रेशमहे गठबन्धनमे नन्ना शीर्ष नेतनके कसरत

पहुरा समाचारदाता
काठमाडौं, १९ असार । जनता समाजवादी पार्टी नेपालके कार्यकारिणी सदस्य एवं सांसद रेशम चौधरी टीकापुर घटनाके आरोपमे जेलमे बटै । उहाँ जेलमे हुइलेसेफे राष्ट्रिय राजनीतिमे एक खालके चर्चामे बटै । जसपा विभाजनके शृखला होए या अपने पार्टी गठनके अवस्था होए, उहाँ चर्चामे रहटी आइल बटै ।

पछिल्का समय अपन गोसिनीयके नाउँमे नागरिक उन्मुक्ति पार्टी खोलसेकलपाछे उहाँक चर्चा थप बह्रल बा । टमान पार्टीके शीर्ष नेता दिनहुँ जैसिन उहाँहे भेटे जेलभिटर जैटी रहल बटै ।

चुनावी गठबन्धनके लाग शीर्ष नेता जेलमे जाके रेशम चौधरीसंग छलफल कैना सुरु करल बटै । कुछ दिन आघे लोसपाके अध्यक्ष महन्थ ठाकुर उहाँहे भेटे जेलमे गैल रहिट । रेशम चौधरीहे उहाँ चुनावमे सहकार्यके लाग प्रस्ताव करल स्रोत जनैले बा ।

अपने मुद्दा फिर्ता ओ जेलसे रिहाइके लाग अभिनसम लरटी रहल कहटी ठाकुरसे रेशम चौधरीसंँग अइना चुनावमे सहकार्यके प्रस्ताव करल स्रोतके कहाई बा । मने लोसपाके नेता मनिष मिश्र अपन पार्टीके अध्यक्ष ठाकुर गठबन्धनके लाग नइहुके रेशम चौधरीके रिहाइके लाग हुइल संघर्षके अवस्था ओ प्रक्रियाके बारेमे छलफल करे गैल दाबी करलै । उहाँ कहलै, लोसपा रेशम चौधरीके रिहाइके लाग प्रयास करटी रहल बा, उ प्रयास कहाँसम पुगल, ओकर प्रकृया का का हुइटी रहल बा । लगायतके विषयमे जानकारी डेना अध्यक्षजी रेशम चौधरीहे भेटे जेलमे गैल रहिट ।

रेशम चौधरी अलग पार्टी बनैलेसेफे लोसपासे उहाँक रिहाइके लाग पहल करटी रहल मिश्रके कहाई बा । उहाँ कहलै, रेशम चौधरी लोसपा (साविकके राजपा) मे रहेबेर थुनामे परल हुइट, टबमारे रेशम चौधरीके रिहाइ लोसपाके दायित्व हो । उ आघे जनमत पार्टीके अध्यक्ष सीके राउतफे रेशमहे भेटे जेलमे पुगल रहिट । उहाँ जनमत ओ उन्मुक्ति पार्टीबीच चुनावी गठबन्धनके लाग प्रस्ताव करल उ पार्टीके महासचिव चन्दन सिंह बटैलै । उहाँ कहलै, हमार पार्टीके अध्यक्ष राउतजी रेशम चौधरीहे भेटके सहकार्यके लाग प्रस्ताव करले बटै, ओम्ने रेशमजी सकारात्मक बटै ।’

उ बाहेक, जसपाके नेता फे रेशम चौधरीहे भेटे जेलमे जैटी रहल बटै । रेशम चौधरी निकट नेतनके अनुसार कबु कबु काँग्रेस, माओवादी, एमालेके नेता फे भेटे अइटी रहल बटै । जेलमे सबसे ढेर राजनीतिक चहलपहल रेशम चौधरीके रहठ । उहाँ अपन पार्टीके सक्कु गतिविधि जेलसे सञ्चालन करल रहठै । उहाँ दिनभर भेटघाटमे व्यस्त रहठै ।