नागरिक उन्मुक्ति पार्टीमे प्रवेश करुइयाके ओइरो
पहुरा समाचारदाता
धनगढी, २५ असार । टमान पार्टी परित्याग करके नागरिक उन्मुक्ति पार्टीमे प्रवेश करुइयाके ओइरो लागल बा ।
कैलाली जिल्लामे भर्खर सम्पन्न स्थानीय तह निर्वाचनसे मजा स्थान लेना सफल हुइलपाछे भारी पार्टीके प्रभावशाली नेता कार्याकर्ताहुक्रे पार्टी परित्याग करके नागरिक उन्मुक्ति पार्टीमे प्रवेश करटी रहल बटै ।
भर्खर दुसा पलाइल मने जर महामजबुट रहल उ पार्टी कैलाली जिल्लाके चार स्थानीय तहके प्रमुख सहित ९९ सितमे निर्वाचित हुइलपाछे जनविश्वास बह्रलपाछे और पार्टीके नेता तथा नागरिक उन्मुक्ति पार्टीमे प्रवेश कैना बह्रल बा ।
शनिच्चर रोज कैलालीके लम्कीचुहामे नागरिक उन्मुक्तीसे पार्टीसे आयोजना करल पार्टी कार्यकर्ता भेटघाट, प्रशिक्षण तथा पार्टी प्रवेश कार्यक्रममे लम्कीचुहा नगरपालिका वडा नम्बर ३ के पूर्व वडा अध्यक्ष भक्तबहादुर चलाउने, नेकपा एमाले लम्कीचुहा नगरपालिका नगर उप–सभापति रामेश्वर चौधरी, नेकपा माओवादी केन्द्रके नेता पहलमान चौधरी, नेपाली काँग्रेस बर्दगोरिया गाउँ कार्यसमितिका उप–सभापति प्रमोद मल्ल लगायत सयौँ व्यक्ति नागरिक उन्मुक्ति पार्टीमे प्रवेश करले बटै ।
शनिच्चरके रोज केल नेपाली काँग्रेस, नेकपा एमाले, नेकपा माओवादी केन्द्र लगाएत टमान पार्टी छोरके ५ सय ८१ जाने नागरिक उन्मुक्ति पार्टीमे प्रवेश करल उ पार्टीके नेता गंगा डंगौरा बटैलै ।
लम्की स्थित जेसिस हलमे हुइल उ कार्यक्रममे नागरिक उन्मुक्ति पार्टीके केन्द्रीय अध्यक्ष रञ्जीता श्रेष्ठ चौधरी, केन्द्रीय उपाध्यक्ष, केन्द्रीय सदस्य, जिल्ला सदस्य लगाएतके उल्लेखनिय रुपमे कार्यकर्ता एवंम् पार्टी प्रति शुभचिन्तकहुकनके सहभागिता रहल रहे ।
रेशम चौधरीके गोसिनीया रञ्जीता श्रेष्ठ चौधरीके नेतृत्वमे रहल उ पार्टीमे अब्बे थारु समुदाय केल नइहुके पहाडी समुदायके व्यक्तिहुकनके फे पार्टी प्रवेश कैना क्रम बह्रटी रहल बा । स्थानीय निर्वाचनमे कैलालीके ४ पालिकाके नेतृत्व लेहल उ पार्टी अब्बे अइना प्रदेश ओ संघीय चुनावहे लक्षित करटी कार्यक्रम ओ संगठन विस्तारहे तिव्रता डेटी रहल बा ।
