धानबाली क्षतिके लाग आइल ६ करोड ८ लाख फिर्ता अवस्थामे

पहुरा समाचारदाता
धनगढी, ३० असार । गैल बरसके बेमौसमी बाढसे क्षति हुइल धानवाली राहतके लाग आइल २२ करोड २२ लाख ८५ हजार ५ सय ९८ रुप्या मन्से ६ करोड ८ लाख ४८ हजार १६४ रुप्या केन्द्रमे फिर्ता जैना अवस्थामे पुगल बा ।

जिल्ला विपद् व्यवस्थापन समितिके जेठ ११ गतेके निर्णयानुसार बेमौषमी वर्षाद्के कारण धानवालीमे हुइल क्षति वापतके राहत रकम जिल्लाके सक्कु स्थानीय तहमे राहत रकम पठासेकल रहे ।

जिल्ला विपद् व्यवस्थापन समितिके संयोजक सहायक प्रमुख जिल्ला अधिकारी यज्ञराज जोशी कैलाली जिल्लामे ८३ हजार ३ सय ६५ जाने बाढपीडित किसानहुकनके लाग राहत स्थानीय पालिकामे राहत रकम पठाइल बटैलै ।

“गैल बरसके कुवाँर–कार्तिकमे आइल बाढसे क्षति व्यहोरल किसानके तथ्याङ्क संकलन सम्बन्धित वडामे कैगिल रहे,” समितिके संयोजक जोशी कहलै, “कैलालीके १३ पालिकामे बाढसे १४ लाख ६ हजार ८७८ कटठामे लगाइल धानवली क्षति पुगल तथ्याङ्क आइल रहे । जिल्ला विपद् व्यवस्थापन समिति उहे तथ्याङ्कहे आधार मानके राहत पठैले रहे ।”

संकलित तथ्यांकानुसार बाढपीडित किसानहुकनहे राहत वितरण कैके स्थानीय पालिकाहे यिहे असार २५ गतेभिटर विवरण बुझैना जिल्ला विपद् व्यवस्थापन समिति आग्रह करल रहे ।

जिल्ला विपद् व्यवस्थापन समितिके संयोजक जोशी कैलालीके १३ स्थानीय पालिकाहे २२ करोड २२ लाख ८५ हजार ५ सय ९८ रुप्या क्षतिपूर्तिके लाग रकम पठाइल मन्से १३ करोड ७७ लाख ८८ हजार ९६३ रुप्या वितरण हुइल बटैलै । उहाँ कहलै, “पालिकाहे असार २५ गते राहत बाँटके विवरण बुझैना कहले रहि । कोई कोई चेकफे कटे सेकल हुइही । टबमारे असार ३० गतेसम समय डेहल बा । उ समयसम फर्छौैैट नैहुइल रकम आब विपद व्यवस्थापन समिति काठमाडौंके खातामे फिर्ता हुई ।”

विपद व्यवस्थापन समितिसे घोडाघोडी नगरपालिकामे ११ हजार ४६१ घरपरिवारके १ लाख ५० हजार ६७७.१० कटठामे लगाइल धानवालीमे क्षति हुइल बा । यहाँ २ करोड ६७ लाख ७९ हजार १७६.५० रुप्या राहत रकम पठाइल रहे । यहाँ १ करोड २७ लाख ८५ हजार २८ रुप्या वितरण हुइल बा । कलेसे १ करोड ३९ लाख ९४ हजार १४८ रुप्या फिर्ता जैना अवस्था बा ।

जानकी गाउँपालिकामे ३ हजार ९६१ घरपरिवारके ७२ हजार ९९४.१६ कटठामे लगाइल धानवाली नष्ट हुइल बा । यहाँ १ करोड ८ लाख ७ हजार २३२.३० रुप्या राहत रकम पठाइल रहे । यहाँ ७८ लाख ६० हजार २ सय ४१ वितरण हुइल बा । कलेसे २९ लाख ४६ हजार ९९० रुप्या फिर्ता जैना अवस्था बा ।

बर्दगोरिया गाउँपालिकामे २ हजार ५३७ घरपरिवारके ३७ हजार ९०३.७५ कटठामे लगाइल धानवाली नष्ट हुइल बा । यहाँ ६१ लाख १५ हजार १८.४५ रुप्या राहत रकम पठाइल समिति जनैले बा । यहाँ ५५ लाख १० हजार ३१४ रुप्या वितरण करल बा कलेसे ६ लाख ४ हजार ७०३ रुप्या फिर्ता जैना अवस्था बा ।

ओस्टेके, जोशीपुर गाउँपालिकाके २ हजार २८० परिवारके १९ हजार १४२.५२ कटठामे लगाइल धानवालीमे क्षति पुगल रहे । यहाँ ६९ लाख ४५ हजार ६१३ रुप्या राहत रकम पठाइल रहे । यहाँ २७ लाख १६ हजार ८५४ रुप्या वितरण कैगिल बा । कलेसे ४२ लाख २८ हजार ७५९ रुप्या फिर्ता हुइना अवस्था बा ।

