प्रदेश स्वास्थ्य प्रवर्द्धन तारा छनौट सुरु

पहुरा समाचारदाता
धनगढी, २० असार । सामाजिक विकास मन्त्रालय, प्रादेशिक स्वास्थ्य प्रवर्द्धन केन्द्र कञ्चनपुरके आयोजनामे धनगढीमे सोम्मारके रोजसे ‘प्रदेश किशोर/किशोरी स्वास्थ्य प्रवद्र्धन तारा’ छनोट कार्यक्रम सुरु हुइल बा ।

छनौट कार्यक्रममे सुदूरपश्चिम प्रदेशमे १९ जाने किशोर/किशोरीहुकनके सहभागिता रहल बा । कार्यक्रममे बजुरा ओ बझाङ जिल्लाके सहभागिताभर नैरहल स्वास्थ्य प्रवर्द्धन केन्द्रके प्रमुख हेमराज खड्का बटैलैं । उहाँक अनुसार उ कार्यक्रमके लाग प्रदेश सरकारसे ३ लाख ५० हजार बजेट छुट्याइल रहे ।

‘करि किशोर/किशोरीके स्वास्थ्यमे लगानी, पाइ स्वास्थ्य जिन्दगानी’ नारासहित हुइटिरहल कार्यक्रममे काल्ह (मंगरके राज) १ जाने किशोर ओ १ जाने किशोरीहे ‘प्रदेश स्वास्थ्य प्रवद्र्धन तारा’ छनौट करजाइ ।

कार्यक्रमके सामाजिक विकासमन्त्री गोबिन्दराज बोहरा एक कार्यक्रमके बीच उद्घाटन करले रहैं । कार्यक्रममे मन्त्री बोहरा किशोरावस्थामे सोच, बुद्धिके विकास, शरीरमे हार्माेनिक ओ मनोवैज्ञानिक परिवर्तन हुइना हुइल ओरसे यी उमेर समूह अति संवेदनशील रहल बटैलैं रहैं । उहाँ यी उमेर समूहहे शिक्षा, स्वास्थ्य, संस्कृति, सभ्यता, भाषाशैलीके सुधार करेपरना बटैलैं रहैं । उहाँ कलैं, “अब्बेक किशोर/किशोरीनके काँधमे ढिरेसे समाजके जिम्मेवारी आइटा टबेमारे यी उमेर समूहहे सवल बनैना हमार सबके जिम्मेवारी हो ।”

ओस्टेके, कार्यक्रममे सामाजिक विकास राज्यमन्त्री टेकबहादुर रैका किशोरावस्थामे सकारात्मक विचार तथा मजा संगतमे लागे परनामे बटैले रहैं । उहाँ कलैं, “किशोर/किशोरीहुकनके उज्ज्वल भविष्यके लाग सकारात्मक विचार तथा मजा संगतमे लागे परना आवश्यक बा ।” उहाँ प्रदेश सरकार किशोर/किशोरीहुकनके शिक्षा, स्वास्थ्य, आर्थिक, समाजिक विकासके लाग प्रदेश सरकार सहयोग करना प्रतिवद्धता व्यक्त करले रहैं ।

कार्यक्रममे सामाजिक विकास मन्त्रालय जनस्वास्थ्य महाशाखाके दयाकृष्ण पन्त किशोरावस्था जीवनके महत्वपूर्ण रहल ओरसे समयके व्यवस्थापन करना, असल संघरियनसँगके संगत, कुलतओर नैवहकना, पह्राइमे निरन्तरता डेहे परना, काममे दक्षता प्राप्ति करना, भविष्य मजा बनैनाओर लग्ना, हतार ओ निरास नैहोके जोश जागरके साथ काम करना, सकारात्मक सोच्न, अभिभावक तथा समुदायप्रति चनाख ओ संवेदनशील हुइ परना बटैलैं । उहाँक अनुसार विश्व स्वास्थ्य संगठन १० वर्षसे लेके १९ वर्ष उमेर समूहके मनैन्हे किशोरावस्था कले बा ।

कार्यक्रममे किशोरावस्था समस्या, चुनौती ओ समाधान विषयमे समूह छलफल ओ प्रस्तुति, स्वास्थ्य जीवनशैली, स्वास्थ्य व्यवहार, स्वास्थ्य विकासके आधार आदि विषयमे वहस, किशोर/किशोरी स्वास्थ्य प्रवर्द्धन तथा राजनीतिक ओ विकास विषयक प्यानल छलफल, ‘करि किशोर/किशोरीके स्वास्थ्यमे लगानी, पाइ स्वास्थ्य जिन्दगानी’ विषयक वक्तित्वकला, किशोर/किशोरी व्यक्तिगत प्रतीभा कार्यक्रम हुइना केन्द्रके प्रमुख खड्का जानकारी करैलैं ।

छनौट कार्यक्रममे कानून अधिकृत दानबहादुर सुनार, जनस्वास्थ्यविज्ञ शंकर धामी ओ समाजशास्त्रविद् शेरबहादुर विष्ट निर्णायक बटैं बलेसे केन्द्रके प्रमुख हेमराज खड्का ओ दीपा रावत सहजकर्ता रहल बटैं ।

एकओर भर असार मसान्तमे आके सीमित सहभागी बोलाके कार्यक्रम करल कटि आलोचना हुइल बा । कार्यक्रममे धनगढीके अधिकांश किशोर/किशोरी फेन यी कार्यक्रमबारे जानकारी समेत नैपाइल गुनासो करले बटैं ।