कैलाली जनपुस्तकालयके अध्यक्षमे फेरसे डा.जोशी निर्वाचित
पहुरा समाचारदाता
धनगढी,२५ असार । संस्कृतिविद् एवम् सामाजिक अभियन्ता डा.टिएन जोशी ऐतिहासिक कैलाली जनपुस्तकालयके अध्यक्षमे फेरसे निर्वाचित हुइल बटै । कैलाली जनपुस्तकालयके विकास ओ समृद्धिमे अहोरात्र खटल डा.जोशीहे पुस्तकालयके ४५ औं साधारण सभासे फेरसे अध्यक्षमे सर्वसम्मत चयन करल हो । साधारण सभासे और १० जाने सदस्यमे निर्वाचित हुइल बटै ।
साधारण सभासे शिवराज ओझा, टंकप्रसाद जोशी, जयराज जोशी, ठाकुर प्रसाद करियाप्रधान, सुशीला भट्ट, शेरसिंह खड्का, दुर्गा प्रसाद भण्डारी, टीआर पाठक, हर्क बहादुर बोहरा ओ सुभाष संकल्प भण्डारी सदस्यमे निर्वाचित हुइल निर्वाचन अधिकृत तेजबहादुर सिंह बटैलै ।
साधारण सभासे सचिव टंक जोशीके प्रतिवेदन ओ कोषाध्यक्ष गगनसिह ऐरके प्रतिवेदन पारित करल बा ।
यी आघे ४५ औं साथारण सभाके उदघाटन सामाजिक विकास राज्य मन्त्री टेक बहादुर रैका करले रहिट । उहाँ पुस्तकालय चेतनाके सम्वाहक ओ ज्ञान आर्जन करे सेक्ना थलोके रुपमे स्थापति हुइल बटैटी पुस्तकालयमे पछिल्का समयमे हुइटी रहल विकास ओ परिवर्तनके लाग धन्यवाद व्यक्त करलै ।
कैलाली जनपुस्तकालयके अध्यक्ष डा.टीएन जोशीके अध्यक्षतामे सम्पन्न हुइल कार्यक्रममे उदघाटन समारोहमे पूर्व अध्यक्ष उमाकान्त जोशी, प्राध्यापक जगन्नाथ जोशी, पूर्व अध्यक्ष घनबहादुर शाह ओ उपाध्यक्ष शिवराज ओझा मन्तव्य राखल रहिट ।
कैलाली जनपुस्तकालयके अध्यक्ष डा.टीएन जोशी गैल तीन वर्षमे कैलाली जनपुस्तकालयहे स्मार्ट एवम् सुदूरपश्चिमके नमूना बनैना कार्यहे तिब्रता डेले बटै । उहाँ तीन तले स्मार्ट लाइब्रेरी भवन निर्माण कार्यहे अन्तिम रूप डेले बटै । अध्यक्षमे फेरसे निर्वाचित हुसेकलपाछे डा.जोशी सक्कुहुकनके सल्लाहमे अपने आघे बह्रना ओ सुदूरपश्चिमके नमूना पुस्तकालय बनैना कार्यमे अपने सक्रिया रहना बटैलै । उहाँ पठन संस्कृतिके विकास, सांस्कृतिक कृयाकलापमे तिब्रता, राष्ट्रिय पुरस्कारके स्थापना, इ लाइब्रेरी व्यवस्थापन, पुस्तक खरिद, अतिथि कक्ष, अनुसन्धान कक्ष ओ बालकक्षके निर्माणमे जोड डेना बटैले बटै ।
