गोदावरीके सार्वजनिक सुनुवाई

पहुरा समाचारदाता
धनगढी, २१ असार । कैलालीके गोदावरी नगरपालिकाके सार्वजनिक सुनुवाई कार्यक्रम हुइल बा । आर्थिक वर्ष २०७८/०७९ के नगरमे हुइल कार्यक्रमके मंगरके रोज सार्वजनिक सुनुवाई हुइल हो ।

गोदावरी नगरपालिकाके आयोजना तथा प्रादेशिक सुशासन केन्द्र डोटीके आर्थिक सहयोग ओ नेपाल पत्रकार महासंघ कैलालीके सहजीकरणमे कार्यक्रम हुइल रहे । कार्यक्रमके सहभागीहुक्रे कार्यक्रमहे वडा तहसे करना सुझाव डेले रहैं ।

नगरपालिकाकके उपमेयर शारदा रोकाया सुशासनके लाग नगरपालिकामे किल नैहोके वडा–वडामे सार्वजनिक सुनुवाई करेपरना बटैलि । उहाँ वडा तहमे सार्वजनिक सुनुवाई करलेसे प्रभावकारी समेत हुइना बटैलि ।

कार्यक्रममे सहभागीसे आइल गुनासोहे प्रमुख प्रशासकीय अधिकृत बसन्त खत्री सम्बोधन जफाव डेले रहैं । उहाँ आर्थिक वर्ष २०७८÷०७९ के कार्यक्रमके बारेमे जानकारी करैले रहैं ।

कार्यक्रममे प्रमुख प्रशासकीय अधिकृत खत्री आर्थिक वर्ष २०७८/७९ मे हुइल प्रगति समीक्षा प्रस्तुत समेत करले रहैं । उहाँ आर्थिक वर्ष २०७८/७९ मे १ अर्ब १२ करोड ४६ लाख ११ बजार अर्थात ८७ दशमलव ९२ प्रतिशत आम्दानी हुइल बटैलैं ।

ओस्टेके, नगरपालिका प्रवत्ता तथा वडा नम्बर १ के अध्यक्ष गोपालदत्त भट्ट सार्वजनिक सुनुवाई कार्यक्रमसे सुशासन कायम करनामे सहयोग पुग्ना अपेक्षा व्यक्त करलैं । कार्यक्रममे नेपाली काँग्रेसके नेता लोकराज पाण्डेय (आगो) नगरपालिकामे हुइल कामके अनुगमन हुइ नैसेकल गुनासो करलैं । उहाँ नगरपालिकासे योजना डरना मने अनुगमनमे नैजैना करल कारण विकास निर्माणके काम दीर्घकालीन रुपमे टिके नैसेकल बटैलैं ।

कार्यक्रममे स्थानीय दीपक ओझा नरपालिकासे डेना अनुदान सहि ठाँउमे नैपुगल बटैलैं । उहाँ पहुँचके भरमे कृषि सामग्री वितरण हुइल ओरसे यकर अन्त्य हुइना आवश्यक रहल बटैलैं ।

पत्रकार भोजराज जोशी सहजीकरण कार्यक्रम नगरपालिकाके उपप्रमुख रोकायाके अध्यक्षतामे हुइल रहे ।