जोशीपुर गाउँपालिका पूर्ण खोप सुनिश्चितता पालिका घोषणा
पहुरा समाचारदाता
जोशीपुर, २९ असार । जोशीपुर गाउँपालिकाहे पूर्ण खोप सुनिश्चितता ओ दिगोपना घोषणा करगिल बा ।
जोशीपुर गाउँपालिका पालिका खोप समन्वय समिति स्वास्थ्य शाखाके आयोजनामे हुइल कार्यक्रममे गाउँपालिकाहे पूर्ण खोप सुनिश्चितता घोषणा करल हो । खोप समन्वय समितिके संयोजक तथा जोशीपुर गाउँपालिका अध्यक्ष चित्र बहादुर चौधरी स्वास्थ्य सबसे बरवार धन रहल ओरसे स्वास्थ्यहे सक्कु जाने मिलके व्यवस्थित कैना आवश्यक रहल बटैलै ।
पूर्ण खोप कार्यक्रमहे आर्थिक वर्ष २०७८/०७९ मे घरधुरी सर्वेक्षण अनुसार ४१७ बालबालिकाहे खोप लगाके पालिका स्तरीय पूर्ण खोप सुनिश्चितता घोषणा कार्यक्रम करल हो ।
कार्यक्रममे गाउँपालिका उपाध्यक्ष रेखा देवी कठरिया, प्रमुख प्रशासकीय अधिकृत धर्मराज खत्री, स्वास्थ्य कार्यालय कैलाली पदम विष्ट, युनिसेफका खुशी राम चौधरी, वडा नं १ से ७ समके वडा अध्यक्ष, कार्यपालिका सदस्य, स्वास्थ्यकर्मी, महिला स्वयम सेविका लगायतके उपस्थिति रहल रहे ।
कार्यक्रममे स्वागत मन्तव्य शाखा प्रमुख टेकबहादुर हमाल करल रहिट कलेसे सञ्चालन नरेन्द्र कठरिया करल रहिट ।
इहे बिच जानकी गाउँपालिकाहे फेन पूर्ण खोप सुनिश्चितता ओ दिगापना घोषणा करगैल बा । गाउँपालिका अध्यक्ष गणेश चौधरी पूर्ण खोप सुनिश्चितता ओ दिगोपना गाउँपालिका घोषणा करल हुइट ।
