फियान नेपालसे शिवरत्नापुरबस्तीके अनुगमन ओ छलफल
पहुरा समाचारदाता
हसुलिया, २४ असार । फियान नेपालसे शिवरत्नापुरबस्तीके अनुगमन ओ खाद्य अधिकार समुहसे छलफल करले बा ।
शिवरत्नापुरबस्तीमे बाढी डुबानसे खेती योग्य जमिन कटानी पटानी हुइल क्षति, तटबन्धके अवस्था, झोलुगे पुलके समस्या ओ स्वास्थ्य समस्य बुझेक लाग फियान नेपालके सुदूरपश्चिम प्रदेश प्रमुख मुकुन्द रानाके नेतृत्वमे अनुगमन ओ खाद्य अधिकार समुहसे छलफल कैगिल हो । अनुगमनके क्रममे उहाँ शिवरत्नापुरबस्ती बाढके उच्च जोखिममे रहल ओरसे सरोकारवाला निकायके तुरुन्त ध्यान जाई पर्ना बटैले रहिट ।
ओस्टेक अनुगमन तथा छलफल कार्यक्रममे राष्ट्रिय मानव अधिकार आयोग सुदूरपश्चिम प्रदेश प्रमुख मोहनदेव जोशी बाढसे खेती योग्य जमिन पुहैटी लैगिलपाछे बस्तीमे उत्पादनयुक्त नास हुइटी गैल बटैलै ।
उहाँ कहलै, एक ओर बस्तीके खेतीयोग्य ओरैटी जाईटा ओर बस्तीफे पुरे जोखिममे रहल बा ।’ बस्तीबारे जानकारी डेटी खाद्य अधिकार समुहके सचिव कमलप्रसाद चौधरी खेती योग्य जमिन लडियासे कटनाके साथे बालु थोपारके मरुमुमी बनाइल बटै ।
समुहके सदस्य सन्तराम चौधरी लडिक बाढ खेतीयोग्य जमिनहे मरुभुमिमे परिणत करलपाछे यी बरस धानफे नइलगाइल बटैलै । ओस्टेक छलफल कार्यक्रममे सुदेशी चौधरी, विप्ती चौधरी, सिमा चौधरीफे गाउँ डुबान ओ पटानमे जोखिम बह्रटी गैल बटैलै ।
