उच्च जोखिम घरपरिवारहे सुरक्षित व्यवस्थाके माग
पहुरा समाचारदाता
धनगढी, २८ असार । कैलाली जिल्लाके कैलारी गाउँपालिका–३ शिवरत्नपुरके स्थानीयबासी उच्च जोखिममे रहल १५ घर परिवारहे तत्काल सुरक्षित बसोवासके व्यवस्था कैना माग करले बटै ।
मंगरके रोज फियान नेपाल प्रदेश कार्यालयसे कैगिल डेलिगेशनमे जिल्ला विपद व्यवस्थापन समिति कैलालीहे ज्ञापनपत्र बुझैटी ंंशिवरत्नापुरके बाढ प्रभावित समुदायसे उ माग राखल हुइट । जिल्ला विपद व्यवस्थापन समिति कैलाली ओ राष्ट्रिय मानव अधिकार आयोग सुदूरपश्चिम प्रदेश कार्यालयहे ज्ञापनपत्र बुझैटी उच्च जोखिममे रहल १५ घर परिवारहे तत्काल सुरक्षित बसोवासके व्यवस्था करे पर्ना माग राखल शिवरत्नपुर खाद्य अधिकार समुहके सचिव कमल चौधरी बटैलै ।
बाढके समयमे तत्काल उद्धार कार्यके लाग आवश्यक औजार, उपकरण तथा प्लाष्टिकके लाउके व्यवस्था करे पर्ना ज्ञापनपत्र मार्फत माग रख्ले बटी,’ उहाँ कहलै, शिवरत्नपुर मोहना लडियक कारण तत्काल १५ घर परिवार उच्च जोखिममे रहल बटै । बाँकी ८० घर समेत जोखिममे रहल बटै । बस्तीमे एक्कसी बाढ अइलेसे सुरक्षित ठाउँमे सर्ना एक ठो लाउ नइरहल ओरसे यी मागफे आघे सरल बा ।’
मोहना लडियक कारण सम्बन्ध विच्छेदके अवस्था रहल ओ विगत ३ वर्षसे निर्माण सम्पन्न हुई लागल झोलुङ्गे अभिनसम नइबनल कारण पुल हालहाली निर्माण सम्पन्न करके सुरक्षित आवागनके सुनिश्चितताके लाग आवश्यक पहल कैना माग राखल उहाँ बटैलै । गर्भवती तथा बालबालिकाहे खोप लगाई लडिया पार करके खोनपुर, भडरी आई पर्ना बाध्यता रहल ओरसे दुई वर्ष आघे शिवरत्नपूरमे निर्माण हुइल खोप केन्द्र तत्काल सञ्चालनके लाग पहल कैना माग राखल बा ।
सुदूरपश्चिम प्रदेश सरकार भौतिक पूर्वाधार विकास मन्त्रालयसे यातायात पूर्वाधार निर्देशनालय, पूर्वाधार विकास कार्यालय, कैलाली मार्फत खोनपूर झोलुगें पुल आर्थिक वर्ष २०७७ मे टेण्डर आव्हान करके ठेक्का मार्फत निर्माण कार्य सुरु करलेसेफे हालसम उ पूल निर्माण हुई नइसेकल हो ।
ज्ञापनपत्र मार्फत मोहना लडियक बाढके कारण वर्षेनी हुइना डुवान, कटान ओ पटानसे वस्ती, आम नागरिक, पशु चौपाया तथा खेतीयोग्य जमिनके संरक्षणके लाग विषेश गुरु योजना निर्माण करके तत्काल कार्यन्वयनफे माग राखल बा ।
कैलारी गाउँपालिका–३ सुर्मिलाना पुलसे (हुलाकी मार्ग) दक्षिण करिव २.५ किलोमिटरमे मोहना लडिया पार शिवरत्नपूर गाउँसे अइना जैना सदा लागके प्रयोग करे पर्ना बाध्यता बा ।
दैवि प्रकोप उद्धार समिति कैलालीके अध्ययन प्रतिवेदन अनुसार कैलारी गाउँपालिका बाढसे उच्च जोखिमके सूचीमे रहल बा । कैलारी गाउँपालिकामेफे शिवरत्नपूर अति जोखिम क्षेत्रमे परठ ।
मोहना लडियामे पुल नइहुके बर्षायाममे औषधी उपचार कैना, दैनिक ज्यालादारीके लाग अन्यत्र जाई पर्ना, दैनिक उपभोग्य सामान खरिद कैना तथा बालबालिका विद्यालय जैना समेत वन्चित हुई पर्ना अवस्था बा । २०७८ कार्तिक २ गतेके अविरल बर्षाके कारण आइल बाढसे धानबाली नष्ट हुइना ओ खेतीयोग्य जमिनमे बालु पटान हुके खेती करेफे नइमिल्ना अवस्था सृजना हुइल शिवरत्नपुरके स्थानीय सुदेशी चौधरी बटैलै ।
बाढके कारण मोहना लडियाके धार परिवर्तन हुके कैलारी गाउँपालिका उ वस्ती जोगैना लगाइल जैविक तथा भौतिक तटबन्ध यिहे असार १४ ओ १५ गते आइल बाढ आंशिक तथा असार २५ गते आइल बाढ बाँकी सक्कु तटबन्ध पुहैले बा । उ तटबन्ध कैलारी गाउँपालिकाके २० लाख आर्थिक बजेटमे निर्माण हुइल रहे ।
मोहना लडियाके धार परिवर्तन हुके सिधे वस्तीओर पैठे सेक्ना जोखिम रहल बा,’ उ वस्तीके विप्ती चौधरी कहली, ‘मोहना लडियाके कारण तत्काल १५ घर परिवार उच्च जोखिममे रहल बटै कलेसे बाँकी ८० घर समेत जोखिममे रहद बटै ।’ बाढ जबफे आई सेक्ना ओरसे सरोकारवाला निकाय समयमे ध्यान डेना जरुरी रहल फियान नेपाल सुदूरपश्चिम प्रदेश संयोजक मुकुन्द राना बटैलै ।
प्रभावित समुदायसे जिल्ला विपद व्यवस्थापन समिति कैलालीके संयोजक सहायक प्रमुख जिल्ला अधिकारी यज्ञराज जोशी ओ राष्ट्रिय मानव अधिकार आयोग सुदूरपश्चिम प्रदेश संयोजक मोहनदेव जोशीहे ज्ञापनपत्र बुझैले रहिट ।
