बाजुराके बुढीगंगामे ६६.७५ प्रतिशत मत परल
पहुरा समाचारदाता
धनगढी, २३ असार । बाजुराके बुढीगंगा नगरपालिकाके चुनाव कडा सुरक्षाके बीच सम्पन्न हुइल बा । सक्कु मतदान केन्द्रमे बिहान ७ बजेसे शुरु होके साँझ ५ बजेसम मत परत मुख्य निर्वाचन कार्यलय बाजुरा जनैले बा ।
बुढीगंगामे नगरपालिका १३ हजार ६ सय ५९ मतदाता रहे । कुल मतदाताके ६६.७५ प्रतिशत मत परल जिल्ला निर्वाचन अधिकारी नवराज अवस्थी जानकारी करैले बटैं । वैशाख ३० गते हुइल चुनावमे ७५.५८ प्रतिशत मत परल रहे ।
बुढीगंगा ९ के त्रिशक्ति मतदान केन्द्रमे सामान्य विवादपाछे प्रहरी थप झडप हुइ नैडेना हवाइ फायर करले रहे । अन्य ठाउँम भर कौनो फेन विवाद नैहुइल जिल्ला प्रशासन कार्यालय बाजुरा जनैले बा । त्रिशक्ति मतदान केन्द्रमे फेन ३५ मिनेटसम मतदान रुकके फेन सञ्चालनमे आइल प्रमुख जिल्ला अधिकारी प्रकाशचन्द अधिकारी बटैलैं ।
बुढीगंगा नगरपालिकामे रहल १० ठो मतदान स्थलमे नेपाल प्रहरी, शसस्त्र प्रहरी, नेपाली सेना ओ राष्ट्रिय अनुसन्धान कैके एक स्थलमे एक सयसे ढेर सुरक्षाकर्मी परिचालन हुइल रहैं । मतदान स्थलके सुरक्षा नेतृत्व नेपाल प्रहरी, शसस्त्र प्रहरीके अधिकृत करले रहैं । १० ठो मतदान स्थल ओ १९ ठो मतदान केन्द्र रहल जिल्ला निर्वाचन कार्यलय बाजुरा जनैले बा । नगरप्रमुखमे नेपाली काँग्रेससे रंगबहादुर खाती ओ नेकपा एमालेसे रामबहादुर बानियाँ उम्मेदवार रहल बटैं । काँग्रेसके उम्मेदवार खातीहे गठबन्धनके समेत समर्थन रहल बा ।
वैशाख ३० मे निर्वाचन हुइल बुढीगंगा नगरपालिकामे विवादके कारण फेन मतदान करना निर्वाचन आयोग निर्णय करले रहे । वैशाख ३० मे हुइल चुनावमे बुढीगंगाके १० वडामध्ये ६ ठोमे विवाद हुइल रहे । वडा २, ३, ४, ५, ७ ओ ९ के केन्द्रमे मतदान स्वतन्त्र हुइ नैसेकल स्थानीयके कहाइ बा । २, ३, ५ ओ ९ वडाके मतदानस्थल एमालेके कार्यकर्ता नियन्त्रणमे लेले रहे कलेसे वडा ४ ओ ७ मे काँग्रेस कार्यकर्ता नियन्त्रणमे लेके अपन अनुकूल मतदान करले रहे । यी ६ ठो वडाके मतदानस्थलमे झडप, उम्मेदवारउप्पर कुटपिट ओ मतदाता लखेटल रहे ।
नगरपालिकाके वडा नम्बर ४ मे बुथ कब्जा कैके ९९ दशमलव ४१ प्रतिशतसम मत गिराइल रहे । एमाले कब्जा करल कहल २, ३, ५ ओ ९ मे प्रहरी मतेपटिका मतदान केन्द्रमे छोरके गैल रहे । मने काँग्रेससे कब्जा करल कहल ७ ओ ९ मे प्रहरी संरक्षण करटि रहे । बुढीगंगाके विवाद अध्ययन करना निर्वाचन आयुक्त सगुनशमशेर जबरासहितके टोली स्थलगत अध्ययन कैके फिर्ता गैल रहैं । निर्वाचन आयोगसे नगरपालिकाके चुनाव स्थगित कैके फेन निर्वाचन करना निर्णय करले रहे ।
