द्रुत प्रतिकार्य टोली परिचालन कैना

पहुरा समाचारदाता
धनगढी, १८ असार । विपद जोखिम न्यूनिकरणके लाग जिल्लाके सक्कु स्थानीय तहमे द्रुत प्रतिकार्य टोली गठन करके परिचालन कैना जनागिल बा ।

जिल्ला विपद व्यवस्थापन समितिके शुकके रोज बैठल बैठकसे उ निर्णय हुइल प्रमुख जिल्ला अधिकारी किरण थापा बटैलै । कैलाली जिल्लाके सक्कु स्थानीय तहके प्रमुख, सुरक्षा निकायके पमुख, राजनीतिक दलके प्रतिनिधिहुकनके उपस्थितिमे हुइल बैठकसे विपद्के अवस्थामे तत्काल राहत तथा उद्धार कार्यमे परिचालित हुइना करके तयारी अवस्थामे रहन सक्कु स्थानीय विपद् व्यवस्थापन समितिहे अनुरोध कैना निर्णय हुइल बा ।

आपतकालीन प्रतिकार्यके लाग आवश्यक सामग्री सहित खोज उद्धार तथा राहत वितरण कार्यमे तत्काल खटे सेक्ना करके जिल्लास्थित सक्कु सुरक्षा निकाय तयारी अवस्थामे रहना, साथे आवश्यता अनुसार उ कार्यमे टमान विषयगत क्षेत्र, सम्बन्धित गैह सरकारी संस्था तथा निजी क्षेत्र सहयोगके लाग अनुरोध कैना निर्णय हुइल प्रमुख जिल्ला अधिकारी थापा जनैलै ।

बाढके समयमे लडियामे नालामे मच्छी मर्ना, पौडी खेल्न, कठुवा, काठी संकलन जैसिन कार्य निषेध कैना निर्णय हुइल बा । आपतकालीन पूर्व सूचनाके लाग राष्ट्रिय आपतकालिन कार्य संचालन केन्द्र ओ जिल्ला आपतकालिन कार्य संचालन केन्द्रसे प्रेशित हुइना लग्गेक लडिया कुलुवामे पानीके बहावके सूचना लेके लडियक सतह बह्रलेसे तरेक तटीय क्षेत्रके वासिन्दाहुकनहे सुरक्षित रहन सूचना प्रवाह कैना कहल बा । ओकर रेडक्रस, स्थानीय सञ्चार माध्यम, यूएन ऐजेन्सी विकास साझेदार संघसंस्थाहे अनुरोध कैना निर्णय हुइल बा ।

जिल्ला विपद् व्यवस्थापन समिति ओ स्थानीय विपद् व्यवस्थापन समितिसे मौसम सम्बन्धि जानकारीके लाग जल तथा मौसम विज्ञान विभागके वेभसाईट hydrology.gov.np/ गृह मन्त्रालयके वेभसाईट drrportal.gov.nplgoldt अवलोकन करके मौसम सम्बन्धि जानकारी लेना/डेना जिल्ला विपद व्यवस्थापन समिति बैठकसे निर्णय हुइल बा ।

विपद्के समयमे राजमार्ग ओ सहायक राजमार्ग बाढ पहिरो कारणसे बन्द हुके आवागमन अवरुद्ध हुके जनजीवन प्रभावित हुइना अवस्थाहे मध्यनजर करके राजमार्गके हकमे डिभिजन सडक कार्यालय, जिल्ला ट्राफिक कार्यालय ओ सुरक्षा निकायसे ओ सहायक राजमार्गके हकमे सम्बन्धित स्थानीय तह ओ स्थानीय सुरक्षा निकायहे अनुरोध कैना कहल बा ।

जिल्ला विपद् व्यवस्थापन समितिके मिति जेठ ११ गतेके निर्णय अनुसार बेमौषमी वर्षाद्के कारण धानवालीमे हुइल क्षति बापतके राहत रकम जिल्लाके सक्कु स्थानीय तहमे राहत रकम पठाई रहे । मने सम्बन्धित स्थानीय तहसे राहत विवरण करल कागजात जिल्ला प्रशासन कार्यालयमे हालसमफे प्राप्त नइहुइल ओरसे राहत वितरण कैना बाँकी रहल हुइलेसे उ फे वितरण करके ओकर कागजात यिहे असार २५ गते भिटर अनिवार्य रुपमे जिल्ला प्रशासन कार्यालय कैलालीमे पठैना अनुरोध करल बा ।

कैलाली जिल्लाके टमान ठाउँमे घटल विपदके घटना (बाढ, आगलागी ओ हावाहुरी) से प्रभावित हुइल २८ जनहनहे वितरण करल राहत बापतके रकम रु. ४ लाख ३५ हजारहे समर्थन कैना ओ अइना दिनमेफे यी समितिके बैठकसे पपाछे समर्थन कैना करके विपद पीडितहे स्वीकृत मापदण्ड भिटर रहिके राहत उपलब्ध करैना जिल्ला प्रशासन कार्यालय कैलालीहे कार्यादेश डेना कहल बा ।

ओस्टेक करके यी वर्षके लागि तयार पारल मनसून पूर्वतयारी तथा प्रतिकार्य योजना, २०७९ ओ जिल्ला बिपद् पूर्वतयारी तथा प्रतिकार्य योजना २०६८ (११ औ अद्यावधिक २०७९) अनुमोदन कैगिल बा ।

उ मनसून पूर्वतयारी तथा प्रतिकार्य योजना, २०७९ ओ जिल्ला बिपद् पूर्वतयारी तथा प्रतिकार्य योजना २०६८ (११ औ अद्यावधिक २०७९, के अध्यावधिक कैना कार्यमे सहयोग कैना कार्यदलके संयोजक सहायक प्रमुख जिल्ला अधिकारी यज्ञराज जोशी, नेपाल रेडक्रस सोसाईटी कैलाली, मर्सिकोर नेपाल कैलाली, वर्ल्ड भिजन ईन्टरनेशल धनगढी, लुथरन विश्व फेडेरेशन धनगढी, यूएनडिपी, प्रेक्टिकल एक्सनलगायत सहयोग कैना सक्कु व्यक्ति तथा संस्थाहे धन्यवाद ज्ञापन कैना निर्णय हुइल बा ।