मिडियासँगके सिकाई आदानप्रदान तथा समीक्षात्मक गोष्ठी

पहुरा समाचारदाता
धनगढी, २७ असार । कैलालीमे सबके लाग पह्राइ कार्यक्रमके मिडियासंगके सिकाई आदानप्रदान तथा समीक्षात्मक गोष्ठी हुइल बा । सोम्मारके रोज धनगढीमे युएस आईडि, ह्यान्डिक्याप ईन्टरनेस्नल ओ विश्व शिक्षाके सहकार्यमे सर्वाङ्गीण अपांगता विकास समाज नेपाल धनगढी, कैलालीसे सञ्चालित अपांगता रहल बालबालिकाहुकनमे शिक्षामे पहुँच अभिबृद्धि करना सबके लाग पह्राइ कार्यक्रमके आयोजनामे मिडियासंगके समीक्षात्मक गोष्ठी हुइल हो ।

उ गोष्ठीमे कैलालीके टमान मिडिया क्षेत्रमे कार्यरत पत्रकारहुकनके उपस्थिति रहल रहे । गोष्ठीमे सबके लाग पह्राई कार्यक्रम अन्तर्गत कैलाली जिल्लाके १३ पालिकाके ५ सय ५४ विद्यालयके पुर्व प्राथमिक तहसे लेके कक्षा ३ सममे अध्ययन करटिरहल कार्यगत सीमितता रहल ३८ हजार ८३ बालबालिकामध्ये ४ हजार ४८ जाने बालबालिकाके सीमितता पहिचान करना सेवा प्रदायक निकाय प्रतिवद्धता व्यक्त करले बा ।

वाशिङ्टन ग्रुप प्रश्नावली अनुसार शंकामे परल शारीरिक, सुनाई सम्बन्धि समस्या, हेराई सम्बन्धी समस्या ओ मनोसामाजिक समस्या रहल बालबालिकाहुकनहे रेफेरल सेवा डेना लक्ष्य रहल आयोजक संस्था जानकारी डेले रहे ।

कार्यक्रममे पत्रकारहुक्रे न्युनतम हुइलेसे फेन समावेशी शिक्षा सम्बन्धि जानकारी हुइपरना बाट ढैले रहैं । ओस्टेके धनगढी उपमहानगरपालिकाके स्वास्थ्य शाखा प्रमुख कृष्ण बोहरा वृहत स्वास्थ्य सेवा नगरपालिका सञ्चालन करना ओ ओहेबेला सबहे समोटके तत्काल धनगढी भित्रे सेवा प्रदायकहे सहज सेवा डेना पत्राचार कैके सहयोग करना बटैलैं । सारथी अस्पतालके डाक्टर निरज शाह ओपिडी पर्चा शुल्क मिनाहा कैके चेकजांच करना जानकारी डेलैं । ईम्प्याकट नेपालके अधिकृत रामबहादुर बोगटी फेन कानके जाँच निःशुल्क करना ओ उपकरण भरे खरिद करेपरना बटैलैं ।

यी परियोजनासे कैलाली जिल्लाके १३ पालिकाके ५५४ स्कुलमे हेड सर तालिम, प्रारम्भिक पहिचान तालिम, श्रोत विद्यालयमे शैक्षिक सामग्री वितरण अपांगता रहल बालबालिकाहुकनके तथ्यांक संकलन जैसिन कार्यक्रम सम्पन्न कैके रेफेरल सेवाओर उन्मुख रहल ओ हालसम ३६८ जहनके नियमित प्रक्रियासे ओ ५४० जहनके विशेषज्ञ टोलीसहितके मेडिकल टोली सेवा डेसेकल बा ।

ओस्टेके, ६ जाने अपांगता परिचयपत्रके लाग सिफारिस हुइल बटैं कलेसे ५ जाने चस्मा सहायक सामग्री प्राप्त करल विवरण संस्थाके कार्यकारी निर्देशक नन्दराज भट्ट जानकारी डेलैं ।

परियोजना सिनियर अधिकृत लोकराज पन्त सञ्चालक करल कार्यक्रम कार्यकारी निर्देशक नन्दराज भट्टके अध्यक्षतामे हुइल रहे । ह्यान्डिक्याप ईन्टरनेस्नलके चिप अफ पार्टी शौरभ शर्मा ओ प्राविधिक शान्तिके प्रस्तुति रहल कार्यक्रममे १४ जहनके उपस्थिति रहे ।