टीकापुरके विकासके लाग लगानी सम्मेलन कैबीः नगरप्रमख थारु

पहुरा समाचारदाता
टीकापुर, २२ असार । टीकापुर नगरपालिकाके नगर प्रमुख रामलाल डंगौरा थारु टीकापुरके समग्र विकासके लाग टीकापुर लगानी सम्मेलन कैना बटैले बाटै । टीकापुर जेसीजके २५औं स्थापना दिवसमे आयोजित कार्यक्रमके बर्का पहुना रहल उहाँ सम्बोधन कैटी ओइसीन बटाइल हुइट ।

‘युएनडीपी लगायतके संस्थासे छलफल हुइटी रहल बा, टीकापुरके समग्र विकासके लाग तीन महिनाभित्रे लगानी सम्मेलन करटी’ नगर प्रमुख थारु कहलै ‘इ सम्मेलनके माध्यमसे टीकापुरके समृद्धि, सुशासन ओ विकास हुइना बा ।’

उहाँ टीकापुर विकास समितिके गठन कैके स्व. खड्गबहादुर सिंहसे बनाइल टीकापुरके मास्टर प्लान अनुसार नै टीकापुरहे निर्माण करे पर्ना बटैलै ।

‘यहाँ सक्कु चीज बा, औद्योगिक क्षेत्रके जग्गा बा, कृषिके जग्गा बा, मास्टर प्लान बा’ उहाँ कहलै‘आब यहाँ फुलबुट्टा भरके टीकापुर बनैना हो, चोक चोकमे बाल उद्यान, वृद्ध मिलन केन्द्र ओ बगैंचा बनाइक लाग हम्रे आइल बाटी ।’

उहाँ टीकापुरके गुरुयोजना बिगारल बारे चिन्ता कैटी बिगरुइयनबारे समेत अध्ययन हुइटी रहल बटैलै ।‘टीकापुरके गुरुयोजना के बिगरले बावै, कुछ डाटा पैले बाटुँ, कुछ अध्ययन कैटी रहल बाटी’ नगर प्रमुख थारु कहलै‘हम्रहीनहे टीकापुरके युवानके साथ रहल बा, आब हम्रे टीकापुर बनैना हो ।’

टीकापुर जेसीजके आयोजनामे भदौ २४ ओ २५ गते हुइना क्षेत्र ‘घ’ सम्मेलनके लाग नगरपालिका सेक्नासम सहयोग कैना आश्वासन डेटी नगर प्रमुख थारु कहलै ‘इ कार्यक्रममे देशभरके युवा अइटी बाटै कना मै जानकारी पैले बाटुँ’ उहाँ कहलै ‘टीकापुरके पहिचानसँग जोरके हुइना कार्यक्रममे हमार पूर्ण सहयोग रही, हम्रे सहयोग करब ।’

कार्यक्रममे बोल्दै टीकापुर जेसीजके संस्थापक अध्यक्ष प्रा.डा. जगतबहादुर सिंह रावल टीकापुरके सन्देश देशभर पुगाइक लाग समेत क्षेत्र ‘घ’ सम्मेलन सफल पारे पर्ना बटैलै ।

टीकापुर जेसीज वर्ष २०२२ के अध्यक्ष टोपप्रकाश विकके अध्यक्षतामे हुइल कार्यक्रममे नेपाल पत्रकार महासंघके सुदूरपश्चिम प्रदेश समितिके अध्यक्ष योगेश रावल, जेसीजके पूर्व अध्यक्ष कृतिसिंह बम, कोहलपुर जेसीजके संस्थापक अध्यक्ष सम थापा, टीकापुर जेसीजके पूर्व अध्यक्षद्वय टेकराज रेग्मी, गणेशबहादुर साउँद, लायन्स क्लब इन्टरनेशनल ३२५ एन क्लस्टर चिफ नारायण प्रसाद न्यौपाने लगायत शुभकामना मन्तव्य राखल रहिट ।