बसन्ता ओ रामपुर पुलके अनुगमन, तुरुन्त व्यवस्थापन कैना प्रतिबद्धता
पहुरा समाचारदाता
हसुलिया, १८ असार । कैलालीके कैलारी गाउँपालिका वडा नम्बर ७ मे रहल कटैनी लडियामे आइल बाढसे भत्काइल बसन्ता ओ रामपुर पुलके अनुगमनके अनुगमन करल बा ।
गाउँपालिकाके अध्यक्ष राजसमझ चौधरी शनिच्चरके सकारे उ पुलके अनुगमन करले बटै । दुनु पुलके अनुगमन करटी अध्यक्ष चौधरी तुरुन्ते व्यवस्थापन कैना प्रतिवद्धता जनाएको गाउँपालिकाके प्रवक्ता तथा वडा नम्बर ७ अध्यक्ष दिपेन्द्र बहादुर बम बटैलै । आधा पुहल पुलहे संचालन कैना सामुुदायिक वनसंग समन्वय करके कठुवाके व्यवस्था कैना ओ लग्ना खर्च पालिकासे व्यहोर्ना करके हाली व्यवस्थापन कैना अध्यक्ष प्रतिबद्धना जनैले बटै ।
अनुगमनमे नेपाली काँग्रेस कैलारी गाउँपालिका अध्यक्ष कृष्णप्रसाद चौधरी, पार्टीके क्षेत्रीय सचिव रमेश चौधरीके फे उपस्थिति रहल रहे ।महत्वपूर्ण कृषि सडकके काठे पुल भत्काइलपाछे स्थानीयवासी जोखिम मोलके ओहोरदोहोर कैना बाध्य हुइल बटै ।
कैलारी गाउँपालिका–७ रामपुरस्थित कटैनी लडिक पुल बाढसे भत्काके आधा पुहाइलपाछे भुईयाँफाँटा, रामपुर, तिघरी गाउँके किसान जोखिम मोलके ओहोरदोहोर कैना बाध्य हुइल बटै ।
बिफेक रोज आइल बाढ उ कठुवक पुल भत्काके पुहाइल रहे । खेतीपातीके चटारो चलल बेला पुल पुहलपाछे स्थानीयहे ओहोरदोहोर कैना समस्या हुइल बा । रोपाइँके बेला दुनु ठाउँक पुल पुहलपाछे स्थानीयहे ओहोरदोहोर कैना बहुट सास्ती हुइल बा । ओइने कठुवक पुल नाघे खेतुवासम जैना करल बटै ।
