प्रदेश सभा बैठक फेनसे स्थगित
पहुरा समाचारदाता
धनगढी, असार २६ गते । सुदूरपश्चिम प्रदेश सभाके बैठक चौठाचो स्थगित हुइल बा । बजेटमे सहमति नैहुइल ओरसे अँट्वारके रोज बालाइल बैठक स्थगित हुइल हो ।
सुदूरपश्चिम प्रदेश सरकार आगामी आर्थिक वर्ष २०७९/८० के लाग नानल बजेटमे सहमति जुटैना आज कार्य व्यवस्था परामर्श समितिके बैठक बलैले रहे । मने उ बैठकमे बजेटउप्पर सहमति नैजुेटेसेकल जनैले बा ।
सहमतिके लाग बलाइल बैठकमे आर्थिक मामिला तथा योजनामन्त्री प्रकाशबहादुर रावल ओ प्रदेश सभा सदस्यबीच बोलिकबोला हुइल जनागिल बा । सहमतिके लाग बलाइल बैठकमे बोलिकबोला हुइल ओरसे प्रदेश सभाके बैठक सुरु हुइ नैसेकल बटाइल बा ।
आज (सोम्मार) बिहान फेन कार्य व्यवस्था परामर्श समितिके बैठक ओ साँझके प्रदेश सभाके बैठक बलाइल प्रदेश सभा सचिवालयके प्रवक्ता नरेन्द्रबहादुर पाल बटैलैं । ‘आज बलाइल कार्य व्यवस्था परामर्श समितिके बैठकमे सहमति नैहुइल ओरसे काल्ह (सोम्मार)के फेन बिहान उ समितिके बैठक बलाइल बा,’ उहाँ कलैं, ‘आब सम्वभतः सहमति हुइ ओ संसद फेन चलि ।’
प्रदेश सरकार विधि, पद्धति ओ प्रक्रिया मिचके आगामी आर्थिक वर्षके लाग बजेट नानल कटि सत्तारुढ दलके प्रदेश सभा सदस्यहुक्रे बजेटके विरोध करटि बटैं । उहाँहुकनके विरोधके कारण अभिनसम सभामे बजेटउप्पर छलफल हुइ नैसेकल ।नेपाली काँग्रेस संसदीय दल परिमार्जन नैहुइटसम बजेट पास हुइ नैसेक्ना निर्णय करसेकल बा ।
असार महिनाभित्रे बजेट पारित करेपरना कानूनी प्रावधान रहल बा । उ समय जाइ लागल ओरसे प्रदेश सरकार ओ आर्थिक मामिला तथा योजनामन्त्रीहे जैसिक हुइलेसे फेन बजेट सदनसे पास करैना दबाब परल बा । प्रदेश सरकारसे प्रस्तुत करल बजेट असारभित्रे पारित हुइक परना प्रावधान रहल प्रवक्ता पाल बटैलैं ।
नेकपा (माओवादी केन्द्र) बजेटके विरोध नैकरना ह्वीप जारी करसेक्ले बा । यद्यपि, उ पार्टीके प्रदेश सभा सदस्यहुक्रे यथास्थितिमे बजेट पास हुइ नैसक्ना जिकिर करटि आइल बटैं । प्रदेश सरकारसे नानल बजेटमे वित्तीय अनुशासन नैहुइटसम त्रुटिपूर्ण रहल काँग्रेस संसदीय दलसे ठहर करल बा । प्रि–बजेटके सिद्धान्त ओ प्राथमिकतामे छलफल हुइल मने बजेट औरे मेरिक आइल उ पार्टी जिकिर करले बा ।
