असार २५ गतेभिटर बाढपीडितहे राहत बँटना निर्देशन
पहुरा समाचारदाता
धनगढी, १९ असार । बाढसे क्षति व्यहोरल बाढपीडित किसानहुकनहे राहत वितरण कैके स्थानीय पालिकाहे यिहे असार २५ गतेभिटर विवरण बुझैना जिल्ला विपद् व्यवस्थापन समिति आग्रह करले बा । गैल बरसके कुवाँर–कार्तिकमे आइल बाढसे क्षति व्यहोरल किसानहुकनहे क्षतिपूर्ति व्यहोरे परल रहे ।
जिल्ला विपद् व्यवस्थापन समितिके मिति जेठ ११ गतेके निर्णय अनुसार बेमौषमी वर्षाद्के कारण धानवालीमे हुइल क्षति बापतके राहत रकम जिल्लाके सक्कु स्थानीय तहमे राहत रकम पठासेकल बा । जिल्ला विपद् व्यवस्थापन समितिके संयोजक सहायक प्रमुख जिल्ला अधिकारी यज्ञराज जोशी कैलाली जिल्लामे ८३ हजार ३ सय ६५ जाने बाढ पीडित किसानहुकनके लाग राहत स्थानीय पालिकामे राहत रकम पठाइल बटैलै ।
गैल बरसके कुवाँर–कार्तिकमे आइल बाढसे क्षति व्यहोरल किसानके तथ्याङक संकलन सम्बन्धित वडामे कैगिल रहे,’ समितिके संयोजक जोशी कहलै, ‘कैलालीके १३ पालिकामे बाढसे १४ लाख ६ हजार ८७८ कटठामे लगाइल धानवली क्षति पुगल तथ्याङक आइल रहे । जिल्ला विपद् व्यवस्थापन समिति उहे तथ्याङकहे आधार मानके राहत पठैले बा ।’
जिल्ला विपद् व्यवस्थापन समितिके संयोजक जोशी कैलालीके १३ स्थानीय पालिकाहे २१ करोड करोड ६६ लाख ३४ हजार ६६२ रुप्या क्षतिपूर्तिके लाग रकम पठाइल बटैलै ।
जिल्ला विपद् व्यवस्थापन समितिमे कैलारी गाउँपालिकासे १० हजार ७७१ परिवारके २ लाख ३२ हजार ७४६ कटठामे लगाइल धानवाली क्षति पुगल रहे । यी पालिकामे ३ करोड २१ लाख ६२ हजार ७७१ रुप्या राहत रकम पठाइल बा । गोदावरी नगरपालिकामे ४ हजार ९ सय ३१ परिवारके ७४ हजार ५८६ कटठाके धानवाली क्षति हुइल बा । यहाँ १ करोड २६ लाख ३१ हजार ७३३ रुप्या राहत रकम पठाइल बा ।
चुरे गाउँपालिकामे ८ सय ८४ परिवारके ९ हजार ८२७ कटठाके धानवली नष्ट हुइल बा कलेसे यहाँ १८ लाख ३४ हजार ७६८ रुप्या राहत रकम पठाइल बा । धनगढी उपमहानगरपालिकामे १२ हजार २५९ किसानके २ लाख ५ हजार ९ सय कटठामे लगाइल धानवाली नष्ट हुइल बा । यहाँ ३ करोड २२ लाख ५२ हजार ८२० रुप्या राहत रकम पठाइल बा ।
ओस्टेक टीकापुर नगरपालिकामे ६ हजार ५३५ किसानके १ लाख ४७ हजार ९२७ कटठामे लगाइल धानवालीमे क्षति पुगल बा । यहाँ १ करोड ९८ लाख ९५ हजार ३६५ रुप्या राहत रकम पठाइल बा ।
मोहन्याल गाउँपालिकामे १ हजार ५५ घरपरिवारके १५ हजार ८०५.५० कटठामे लगाइल धानवाली नष्ट हुइल रहे । यहाँ २४ लाख १९ हजार ७१५ रुप्या रकम पठाइल समिति जनैले बा । लम्कीचुहा नगरपालिकामे १० हजार १७१ घरपारिवारके १ लाख ३४ हजार ४३४.७५ कटठामे लगाइल धानवाली नष्ट हुइल रहे । यहाँ २ करोड ३६ लाख ४८ हजार ४७०.७५ रुप्या राहत रकम पठाइल रहे ।
ओस्टेक भजनी नगरपालिका १० हजार ८७ घरपरिवारके २ लाख ८ हजार ३९५.२९ कटठाके लगाइल धानवाली नष्ट हुइल हुइल बा । यहाँ २ करोड ९२ लाख ४२ हजार ३९१.५५ रुप्या राहत रकम पठाइल बा ।
जोशीपुर गाउँपालिकाके २ हजार २८० परिवारके १९ हजार १४२.५२ कटठामे लगाइल धानवालीमे क्षति पुगल रहे । यहाँ २७ लाख १६ हजार ८५४.५० रुप्या राहत रकम पठाइल रहे ।
ओस्टे घोडाघोडी नगरपालिकामे ११ हजार ४६१ घरपरिवारके १ लाख ५० हजार ६७७.१० कटठामे लगाइल धानवालीमे क्षति हुइल बा । यहाँ २ करोड ६७ लाख ७९ हजार १७६.५० रुप्या राहत रकम पठाइल बा । जानकी गाउँपालिकामे ३ हजार ९६१ घरपरिवारके ७२ हजार ९९४.१६ कटठामे लगाइल धानवाली नष्ट हुइल बा । यहाँ १ करोड ८ लाख ७ हजार २३२.३० रुप्या राहत रकम पठाइल बा ।
ओस्टेक करके बर्दगोरिया गाउँपालिकामे २ हजार ५३७ घरपरिवारके ३७ हजार ९०३.७५ कटठामे लगाइल धानवाली नष्ट हुइल बा । यहाँ ६१ लाख १५ हजार १८.४५ रुप्या राहत रकम पठाइल समिति जनैले बा ।
जिल्ला विपद् व्यवस्थापन समिति स्थानीय तहसे राहत विवरण कैके कागजात जिल्ला प्रशासन कार्यालयमे बुझैना कहल रहे । मने हालसमफे वितरण करल कागजात प्राप्त नइहुइल संयोजक जोशी बटैलै ।
राहत वितरण कैना बाँकी रहल हुइलेसे उ फे वितरण करके ओकर कागजात यिहे असार २५ गते भिटर अनिवार्य रुपमे जिल्ला प्रशासन कार्यालय कैलालीमे पठैना निर्देशन डेहल उहाँ जनैलै ।
किसानहे क्षतिके आधारमे १० कटठासे कम जमिन क्षति हुइलहे प्रतिकटठा ३१५, ११ से ६० कटठासम्म क्षति हुइलहे रु १२५, ओ ६० कटठासे उप्पर क्षति हुइल किसानहे रु ७५ प्रति कटठा रकम वितरण सुरु करल बा ।
