कैलालीहे साक्षर जिल्ला घोषणा

पहुरा समाचारदाता
धनगढी, २९ असार । कैलालीहे साक्षर जिल्ला घोषणा करल बा । यहाँके १३ स्थानीय तह साक्षर घोषणा करलपाछे जिल्लाहे बुधके साक्षर घोषणा करल हो । शिक्षा विकास तथा समन्वय इकाइ कैलालीके प्रमुख बैकुण्ठ सुवेदी १५ से ६० बरस उमेर समूहमे साक्षरता दर ९५ प्रतिशतसे उप्पर रहल ओरसे जिल्लाहे साक्षर घोषणा करल बटैलै ।

२०६७ से २०७१ सालसम कैलालीमे साक्षरता अभियान सञ्चालन करल रहे । अब्बे स्थानीय तहसे घरधुरी सर्भेक्षण करलपाछे साक्षर घोषणा करल हो । २०६७ सालमे करल सर्भेक्षणमे एक लाख ५६ हजार निरक्षर रहलमे २०७१ सम सञ्चालन हुइल साक्षरता अभियानमे करिब एक लाख ६१ हजार जनहनहे साक्षर बनाइल शिक्षा विकास तथा समन्वय इकाइ जनैले बा ।

इकाइ प्रमुख सुवेदी कैलालीहे आब पूर्ण साक्षर घोषणा कैना चुनौती रहल बटैलै । लक्षित उमेर समूहके सक्कु जनहनहे साक्षर बनाइलपाछे किल पूर्ण साक्षर घोषणा करे सेकजैना मापदण्ड रहल बा । पूर्ण साक्षर घोषणाके लाग प्रयास करजैना सुवेदी बटैलै । साक्षरता अभियान जिल्ला समन्वय समितिके बैठकसे इहीसे आघे जिल्लाहे साक्षर घोषणा कैना निर्णय करल रहे । स्थानीय तहसे सर्भेक्षण कैके साक्षर घोषणा करलपाछे समितिसे जिल्लाहे समेत साक्षर घोषणा कैना निर्णय करल शिक्षा विकास तथा समन्वय इकाइ कैलालीके अधिकृत प्रतापसिंह धामी जानकारी डेलै ।

कैलालीहे साक्षर जिल्ला घोषणा कैटी सुदूरपश्चिम प्रदेशके सामाजिक विकास मन्त्री गोविन्दराज बोहरा देशके विकासके लाग शिक्षामे जोड डेहे पर्ना बटैलै । प्रदेश सरकारसे शिक्षा क्षेत्रहे उच्च प्राथमिकतामे राखके काम कैटी रहल उहाँ बटैलै । ‘शिक्षाके विकाससे किल समाज ओ देश समृद्ध बने सेकी ।’ उहाँ कहलै, ‘ओहेमारे सुदूरपश्चिम सरकारसे शैक्षिक विकासहे आपन प्राथमिकतामे रख्ले बा ।’