प्रदेश सरकारके बैठक छैठौं चो स्थगित
पहुरा समाचारदाता
धनगढी, २७ असार । सुदूरपश्चिम प्रदेश सरकारसे नानल बजेटउप्परके छलफलके बैठक छैठौं चो स्थगित हुइल बा ।
आज आह्वान करल बैठकमे प्रतिपक्ष दलके अनुपस्थिति हुइल ओरसे सभामुख अर्जुनबहादुर थापा काल्ह (मंगरके रोज)समके लाग बैठक स्थगित हुइल जानकारी करैलैं ।
“प्रतिपक्षी दलके कौनो फेन माननीय सभामे उपस्थित नैरहल ओरसे मंगरके बिहान ११ बजे बैठक बैठ्ना मेरिक सभा स्थगित हुइल जानकारी कराइटु,” सभामुख थापा कलैं ।
बैठकमे नेपाली काँग्रेसके कुछ प्रदेश सभा सदस्य, नेकपा एमाले, जनता समाजवादी पार्टी ओ लोकतान्त्रिक समाजवादी पार्टीके प्रदेश सभा सदस्य अनुपस्थित रहल रहैं ।
यीआघे सोम्मारके बिहान ११ बजे बलाइल प्रदेश सभा बैठक कार्यपरामर्श समितिमे सत्तापक्ष, प्रतिपक्ष ओ सरकारबीच सहमति नैहोके दिनके ३ बजेसमके लाग स्थगित हुइल रहे ।
सोम्मार बिहान सभामे सूचना टाँस कैके दिनके ३ बजेसमके लाग बैठक स्थगित करल प्रदेश सभा सचिवालयके सूचना अधिकारी युवराज जैशी जानकारी डेलैं । विशेष कारण कटि बैठक स्थगित हुइल उहाँ बटैलैं ।
यीआघे असार ८ गते बलाइल बैठक १२ गतेसमके लाग स्थगित करल रहे । १२ गते बलाइल बैठक बैठै नैपैटि १६ गतेसमके लाग स्थगित हुइल रहे । १६ गते फेन बैठक सञ्चालन हुइ नैसेकल ओरसे औरे सूचना जारी नैहुइटसमके लाग बैठक अनिश्चितकालके लाग स्थगित हुइल रहे ।
