थारू लोकसाहित्य प्रकाशित

पहुरा समाचारदाता
काठमाडौं, ३० असार । लक्ष्मी माली तथा डा कृष्णराज सर्वहारीके सम्पादनमे ‘थारू लोकसाहित्य’ प्रकाशित हुइल बा । नेपाल प्रज्ञा प्रतिष्ठानसे प्रकाशित करल इ पुस्तकमे थारू समुदायके विविध भाषिका अन्तर्गतके लोकसाहित्य समेटल बा ।

यम्ने मोरङिया थारू लोकसाहित्यबारे रामसागर चौधरी, सप्तरिया थारू लोक साहित्यबारे नन्दलाल चौधरी, चितोनिया थारू लोकसाहित्यबारे कारी महतो, रुपन्देहीमे थारू लोकसाहित्यके अवस्थाबारे बमबहादुर थारू, डंगौरा थारू लोकसाहित्यबारे भूमिका थारू ओ बुनु थारूके लेख रहल बा । ओस्टके, डेसौरी थारू लोकसाहित्यबारे पवनकुमार थारू, कठरिया थारू लोकसहित्यबारे विष्णुप्रसाद कठरिया तथा रानाथारू लोकसाहित्यबारे करम सिंह राना तथा बासमती कुमारी रानाके लेख रहल बा ।

पुस्तकके सम्पादक डा.कृष्णराज सर्वहारीके अनुसार समाविष्ट सक्कु लेखके थारू भाषामे अनुवाद फेन समेटल ओरसे थारू भाषाके विविधता बुझ्न स्वयम् थारू भाषीहे फेन पुस्तक मदद्त कैना बा ।