चुनावआघे कौनो पार्टीसँग एकता नैहुइः नेपाल
पहुरा समाचारदाता
धनगढी, २७ असार । नेपाल कम्युनिस्ट पार्टी (एकीकृत समाजवादी)के अध्यक्ष माधवकुमार नेपाल आगामी संघीय ओ प्रदेश सभाके चुनावआघे कौनो फेन पार्टीसँग एकता नैहुइना दावी करले बटैं ।
समाजवादी प्रेस संगठनसे सोम्मारके रोज धनगढीमे करल पत्रकार सम्मेलनमे नेकपा माओवादी केन्द्र ओ समाजवादी पार्टीबीच एकीकरणबारे पुछल प्रश्नमे अध्यक्ष नेपाल चुनावआघे एकीकरणके सम्भावना नैरहल प्रस्ट परलैं ।
“एकीकरणके विषयसे अब्बे कुछ कमिटी तरंगित हुइल बा । एकीकरण हुइजाइ कि कना बुझाइ बा,’ उहाँ कलैं, “आगामी चुनावआघे कौनो फेन पार्टीसँग हमार एकताके सम्भावना नैहो ।” अध्यक्ष नेपाल आगामी चुनावसम अब्बेक गठबन्धन निरन्तरता पैना बटैलैं । आवश्यक रहल ठाउँमे गठबन्धनबीच चुनावमे तालमेल हुइना उहाँ बटैलैं । अध्यक्ष नेपाल सक्कु कम्युनिस्ट पार्टीबीच वाम एकता होके चुनावमे जैना सम्भावना तत्काल नैरहल बटैलैं ।
समाजवादी एक्केलि जिटना ठाउँमे एकल उम्मेदवारी डेना ओ आवश्यक रहल ठाउँमे गठबन्धनबीच तालमेल कैके जैना उहाँक कहाइ बा । “गठन हुइल छोट अवधिमे हमार पार्टी राष्ट्रिय पार्टीके रूपमे स्थापित हुइल बा । अइना चुनावसम हम्रे सक्कु पालिका ओ वडा तहसम पुगब,” उहाँ कलैं, “चुनाव अपन बलबुतामे लरना सक्षम रना मेरिक अब्बे हम्रे संगठन निर्माणमे केन्द्रित बटि ।”