भजनी नगरपालिका १० हजार ८७ घरपरिवारके २ लाख ८ हजार ३९५.२९ कटठाके लगाइल धानवाली नष्ट हुइल हुइल बा । यहाँ २ करोड ९२ लाख ४२ हजार ३९१.५५ रुप्या राहत रकम पठाइल रहे । यहाँ २ करोड ११ लाख ४८ हजार ८०२ रुप्या बाँटल बा, कलेसे ८० लाख ९३ हजार ५८८ रुप्या फिर्ता जैना अवस्थामे बा ।

कैलारी गाउँपालिकासे १० हजार ७७१ परिवारके २ लाख ३२ हजार ७४६ कटठामे लगाइल धानवाली क्षति पुगल रहे । यी पालिकामे ३ करोड २१ लाख ६२ हजार ७७१ रुप्या राहत रकम पठाइल रहे । यहाँ २ करोड ७१ लाख ९४ हजार २०१ रुप्या वितरण करल बा । ४९ लाख ६८ हजार ५७० रुप्या भर फिर्ता जैना अवस्था बा ।

गोदावरी नगरपालिकामे ४ हजार ९ सय ३१ परिवारके ७४ हजार ५८६ कटठाके धानवाली क्षति हुइल बा । यहाँ १ करोड २६ लाख ३१ हजार ७३३ रुप्या राहत रकम पठाइल रहे । ६९ लाख १२ हजार ९३४ वितरण हुइल बा, कलेसे ५७ लाख १८ हजार ७९९ रुप्या फिर्ता जैनाहस बा ।

चुरे गाउँपालिकामे ८ सय ८४ परिवारके ९ हजार ८२७ कटठाके धानवली नष्ट हुइल बा कलेसे यहाँ १८ लाख ३४ हजार ७६८ रुप्या राहत रकम पठाइल बा । यहाँ १३ लाख ७६ हजार २७ रुप्या बाँटल बा । कलेस, ४ लाख ५८ हजार ७४० रुप्या फिर्ता हुइना अवस्था बा ।

धनगढी उपमहानगरपालिकामे १२ हजार २५९ किसानके २ लाख ५ हजार ९ सय कटठामे लगाइल धानवाली नष्ट हुइल बा । यहाँ ३ करोड २२ लाख ५२ हजार ८२० रुप्या राहत रकम पठाइल रहे । उहाँ १ करोड ३२ लाख ७ हजार ४८३ रुप्या वितरण कैगिल बा, कलेसे १ करोड ९० लाख ४५ हजार ३३६ रुप्या फिर्ता जैना अवस्थामे बा ।

ओस्टेके, टीकापुर नगरपालिकामे ६ हजार ५३५ किसानके १ लाख ४७ हजार ९२७ कटठामे लगाइल धानवालीमे क्षति पुगल रहे । यहाँ २ करोड १४ लाख ५८ हजार ९७२ रुप्या राहत रकम पठाइल मन्से २ करोड १४ लाख ५७ हजार १९३ वितरण हुइल बा । आइल रकमसे सबसे ढेर टीकापुर नगरपालिका वितरण करले बा । यहाँ १ हजार ७७९ रुप्या किल वितरण करना बाँकी रहे ।

मोहन्याल गाउँपालिकामे १ हजार ५५ घरपरिवारके १५ हजार ८०५.५० कटठामे लगाइल धानवाली नष्ट हुइल रहे । यहाँ २४ लाख १९ हजार ७१७ रुप्या रकम समिति पठैले रहे । यहाँ २२ लाख ८९ हजार ६६७ रुप्या वितरण हुइल बा, कलेसे १ लाख ३० हजार ४९ रुप्या फिर्ता हुइना अवस्थामे बा ।

लम्कीचुहा नगरपालिकामे १० हजार १७१ घरपारिवारके १ लाख ३४ हजार ४३४.७५ कटठामे लगाइल धानवाली नष्ट हुइल रहे । यहाँ २ करोड ३६ लाख ४८ हजार ४७० रुप्या राहत रकम पठाइल रहे ।

ओस्टेके, गौरीगंगा नगरपालिकामे धानवाली नष्ट हुइल किसानहे राहत वितरणके लाग १ करोड ५९ लाख ८६ हजार ९१७ रुप्या आइल रहे । उहाँ १ करोड ५३ लाख ३० हजार २१६ रुप्या वितरण हुइल बा कलेसे ६ लाख ५६ हजार ७ सय रुप्या फिर्ता हुइना अवस्थामे बा ।

जिल्ला विपद् व्यवस्थापन समिति स्थानीय तहसे राहत विवरण कैके कागजात जिल्ला प्रशासन कार्यालयमे बुझैना कहल रहे । मने हालसमफे पूर्ण वितरणके कागजात प्राप्त नैहुइल ओरसे राहत रकम फिर्ता हुइना अवस्था आइल संयोजक जोशी बटैलैं ।

किसानहे क्षतिके आधारमे १० कटठासे कम जमिन क्षति हुइलहे प्रतिकटठा ३१५, ११ से ६० कटठासम्म क्षति हुइलहे १२५, ओ ६० कटठासे उप्पर क्षति हुइल किसानहे ७५ प्रति कटठा रकम वितरण हुइना बटाइल रहे ।