गोली प्रहारसे घाहिल जापानके पूर्वप्रधानमन्त्री आबेके निधन

काठमाडौं, २४ असार । गोली प्रहारपाछे गम्भीर घाहिल हुइल जापानके पूर्वप्रधानमन्त्री सिन्जो आबेके निधन हुइल बा । जापानी सञ्चार माध्यम एनएचके के अनुसार आबेके निधन हुइल हो । एनएचके सिन्जोके राजनीतिक दल लिवरल डेमोक्रयाटिक पार्टीके स्रोतहे उद्धृत करटि उहाँक निधन हुइल जनैले बा ।

नारा सहरमे भाषण करेबेर उहाँउप्पर आज (शुकके रोज) बिहान गोली प्रहार हुइल रहे । उहाँक छातीमे गोली लागल रहे । तत्काल एम्बुलेन्समे डारके लैगिल रहे । उहाँ नारामे पुनः हुइना निर्वाचनके लाग प्रचारप्रसारके क्रममे भाषण करटि रहैं । एनएचकेसे डेहल जानकारी अनुसार अस्पताल पुगाइटसम बोल्टिरहल उहाँ ओकरबाद गम्भीर हुइटि गैलैं ।

आबेहे गोली मरुइया ४२ वर्षीय तेत्सुया यामागामीहे प्रहरी नियन्त्रणमे लेके अनुसन्धान सुरु करले बा । आबे ६७ वर्षके रहैं । उहाँ सन् २००६ से २००७ ओ सन् २०१२ से २०२० सम दुई चो प्रधानमन्त्रीके कार्यकाल सम्हरले रहैं ।