विशेषज्ञ सेवाके नाउँमे सेवाग्राहीहे ठग्टी रहल आरोप

पहुरा समाचारदाता
हसुलिया, २६ असार । कैलालीके कैलारी गाउँपालिकाके हसुलियास्थित एक अस्पताल विशेषज्ञ सेवाके नाउँमे सेवाग्राहीनहे ठग्टी रहल आरोप लागल बा ।

हसुलिया बजारस्थित मिरर हस्पिटलसे औषधोपचारके नाउँमे महंगा शुल्क असुलीके साथे बिरामीहे गलत रिपोर्ट डेके स्वास्थ्यउप्पर खेलवाड करटी रहल आरोप लागल हो ।

कैलारी गाउँपालिका १ हसुलिया गाउँके स्थानीय प्रदेशु चौधरी असार २२ गते अपन ८ महिनाके छाई अकांक्षा चौधरीहे जुरी ओ खोकीसे सटाइल पाछे लग्गे रहल उ अस्पतालमे भर्ना करल सुनैठै । उपचार हुइना आशमे महंगा शुल्कके बाबजुट असार २४ गतेसम अस्पतालमे रख्लै ।

प्रदेशु चौधरी कहठै, ‘अस्पतालक डाक्टर २ दिनसम धरलेसेफे छाईक स्वास्थ्य अवस्था सामान्य बटैटी रहल रहे । आकुर रख्न कहटी रहे । मने छाईक अवस्था झन–झन नाजुक बन्टी गैल रहे । उपचार शुल्क, औषधी, छातीके करल एक्स–रे शुल्क करके ९÷१० हजार ढेर उहे खर्च हुइल । मने छाईक अवस्थासे अपनेहुक्रनहे असाह्य हुइलपाछे जबरजस्ती डिसचार्ज मागल ओ असार २४ गते साँझ धनगढी लैगिली । धनगढीमे डेखाईबेर टे छाईहे निमोनिया संक्रमण हुसेकल बा । एक दिन अभिन मिररमे राखल हुइलसे छाईक हालत जा फे हुई सेकट ।’ उहाँ छाईक स्वास्थ्य अवस्थाके हाल सुधारोन्मुख रहल बटैलै ।
प्रदेशु चौधरीके अनुसार मिरर अस्पतालमे छातीके करल एक्स–रे समेत कामे नइलग्ना हुइल पाइल बटैलै । उहे एक्स–रे रिपोर्ट धनगढीमे डेखाईबेर कामे नइलग्ना हुइल पाइलपाछे उ अस्पतालसे उपचारके नाउँमे गाउँघरमे खुलेयाम ठग्टी रहल महसुस हुइल दुखेसो सुनैलै ।

खुलेयाम ठगल पत्ता पाइलपाछे स्थानीय असार २५ गते अस्पताल प्रशासनहे खबरदारी करले बटै । लागल उपचार खर्चसहित क्षतिपूर्ति डेहे पर्ना कहटी ओइने खबरदारी करल हुइट । स्थानीय अभियानकर्ता मनोज चौधरी विशेषज्ञ सेवाके नाउँमे गाउँघरमे गरिब निमुखा नागरिकके स्वास्थ्यउप्पर उ अस्पताल खेलवाड करटी रहल दाबी करले बटै । उहाँ सम्बन्धित निकायसे अस्पतालमे कार्यरत स्वास्थ्यकर्मीहुकनके विशेषज्ञताके अनुगमन करके परीक्षण समेत करे पर्ना बटैलै ।

अस्पताल व्यवस्थापन समितिके अध्यक्ष अशोक शाह काम करटी जाईबेर कुछ कमजोरी हुई सेक्ना कहटी कमजोरी स्वीकार करले बटै । उहाँ व्यवस्थापन समितिके बैठक बैठके पीडितसे माग करल क्षतिपूर्तिके विषयमे छलफल करके क्षतिपूर्ति डेना वा निकास डेना आश्वास डेलै ।