होमस्टे संंचालकहे संचालन ओ व्यवस्थापन तालिम
पहुरा समाचारदाता
धनगढी, १७ असार । सुदूरपश्चिम प्रदेशके टमान जिल्लामे होमस्टे संचालन करल होमस्टे संचालकहुकनहे तीन दिने होमस्टे सचालन ओ व्यवस्थापन तालिम सुरु हुइल बा ।
सुदूरपश्चिम प्रदेशके उद्योग पर्यटन वन तथा वातावरण मन्त्रालयके आर्थिक सहयोग ओ शैलेश्वरी रिसर्च एण्ड कन्सल्टीङ प्रालि धनगढीके आयोजनामे होमस्टे संचालकहुकनहे तीन दिने होमस्टे सचालन ओ व्यवस्थापन तालिम सुरु हुइल प्रालिके संचालक दलबहादुर ओली बटैलै । मन्त्रालयके आर्थिक बर्ष २०७८/०८९ के वार्षिक स्विकृत कार्यक्रम अन्र्तगत तालिम संचालन हुइल उहाँ जनैलै ।
तालिममे बझाङ, बाजुरा ओ दार्चुलाबाहेक ६ जिल्लाके होमस्टे संचालकहुकनके उपस्थिति रहल बा । तालिम उदघाटन कार्यक्रममे सुदूरपश्चिम प्रदेशके उद्योग पर्यटन वन तथा वातावरण मन्त्रालयके निमित्त सचिव भरत श्रेष्ठ पर्यटकके रोजाईमे होमस्टे रहल बटैलै ।
उहाँ कहलै, पर्यटकहुक्रे अर्गनिक खाना ओ गाउँघर उत्पादन हुइल बस्तु, लोकल मुर्गी मन परैठै । मजासे होमस्टे संचालन करलेसे गाउँघरमे रोजगारी सृजना करे सेक्जाई । मन्त्रालयसे पर्यटन प्रवद्र्धनके साथे होमस्टे संचालनहे प्राथमिकता डेहल उहाँ जनैलै ।
कार्यक्रममे सुदूरपश्चिम प्रदेशके उद्योग पर्यटन वन तथा वातावरण मन्त्रालयके शाखा अधिकृत धर्मराज जोशी तालिमसे होमस्टे संचालकहुकनहे होमस्टे सचालन ओ व्यवस्थापन थप सहगोग मिल्ना बटैलै । तीन दिनसम हुइना तालिममे होमस्टे संचालकहुक्रे होमस्टे सचालन ओ व्यवस्थापनबारे जानकारी डेनाके साथे ओइने अपन अनुभवफे साटासाट कैना जनागिल बा ।
तालिम उदघाटन कार्यक्रममे शैलेश्वरी रिसर्च एण्ड कन्सल्टीङ प्रालि धनगढीके संचालक लालबहादुर देउवा, सुदूरपश्चिम प्रदेशके ६ जिल्लामे संचालन हुइल सामुदायिक होमस्टे संचालक, नीजि होमस्टे संचालकहुकनके उपस्थिति रहल बा ।
