स्वास्थ्य चौकीहे ह्विलचियर हस्तान्तरण
पहुरा समाचारदाता
मसुरिया, २९ असार । कैलालीके मसुरिया स्वास्थ्य चौकीहे दुई थान ह्विलचियर हस्तान्तरण करल बा । नेपाली काँग्रेसके नेता तथा समाजसेवी दिनेश राज जोशीके समन्वयमे ह्विलचियर स्वास्थ्य चौकीहे प्रदान करल हो ।
एलआरआई स्कुल काठमाडौँके फाउण्डर यशोदा पन्त आपन स्व. बाबाडाइ पीताम्बर जोशी ओ जानकी जोशीके सम्झना तथा ससुइया राधा पन्तके सम्मानमे ह्विलचियर प्रदान करल हुइट ।
मसुरिया स्वास्थ्य चौकीमे अति असक्त बिरामी तथा गर्भवती सुत्केरी महिलाहे स्याहारसुसार कैना ह्विलचियरके अभावमे समस्या परल ओरसे गौरीगंगा नगरपालिका वडा नम्बर ९ के निवर्तमान वडाध्यक्ष हरिप्रसाद तिवारीके आग्रहहे दाता समक्ष राखलपाछे पन्त आफन्तहुक्रनके स्मृति ओ सम्मानमे ह्विलचियर प्रदान करल जोशी जानकारी डेलै ।
ह्विलचियर मसुरिया स्वास्थ्य चौकी व्यवस्थापन समितिके उपाध्यक्ष चन्द्रकला पराजुली तथा स्वास्थ्य चौकी प्रमुख लालप्रसाद पन्तहे हस्तान्तरण करल रहे ।
