चिममे नबिल एसएसई प्रमाणपत्र कार्यक्रमके सुरुवात

पहुरा समाचारदाता
धनगढी, १७ असार । नबिल बैंकसे इहे बरससे सञ्चालन करल गैरनाफामुलुक कार्यक्रम नबिल स्कुल अफ सोसियल इन्टरप्रेनरसिप (नबिल एसएसई) अन्तर्गतके प्रमाणपत्र कार्यक्रम सुदूरपश्चिममे सुरुवात हुइल बा ।

सुदूरपश्चिमाञ्चल एकेडेमी(एसपीए कलेज)सँगके सहकार्यमे नबिल एसएसईके प्रविणतापत्र कक्षा सुरु हुइल हो । सुदूरपश्चिमाञ्चल विश्वविद्यालयके पूर्व रेक्टर प्रा. डा हेमराज पन्त शुकके एक समारोहके बीच कार्यक्रमके सुरुवात करल रहटि ।

कार्यक्रममे डा. पन्त अचेल संस्थाके फाइनान्सियल अडिट जत्राके महत्वपूर्ण सोसियल अडिट फेन रहल ओरसे नबिल बैंकसे सुरु करल सामाजिक उद्यमशिलता कार्यक्रमप्रति आभार व्यक्त करलै । ओस्टके नबिल बैंकके सुदूरपश्चिम तथा कर्णाली प्रदेश प्रमुख टेकराज भट्ट बैंकसे इ बरससे दीर्घकालिन सोचके साथ इ कार्यक्रम सुरु करल ओ इहीसे सयौँ युवाहे उद्यमशील बनैना मद्दत पुग्ना विश्वास करलै ।

इहीसे आघे टमान सामाजिक क्रियाकलापमार्फत सामाजिक उत्तरदायित्व निभैटी आइलमे उ क्षणभर किल हुइना बटैटी उहाँ इ बेर युवाहुक्रनहे नै उद्यमशील बनैना इ कार्यक्रम लञ्च करल बटैलै ।

बरसभर नै चल्ना इ कार्यक्रममे सहभागिताके लाग एसपीए कलेज इहीसे आघे नै खुला आवेदन आह्वान करल रहे । जेम्ने १०० से ढिउर जनहनके आवेदन प्राप्त हुइल रहे । जेम्ने पहिल चरणमे प्रमाणपत्र कार्यक्रमके लाग २२ जनहनके सहभागिता रहल बा । आवेदन डेहल बाँकी आवेदकहे फेन क्रमशः कार्यक्रममे समावेश कैटी लैजैना कार्यक्रम संयोजक तथा एसपीएके अध्यापक प्रेमराज जोशी बटैलै ।

समाजमे सकरात्मक परिवर्तन लन्ना, सामाजिक प्रभाव श्रृजना कैना, कौनो फेन परियोजना वा सोचहे उद्यममे रुपमान्तरण कैना वा विकसित कैना सहयोग कैना ओ जटिल सामाजिक समस्या समाधान कैना सामूहिक पहल कैना नबिल एसईई कार्यक्रमके लक्ष्य रहल नबिल बैंक रातोपुल शाखाके प्रबन्धक तपेन्द्र कुँवर जानकारी डेलै ।

कार्यक्रममार्फत सामाजिक उद्यमशिलता सम्बन्धि टमान विषयवस्तुमे प्रयोगात्मक ओ व्यवहारिक ढंगसे प्रशिक्षणमे सहभागी कराजैना बा । तीन महिनाके प्रशिक्षणपाछे सहभागी उद्यमशील सोच ओ लगानी योग्य व्यवसायिक योजना करे सेक्ना हुइना विश्वास एसपीए कलेजके प्रमुख योगराज उपाध्याय विश्वास व्यक्त करलै ।

कलेज प्रमुख उपाध्याय नबिल बैंकसे इ कार्यक्रम सहकार्यके अवसर डेहलमे बैंक परिवारप्रति कृतज्ञता ज्ञापन करलै । नबिल बैंकसे इ कार्यक्रममार्फत बरसमे ७ सय तालिम प्राप्त जनशक्ति उत्पादन कैना लक्ष्य लेले बा ।