शिवरत्नापुरबस्तीके १५ घरपरिवार बाढके उच्च जोखिममे
दुई परिवार सुरक्षित ठाउँमे टहरा बनाके सामान भगैटी
पहुरा समाचारदाता
धनगढी,२५ असार । गैल बरसके कुवाँर–कार्तिक महिनामे मोहना लडिक बाढ खेती योग्य भारी कटान कैटी धार बडलल । उहे दिनसे बाढके सन्त्रासमे बैठना बाध्य बाटी कैलाली जिल्लाके कैलारी गाउँपालिका वडा नम्बर ३ शिवरत्नापुर गाउँक सुदेशी चौधरी कहलै ।
उहे बाढ साइको सक्कु धान पुहाइल,’ सुदेशी कहलै, ‘बेमौसमी बाढ घर भित्रैना तयार कैना धान पुहैनाके साथे खेतीयोग्य जमिन कटल । विघौ जमिनमे बालु भर मरुभुमि बनाइल रहे ।’
गाउँबस्ती जोगाइक लाग गाउँपालिकाके आर्थिक सहयोगमे मोहना लडियामे २० लाखके भौतिक÷जैविक तटबन्ध बनैली, भर्खर निम्जल तटबन्ध असार महिना पहिल बाढ ओकर नामो निशान नइराखके सक्कु पुहाइल उहाँ कहलै ।
उहाँ कहलै, ‘तटबन्धसंगे मोहनासे ३० मिटर दुरीमे डयाम बनैले रही शुकके रात आइल बाढ उहो काटके लैगिलपाछे उठीबास हुइना अवस्था बा । लडियक धार सोझे गाउँओर बा । एकचोट्टे भारी बाढ आइले सामान भगैना हो की अपने भग्ना हो कना डर बा ।’
बाढके सन्त्रास एकओर बा, दुसरओर मोहना कटान तिब्र बनाइल कारण सुरक्षित ठाउँमे त्रिपालके घर बनाके सामान सरटी रहल सुदेशी बटैलै ।
सुदेशी संग्गे १५ घरपरिवारफे उच्च जोखिममे रहल कारण उहाँसंगे और घरपरिवारफे त्रिपाल अस्थायी टहरा बनाके सामान सर्ना बाध्य हुइल शिवरत्नापुरके स्थानीय कमलप्रसाद चौधरी बटैलै । बस्ती जोगाइक लाग भौतिक ओ जैविक तटबन्ध बनाइल रहे कमल कहलै, –‘असारके सुरु बाढसे पुहाके लैगिलपाछे तटबन्धके नामो निशान नइरहे । अबसिक १५ घरधुरीके उठिबास हुइना अवस्था कैडेहल । लडियक धार सोझे गाउँ ताकल कारण १५ घरधुरीसंगे भारी बाढ अइलेसे यी बस्तीके ९५ घरफे उच्च जोखिममे बा । भग्नाफे समस्या बा बा ।’
बस्तीहे जोगाइक लाग गाउँपालिकाके आर्थिक सहयोगमे १५ लाखके भौतिक तटबन्धके काम ओ विपद जोखिम न्यूनिकरण अन्र्तगत ५ लाखमे जैविक तटबन्धके काम सम्पन्न हुइल रहे । मोहना लडियक धार सोझे वस्ती टकाइल ओरसे भौतिक तटबन्धके काम बैशाख ६÷७ गतेसे सुरुवाट कैके गैल जेठ १५ गते सम्पन्न हुइल रहे ।
उहे बस्तीके विप्ती चौधरी भारी बाढ अइलेसे बुह्राइल मनै, गर्भवती, शसक्त, लर्कापर्का भगैना लाउफे नइरहल बटैली । उहाँ कहली, –‘पहिले गाउँमे कठुवक लाउ रहे । अब्बे उ सरके एक÷दुई फलिया केल बाँचल बा । सरोकारवाला निकायसे लाउके व्यवस्था कैले रहठ कलेसे बुह्राइल मनै, गर्भवती, शसक्त, लर्कापर्कन सुरक्षित घरसम भगैना सहजुल रहट ।’
गैल बरसके कुवाँर कार्तिक महिनामे आइल बाढ सम्झेबेर यी बरसके बाढ गाउँ पुहाई कना डर बह्रल उहाँ बटैठी ।
तटबन्ध निर्माण उपभोक्ता समितिके अध्यक्ष सन्तराम चौधरी यी बरसके बर्खाक बाढ गाउँपालिकाके लगानी ओ शिवरत्नापुुरबासीके मेहनत खेर गैल बटैलै । उहाँ कहलै, भौतिक तटबन्धके काम गैल जेठ १५ गते सम्पन्न हुइल रहे । भौतिक तटबन्धहे जोगाइक लाग जैविक तटबन्धके कामफे कैले रही । बरा मेहनत करके बनागिल भौतिक ओ जैविक तटबन्ध बाढ सक्कु पुहाके लैगिल ।’
गैल बरस कुवाँर–कार्तिकमे आइल बेमौसमी बाढसे काटके धारल सारा गाउँक धान पुहैनाके साथे खेती योग्य जमिन बलुटियामे परिणत करल शिवरत्नापुरके स्थानीय धानफे नइलगाइल समितिके अध्यक्ष चौधरी कहलै ।
