गठबन्धन सरकारसे देशमे आर्थिक संकटः पोखरेल
पहुरा समाचारदाता
धनगढी, २१ असार । नेकपा एमालेके महासचिव शंकर पोखरेल गठबन्धन सरकारसे देशमे आर्थिक संकट पैदा करल आरोप लगैले बाटै । मंगरके धधनगढीमे प्रेस चौतारी कैलालीसे आयोजना करल पत्रकार सम्मेलनमे उहाँ ओइसीन अरोप लगाइल हुइट ।
एमाले नेतृत्वके सरकारहे विस्थापित करलपाछे मुलुक दुष्परिणाम व्यहोरटीरहल समेत उहाँ बटैलै । मुलुक बचतके अवस्थामे रहे मने आज झण्डे दुई खर्बके घाटामे पुगल उहाँ बटैलै ।
गठबन्धन सरकारसे ९ महिनामे अर्थतन्त्र डामाडोल पार डेहल समेत उहाँ अरोप लगैलै । एमालेहे विस्थापित करेबर मुलुक दुर्भाग्य बेहोरना बाध्य हुइल बा । अर्थतन्त्र डामाडोल बा । मूल्यवृद्धि अत्यधिक बा । पुँजीगत खर्च लकडाउनसे फेन खराब हुइल बा उ अर्थमे ५ दल असफल हुइल उहाँ बटैलै ।
नेकपा एस ओ माओवादीहे लक्षित कैटी उहाँ नेपाली कांग्रेसके साथ लागलहुक्रे कम्युनिष्ट नैरहल जिकिर करलै । गठबन्धन सरकार पूर्णरूपमे असफल हुइल पोखरेलके कहाइ बा ।
करके दरमे हेरफेर कैके सीसीटिभी फुटेज नस्ट कैना अर्थमन्त्री जनार्दन शर्माके नीतिगत भ्रष्टाचार हुइल समेत उहाँ औंल्याइल रहिट । यम्ने प्रधानमन्त्री शेरबहादुर देउवाके फेन मिलेमतो रहल पोखरेलके कहाइ रहे ।
यम्ने प्रधानमन्त्रीके फेन मिलेमतो हुइल ओरसे हाली इ विषयमे छनबिन कैके कारबाही करे पर्ना उहाँ बटैलै । स्थानीय तहके निर्वाचनमे पूर्णरूपमे घेराबन्दी कैके एमालेहे ओरैना रणनीति पाँच दलके रलेसे फेन उ असफल हुइल उहाँ बटैलै । आगामी निर्वाचनमे एमाले आउर मजा नतिजा लन्ना पोखरेलके विश्वास रहल बा । ‘सरकार असफल बा ओकर विरुद्धमे हम्रे चुनावमे जाब । नेकपा एमालेहे बलगर शक्तिके रूपमे स्थापित कैके आघे बह्रब । अइना निर्वाचनमे बहुमत लानब’, उहाँ कहलै ।
