अनुगमन टोलीसे सम्पन्न योजनाके अनुगमन

पहुरा समाचारदाता
हसुलिया, २४ असार । कैलालीके कैलारी गाउँपालिकामे विकास निर्माणके सम्पन्न योजनाके गाउँपालिका स्तरीय अनुगमन समुहसे अनुगमन करले बा ।

गाउँपालिका उपाध्यक्ष तथा अनुगमन समिति संयोजक भगवतीकुमारी चौधरी सहित प्राविधिक टोली विफेक रोज सम्पन्न योजनाके स्थलगत अनुगमन करल हो । गाउँपालिका स्तरीय अनुगमन समुहसे आर्थिक वर्ष २०७८/७९ के बजेटसे पालिकाके टमान वडामे सञ्चालित निर्माण हुइल योजनाके गुणस्तर हुइल/नहुइल बारेमे अनुगमन करल समिति संयोजक भगवतीकुमारी चौधरी बटैली ।

गाउँपालिका स्तरीय अनुगमन समुहसे कैलारी गाउँपालिका वडा नम्बर १ विसनपुरमे गाउँपालिकाके समपुरक कोषके २० लाख बजेट निर्माण हुइल सभा हलके अनुगमन करल बा । वडा ाम्बर १ के अधुरो कालीमाई मन्दिर निर्माण सम्पन्न हुइल बा । यकर लाग ५ लाख ६० हजार बजेट विनियोजन करल रहे । ओस्टेक विसनपुर सामुदायिक घर ११ लाख ५० हजारमे निर्माण सम्पन्न हुइल बा । गैल बरस ६ लाख ओ यी बरस ५ लाख ५० हजार बजेट विनियोजन हुइल रहे । प्रदेश पूर्वाधार अन्र्तगत १० लाख बजेटमे वडा–२ मे रहल हरियाली यूवा क्लव भवन कलवके अनुगमन करल बा ।

कैलारी–२ के जनचेतना सहकारी संस्था लिमिटेडके भवन अनुगमन हुइल बा । उ भवन १५ लाख बजेटमे निर्माण हुइल बा ।
ओस्टेक करके कैलारी गाउँपालिका वडा नम्बर २ लक्कड झोलुङे पुल अनुगमन करल बा । निर्माणधिन अवस्थामे रहल उ पुलके लटठा विसाइल बा । बसन्ता बहुउद्देश्यीय सहकारी संस्था लिमिटेडके भवन निर्माणके अनुगमन हुइल बा । यकर लाग १२ लाख बजेट विनियोजन हुइल योजना शाखा प्रमुख सन्तोषकुमार चौधरी बटैलै ।

अनुगमन समुहसे वडा नम्बर ७ सवडिभिजन वन कार्यालय बसन्ताके सम्पन्न भवनके अनुगमन करले बा ।

वडा–७ भुइयाँफाटाके श्री मानवहंस धर्म सेवाके भवन निर्माणके अनुगमन करल बा । पूर्वाधार विकास कार्यक्रम यी भवन बनल हो ।

ओस्टेक करके भेटनरी अस्पताल तथा पशुसेवा विज्ञ केन्द्र धनगढी कैलाली ओ कैलारी गाउँपालिकाके साझेदारीमे बंगुर मागमे आधारित बंगुर विकास कार्यक्रम के लाग खोर निर्माणके अनुगमन करल पशु शाखाके सूर्यप्रसाद चौधरी बटैलै । खोर निर्माण वडा–४ मे दुई ठो, वडा–६ मे एक ठो, वडा नम्बर ९ मे २ ठो, वडा–२ लक्कडमे एक, कैलारी–७ मे एक ठो वडा–५ मे तीन ठो सम्पन्न खोरके अनुगमन करल बा । खोर निर्माणके लाग भेटनरी अस्पताल तथा पशुसेवा विज्ञ केन्द्र धनगढी कैलालीके ३० लाख ओ कैलारी गाउँपालिकाके १५ लाख बजेट रहल रहे । यम्ने १० प्रतिशत अनुदान रहे । अनुगमनके क्रममे स्टीमेट अनुसार काम हुइल पाइल पशु शाखाके सूर्यप्रसाद बटैलै ।

भौतिक पूर्वाधार विकासके अनुगमन टोलीमे गाउँपालिका उपाध्यक्ष तथा अनुगमन समिति संयोजक भगवतीकुमारी चौधरी, सदस्य सचिव सन्तोषकुमार चौधरी, पूर्वाधार विकास समिति संयोजक तथा वडा नम्बर ६ के अध्यक्ष प्रेमबहादुर चौधरी, वडा नम्बर ९ के अध्यक्ष खेमराज चौधरी, समितिके सदस्य सुनिला चौधरी, प्राविधिक अस्सिटेन्ट सवइन्जिनियर सुनिल चौधरी सहभागिता रहल रहे ।

ओस्टेक सम्बन्धित वडामे योजनाके अनुगमन करेबेर आर्थिक विकास समिति संयोजक तथा वडा नम्बर ५ के अध्यक्ष विष्णुप्रसाद चौधरी, वडा नम्बर २ के विकास चौधरीके फे अनुगमनमे सहभागिता रहल रहे । गाउँपालिकामे विकास निर्माणके सक्कु योजनाके अनुगमन कैसेकल समितिके सदस्य सचिव तथा योजना शाखा प्रमुख सन्तोषकुमार चौधरी बटैलै ।